මරදන්කඩවල ප්‍රදේශයේදී සිදුවූ රිය අනතුරකින් පාසල් සිසුන් දෙදෙනෙකු හා රුසියානු යුවලක් තුවාල ලබා රෝහල් ගත කෙරේ.

අද(14) පස්වරුවේදී මරදන්කඩවල , ප්‍රදේශයේ දී සිදු වූ රිය අනතුරකින් පාසල් සිසුන් දෙදෙනෙකු හා විදේශීක යුවලක් තුවාල ලබා රෝහල්ගත කල බව පොලිසිය කියයි.
අනුරාධපුර – නුවර ඒ 9 මාර්ගයේ මරදන්කඩවල වනමල්උයන ප්‍රදේශයේදී අනතුර සිදුව තිබිණ. පාර හරහා මාරුවීමට ගිය පාසැල් සිසුන් දෙදෙනෙකු හා විදේශීය ජාතික තරුණ යුවලක් ගමන් ගත් යතුරු පැදියක් ගැටීමෙන් මෙම අනතුර සිදුව ඇතැයි පොලිසිය කියයි.
අනතුරට ලක්ව ඇති විදේශිකයින් මෙරට සංචාරයක් සදහා පැමිණ ඇති රුසියානු ජාතික තරුණ යුවලක් වන අතර, එම රුසියානු ජාතික තරුණ යුවල මහනුවර ප්‍රදේශයේ සිට යාපනය බලා යතුරුපැදියකින් ගමන් කරමින් සිටියදී මෙම අනතුරට මුහුණ පා ඇති බව සිදු කළ පොලිස් විමර්ශණවලදී අනාවරණය වී තිබේ.
යතුරු පැදිය හා පාසැල් සිසුන් ගැටීමෙන් සිදුව ඇති මෙම අනතුරින් මාර්ගය හරහා ගමන් කිරීමට ගිය පාසැල් සිසුන් දෙදෙනා තුවාල ලබා ඇති අතර ඔවුන් ප්‍රතිකාර සදහා මරදන්කඩවල ප්‍රාදේශීය රෝහල වෙත ඇතුලත් කර තිබේ. එසේම යතුරු පැදියේ ගමන් ගනිමින් සිටි රුසියානු ජාතික යුවල ද මෙම අනතුරින් තුවාල ලබා ඇති අතර එලෙස තුවාල ලබා සිටි රුසියානු ජාතික තරුණ යුවල ද ප්‍රදේශවාසීන්ගේ සහය ඇතිව 1990 ගිලන්රථ සේවයේ සහය ඇතිව කඩිනමින් මරදන්කඩවල රෝහල වෙත ඇතුළත් කිරීමට ප්‍රදේශවාසීන් එක්ව කටයුතු කර ඇති බව පොලිසිය කියයි.
අනතුරින් තුවාල ළත් එම පාසැල් සිසුන් දෙදෙනා හා රුසියානු ජාතික තරුණ යුවළ මේ වන විට මරදන්කඩවල ප්‍රාදේශීය රෝහලේ ප්‍රතිකාර ලබමින් සිටීන අතර ඔවුන්ගේ තත්ත්වය එතරම්ම බරපතල නොවන බව රෝහල් ආරංචි මාර්ග පවසයි.
ප්‍රදේශය භාර උසස් පොලිස් නිලධාරීන්ගේ නියෝග අනුව හා මරදන්කඩවල පොලිස් ස්ථානාධිපතිවරයාගේ උපදෙස් අනුව රථවාහන අංශයේ ස්ථානාධිපතිවරයා ගේ මෙහෙයවීම යටතේ මරදන්කඩවල පොලිස් රථවාහන අංශයේ නිලධාරීන් පිරිසක් මෙම අනතුර සම්බන්ධයෙන් වූ වැඩිදුර විමර්ශන කටයුතු සිදු කරයි. .

24-02-14
කැකිරාව කුෂාන් ජයවර්ධන

_________