ඊශ්රායල අමාත්ය ඉටමාර් බෙන්-ගිවීර් විසින් පළ කරන ලද ග්ලෝබල් සමුද් ෆ්ලෝටියාහි රැඳවියන්ට අමානුෂික ලෙස සලකන ආකාරය නිරූපණය කෙරෙන වීඩියෝ පට සම්බන්ධයෙන් ශ්රී ලංකා රජය සිය දැඩි කනස්සල්ල සහ සංවේගය පළ කර තිබේ.
බලපෑමට ලක් වූ ශ්රී ලාංකික තරුණියක වන සමීරා මෙහෙබුදීන් ආරක්ෂාව, යහපැවැත්ම සහ ගෞරවය සහතික කිරීම සහ කඩිනමින් සහ ආරක්ෂිතව මෙරටට නැවත ගෙන්වාගැනීමට කටයුතු කරන බව විදේශ කටයුතු, විදේශ රැකියා සහ සංචාරක අමාත්යංශය නිවේදනය කළේය.
ඊට ඇතුළත් වන ක්ෂණික කොන්සියුලර් සහාය සහතික කිරීම සඳහා, ශ්රී ලංකාවේ විදේශ කටයුතු අමාත්යාංශය, දැනටමත් රාජ්යතාන්ත්රික මාර්ග ඔස්සේ ඊශ්රායල විදේශ අමාත්යාංශය සමඟ සම්බන්ධීකරණ කටයුතු සිදු කරමින් සිටින බව එහි සඳහන් වේ.
අමාත්යාංශය නිකුත් කළ නිවේදනයේ වැඩිදුරටත් දක්වා ඇත්තේ, විදේශයන්හි සිටින සිය පුරවැසියන්ගේ ආරක්ෂාව සහතික කිරීම වෙනුවෙන් ශ්රී ලංකා රජය මුළුමනින්ම කැපවී කටයුතු කරන බවය.
ගාසාහි ජනතාව වෙත ආධාර රැගෙන තුර්කියේ සිට ගමන් ඇරඹූ යාත්රා 50කින් පමණ යුතු ග්ලෝබල් සමුද් ෆ්ලෝටියා සහන කණ්ඩායමට අයත් මානව හිමිකම් ක්රියාකාරීන් 500කට ආසන්න පිරිසක් මේ වනවිට ඊශ්රායල හමුදා අත්අඩංගුවේ පසුවෙති.
මෙලෙස අත්අඩංගුවට පත් පිරිස විවිධ අඩත්තේට්ටම්වලට ලක්වන ආකාරය දැක්වෙන වීඩියෝවක් ඊශ්රායල අන්ත දක්ෂිණාංශික ඇමති බෙන් ගවියර් පසුගියදා සිය සමාජ මාධ්යයේ පළ කර ඇත.
මෙම වීඩියෝව මේ වනවිට එක්සත් ජාතීන්ගේ සංවිධානය, ඔස්ට්රේලියාව, ඉතාලිය, ප්රංශය, නෙදර්ලන්තය, නවසීලන්තය, කැනඩාව සහ බෙල්ජියම යන රටවල් හෙළා දැක ඇති බව විදෙස් මාධ්ය වාර්තා සඳහන් කරයි.
මෙලෙස අත්අඩංගුවට පත්වූ පිරිස අතරට ලාංකික මානව හිමිකම් ක්රියාකාරිණියක් වන සමීරා මෙහෙබුදීන් ද අයත්ය.
