තරග සංචාරයක් සඳහා බංග්ලාදේශ ක්රිකට් කණ්ඩායම ජුනි මස දිවයිනට පැමිණීමට නියමිත බව ශ්රී ලංකා ක්රිකට් ආයතනය පවසනවා.
ඒ අනුව ටෙස්ට් තරග දෙකක්, එක්දින තරග තුනක් හා විස්සයි විස්ස තරග තුනක් මෙම සංචාරයට ඇතුළත් වන බවයි ශ්රී ලංකා ක්රිකට් ආයතනය සඳහන් කළේ.
ටෙස්ට් තරගාවලිය ජුනි 17 සිට 29 දක්වා පැවැත්වෙන අතර, එක්දින තරගාවලිය ජුලි 02 සිට ජුලි 08 දක්වාත්, විස්සයි විස්ස තරගාවලිය ජුලි 10 සිට ජුලි 16 දක්වාත් පැවැත්වීමට නියමිතයි.
තරග කාලසටහන පහතින්.
ඉන්දියාවේ පැවති Battle of the Bands තරගාවලියේ අනු ශූරතාව දිනා ගැනීමට ශ්රී ලංකාව නියෝජනය කළ Knights සංගීත කණ්ඩායම සමත්වුණා.
ඉන්දියාවේ තොරතුරු හා විකාශන අමාත්යංශය සහ එරට ‘සරිගම’ සංගීත ආයතනය එක්ව සංවිධානය කර තිබුණු මෙම තරගාවලිය සඳහා රටවල් 12ක් නියෝජනය කරමින්, සංගීත කණ්ඩායම් 12ක් සහභාගි වුණා.
ශ්රී ලංකාව නියෝජනය කරමින් ඒ සඳහා සහභාගි වූ Knights සංගීත කණ්ඩායමට තරිඳු නිර්මාණ, දනිඳු පෙරේරා, රුක්ෂාන් සිල්වා, කවිශ්ක අශාන් සහ ගීසර විජේකෝන් යන අය ඇතුළත් වුණා.
තරගාවලියේ අනුශුරතාව දිනාගත් ඔවුන් අද (05) යළි දිවයිනට පැමිණි අතර, ඔවුන් පිළිගැනීම සඳහා ගායන ශිල්පීන් ඇතුළු පිරිසක් එක්ව සිටි බවයි වැඩිදුරටත් සඳහන් වෙන්නේ.
ලංකා ප්රිමියර් ලීගයේ (LPL) Colombo Strikers සහ Jaffna Kings යන කණ්ඩායම් සමඟ තිබූ හවුල්කාරිත්වය අවසන් කර ඇති බව ශ්රී ලංකා ක්රිකට් ආයතනය විසින් නිවේදනය කර තිබෙනවා.
ඒ අනුව ගිවිසුම්ගත වීමේදී එකඟ වූ කරුණු ඉටු කිරීමට අපොහොසත්වීම හේතුවෙන් මෙලෙස හවුල්කාරීත්වය අවසන් කිරීමට තීරණය කළ බවයි ශ්රී ලංකා ක්රිකට් ආයතනය හා IPG සමූහය නිවේදනය කර තිබෙන්නේ.
ඉදිරියේදී පැවැත්වෙන ලංකා ප්රිමියර් ලීග් තරඟාවලියේදී නව හිමිකාරිත්වයක් යටතේ කොළඹ සහ යාපනය නියෝජනය කරන කණ්ඩායම් දෙකක් ඉදිරිපත් කිරීමට නියමිත බවද වැඩිදුරටත් සඳහන්.
මේ සම්බන්ධයෙන් නිකුත් කළ නිවේදනය පහතින්.
ආසියානු කුසලාන කාන්තා බේස්බෝල් තරගාවලියට සුදුසුකම් ලැබීමේ තරගාවලියේ ඉරානයට එරෙහිව පැවති තරගය ලකුණු 13 – 0 ක් ලෙස ජය ගැනීමට ශ්රී ලංකා කාන්තා බේස්බෝල් කණ්ඩායම සමත්වුණා.
තායිලන්තයේ බැංකොක් නුවර පැවැත්වෙන මෙම තරගාවලියේ පළමු වටයේ තරගයක් ලෙස මෙම තරගය පැවැත්වුණා.
මෙය ජාත්යන්තර බේස්බෝල් පිටියේදී ශ්රී ලංකා කාන්තා කණ්ඩායමක් ලැබූ මංගල ජයග්රහණය ලෙස වාර්තා අතරට එක්වන බවයි වැඩිදුරටත් සඳහන් වෙන්නේ.
ශ්රී ලංකාව මූලික වටයේදී A කාණ්ඩයෙන් තරග වදින අතර, ඉන්දියාව, පකිස්තානය සහ ඉරානය ඊට ඇතුළත් සෙසු කණ්ඩායම් වනවා.
මෙරට රග්බි ක්රීඩාවේ නිරත වන පළමු කොටසේ විදුහල් 16 තරග වදින, ජනාධිපති කුසලාන අන්තර් පාසල් පිළිමළුන් පිටුදැකීමේ රග්බි තරගාවලිය හෙට (25) සිට ආරම්භ වනවා.
ඒ අනුව තරගාවලිය ආරම්භ කරමින් මූලික වටයේ තරග 02 ක් පැවැත්වීමට නියමිතව ඇති අතර, එහිදී මහනුවර ධර්මරාජ විදුහලට එරෙහිව කොළඹ ඩී.එස්. සේනානායක විදුහල කොළඹ CR & FC ක්රීඩාංගණයේදී තරග වැදීමට නියමිතයි.
එසේම, කොළඹ වෙස්ලි විදුහලට එරෙහිව මරදාන ශාන්ත ජෝෂප් විදුහල කොළඹ රාජකීය විදුහල් ක්රීඩා සංකීර්ණයේදී හෙට තරග වැදීමට නියමිත බවයි සඳහන් වෙන්නේ.
ජනාධිපති කුසලාන සඳහා වන පළමු අවසන් පූර්ව තරගය මැයි මස 09 වැනිදා රාජකීය විදුහල් ක්රීඩා සංකීර්ණයේදී ද, දෙවැනි අවසන් පූර්ව තරගය මැයි මස 11 වැනිදා හැව්ලොක් පිටියේදී ද පැවැත්වෙන අතර, අවසන් මහා තරගය මැයි 18 වැනිදා කොළඹ සුගතදාස ක්රීඩාංගණයේදී පැවැත්වීමට නියමිතයි.
2025 ආසියානු රග්බි පිරිමි ශූරතාවලියේදී ආසියාවේ ප්රධාන කණ්ඩායම් 4 අතරට ඇතුළත්වීමට ශ්රී ලංකාව ඊයේ (19) සමත් වුණා.
2027 රග්බි ලෝක කුසලානයට සුදුසුකම් ලබාගැනීමේ මෙන්ම ආසියානු පළමු කාණ්ඩයේ රග්බි තරගාවලිය සඳහා සුදුසුකම් ලබාගැනීමේ තීරණාත්මක තරගයක් ඊයේ කොළඹ තුරඟ තරග පිටියේදී ශ්රී ලංකාව හා මැලේසියාව අතර පැවැත්වුණා.
මෙම තරගයේ පළමු අර්ධය නිමාවන පත්වන විට ලකුණු 33ට 07ක් ලෙස පෙරමුණ ගැනීමට ශ්රී ලංකා පිළ සමත් වූ අතර අනතුරුව දෙවැනි අර්ධයේදී ද තවත් ලකුණු 26 ක් සිය ලකුණු පුවරුවට ශ්රී ලංකා ක්රීඩකයින් එක් කර ගනිද්දී මැලේසියානු කණ්ඩායමට රැස්කර ගැනීමට හැකිවුණේ ලකුණු 12 ක් පමණයි.
ඒ අනුව මෙම තරගයෙන් ලකුණු 59 ට 19 ක අති විශිෂ්ට ජයක් වාර්තා කළ ශ්රී ලංකාව ආසියාවේ සුපිරි කණ්ඩායම හතර තරග වදින පළමු කාණ්ඩයේ රග්බි තරගාවලිය සඳහා සුදුසුකම් ලබා ගැනීමට සමත් වුණා.
ආසියානු මලල ක්රීඩා සම්මේලනයේ මෙහෙයවීමෙන්, සිව් දිනක් පුරා සෞදි අරාබියේදී පැවති ආසියානු යොවුන් ශූරතා අවුරුදු 18න් පහළ මලල ක්රීඩා තරගාවලිය ඊයේ (18) අවසන් වුණා.
එහිදී ශ්රී ලංකාව රන් පදක්කමක්, රිදී පදක්කම් 03ක්, ලෝකඩ පදක්කම් 04ක් සමගින් සමස්ත පදක්කම් 08 ක් දිනා ගනිමින් පදක්කම් සටහනේ 09 වන ස්ථානය ලබා ගැනීමට සමත්වුණා.
මෙහිදී ශ්රී ලංකාව දිනාගත් සමස්ත පදක්කම් සංඛ්යාව, ආසියානු වයස අවුරුදු 18න් පහළ ශූරතාවලියකදී දිනාගත් වැඩිම පදක්කම් සංඛ්යාව ද වීම විශේෂත්වයක් වනවා.
රන් පදක්කම් 19ක්, රිදී පදක්කම් 12ක් හා ලෝකඩ පදක්කම් 05ක් දිනූ චීනය පදක්කම් සටහනේ පෙරමුණ හිමි කරගත් අතර, ජපානය රන් පදක්කම් 03ක්, රිදී පදක්කම් 03ක් හා එක් ලෝකඩ පදක්කමක් දිනා එහි දෙවන ස්ථානය හිමි කරගත්තා.
රන් පදක්කම් 03ක්, රිදී පදක්කමක් හා ලෝකඩ පදක්කම් 02ක් දිනා ගනිමින් සත්කාරක සෞදි අරාබිය මෙහි තෙවන ස්ථානයට පත් වී තිබෙනවා.
ආසියානු පාපන්දු සම්මේලනයේ (AFC) සභාපති ෂෙයික් සල්මන් බින් එබ්රහිම් අල් කලීෆා සහ තරුණ කටයුතු සහ ක්රීඩා අමාත්ය සුනිල් කුමාර ගමගේ හා නියෝජ්ය අමාත්ය සුගත් තිලකරත්න අතර සාකච්ඡාවක් ඊයේ (03) පවත්වා තිබෙනවා.
බොහෝ ආසියානු රටවල් ආර්ථිකය හමුවේ දූෂණයට ලක්ව ඇති නමුත්, වත්මන් ආණ්ඩුවේ ක්රියාමාර්ග සමඟ ශ්රී ලංකාව රටක් ලෙස ඉදිරියට ගමන් කරමින් පවතින බව ආසියානු පාපන්දු සම්මේලනයේ (AFC) සභාපතිවරයා මෙහිදී පවසා ඇති බවයි ක්රීඩා අමාත්යංශය සඳහන් කළේ.
පාපන්දු ක්රීඩාවේ උන්නතිය උදෙසා, ක්රීඩා අමාත්යාංශය සමඟ සම්බන්ධව, නවීන පහසුකම් සහිත ජාත්යන්තර පාපන්දු ක්රීඩාංගනයක් මෙරටට ලබා දීමට කටයුතු කරන බවට ඔහු සඳහන් කර ඇති අතර, ඒ සඳහා අවශ්ය ඉදිරි සැලසුම් පිළිබඳවද මෙහිදී වැඩිදුරටත් සාකච්ඡා කර තිබෙනවා.
ශ්රී ලංකා ක්රිකට් ආයතනයේ 64 වැනි වාර්ෂික මහා සභා රැස්වීමට සමගාමීව පැවති නිලවරණයේදී 2025 – 2027 කාලසීමාව සඳහා අදාළ නව නිලධාරී මණ්ඩලය අද (31) තෝරා පත්කරගෙන තිබෙනවා.
ඒ අනුව ශ්රී ලංකා ක්රිකට් ආයතනයේ නව සභාපතිවරයා ලෙස හිටපු සභාපති ශම්මි සිල්වා යළිත් තේරී පත්ව තිබෙනවා.
අදාළ සම්පූර්ණ නිලධාරී මණ්ඩලය පහතින්.
* සභාපති: ෂම්මි සිල්වා
* උප සභාපති: ආචාර්ය ජයන්ත ධර්මදාස
* උප සභාපති: රවීන් වික්රමරත්න
* ලේකම්: බන්දුල දිසානායක
* භාණ්ඩාගාරික: සුජීව ගොඩලියද්ද
* සහකාර ලේකම්: ක්රිෂාන්ත කපුවත්ත
* සහකාර භාණ්ඩාගාරික: ලසන්ත වික්රමසිංහ
ශ්රී ලංකා ජාතික ක්රිකට් කණ්ඩායමේ ක්රීඩකයින් ශ්රී ලංකා ක්රිකට් ආයතනයේ සේවකයින් ලෙස සලකා ඔවුන්ගෙන් රඳවා ගැනීමේ බද්දක් අය කිරීමට දේශීය ආදායම් දෙපාර්තමේන්තුව ගෙන තිබෙන තීරණය බල රහිත කිරීමේ රිට් ආඥාවක් නිකුත් කරන ලෙස ඉල්ලා ශ්රී ලංකා එක්දින ක්රිකට් කණ්ඩායමේ නායක චරිත් අසලංක සහ ශ්රී ලංකා ටෙස්ට් ක්රිකට් කණ්ඩායමේ නායක ධනංජය ද සිල්වා විසින් අභියාචනාධිකරණයට පෙත්සමක් ඉදිරිපත් කර තිබෙනවා.
මෙම පෙත්සම අද (18) කරුණු තහවුරු කිරීම සඳහා අභියාචනාධිකරණයේ වැඩ බලන සභාපති, විනිසුරු මොහොමඩ් ලෆාර් තාහීර් සහ කේ.පී. ප්රනාන්දු යන අභියාචනාධිකරණ විනිසුරු මඩුල්ල ඉදිරියේ කැඳවා තිබුණු බවයි සඳහන් වෙන්නේ.
ඒ අනුව මෙම පෙත්සමේ වග උත්තරකරුවන් ලෙස දේශීය ආදායම් කොමසාරිස් ජෙනරාල්, එහි නියෝජ්ය කොමසාරිස්වරයා, ශ්රී ලංකා ක්රිකට් ආයතනයේ සභාපති ඇතුළු එහි විධායක කමිටු සාමාජිකයින්, විගණකාධිපතිවරයා ඇතුළු පිරිසක් නම් කර තිබෙනවා.
මෙම පෙත්සම කරුණු තහවුරු කිරීම සඳහා ලබන 28 වැනිදා කැඳවන ලෙසට විනිසුරු මඬුල්ල නියම කර ඇති බවයි වැඩිදුරටත් සඳහන් වන්නේ.
