Category: news_sub

යුද හමුදා මැදිහත්වීමෙන් කොළොන්නාවේ සිට ඉන්ධන බෙදා හැරීම සඳහා  මේ වන විට ඉන්ධන බවුසර් 15 ක් පිටත් කර හැර ඇති බව හමුදා මාධ්‍ය ප්‍රකාශක, බ්‍රිගේඩියර් රොෂාන් සෙනෙවිරත්න මහතා ප්‍රකාශ කර තිබේ.

එසේම ඛණිජ තෙල් නීතිගත සංස්ථාවේ කොළොන්නාව නිමාව ඉදිරිපිට උණුසුම් තත්ත්වයක් නිර්මාණය වී  තිබුණි.

ඒ හේතුවෙන් කොළොන්නාව-කොළඹ ප්‍රධාන මාර්ගයේ දැඩි රථ වාහන තදබදයක් නිර්මාණය වී තිබූ  අතර තාවකාලිකව මාර්ගය වසා දැමීමට සිදුවිය.

වැඩවර්ජනයට සම්බන්ධ සේවකයන් පිරිසක් විසින් කොලොන්නාව තෙල් ගබඩා පර්යන්තයට, තෙල් ගෙනයාම සඳහා පැමිණි දුම්රියට විරෝධය පළකරමින් දුම්රිය මාර්ගය හරස් කරමින්  ආරම්භ කළ විරෝධතාවක් හේතුවෙන් මෙම තත්ත්වය හටගෙන තිබේ.

මේ හේතුවෙන් කැරළි මර්දන ඒකක සහ ජල ප්‍රහාරක රථ හතරක්ද මේ වන විට එම ස්ථානයට කැඳවා ඇති බව වාර්තා වෙයි.

අදාළ දුම්රිය ගුවන්තොටුපොළ වෙත තෙල් ගෙනයාම සඳහා පැමිණ ඇතැයිද එම දුම්රිය මේ වන විට පිටත්වීමට සූදානම් බවද සඳහන්ය.

සාම්පූර්හී ගල් අගුරු බලාගාරයක් වෙනුවට ජපන්, ඉන්දීය හවුල්කාරීත්වයකින් යුත් ස්වභාවික වායු බලාගාරයක් ඉදිකිරීමට තීරණය වී ඇතැයි සම කැබිනට් ප්‍රකාශක සෞඛ්‍ය පෝෂණ හා දේශීය වෛද්‍ය අමාත්‍ය රාජිත සේනාරත්න සදහන් කළේය.

ඊයේ (19) පැවති කැබිනට් තීරණ දැනුම්දීමේ ප්‍රවෘත්ති සාකච්ඡාවේ මාධ්‍යවේදීන් නගන ලද ප්‍රශ්න වලට පිළිතුරුදෙමින් අමාත්‍යවරයා මේ බව පැවසීය.

ඉන්දියානු රජය විසින් සාම්පූර්හී ගල් අගුරු බලාගාරයක් ඉදිකිරීමට මුලදී තීරණය වී තිබුණත් ඉන් වන පරිසර හානිය සලකා ජනාධිපතිවරයා ගල් අගුරු බලාගාරයක් ඉදි නොකිරීමට තීරණය කළ බැවින් මෙලෙස ස්වභාවික වායු බලාගාරයක් ඉදිකිරීමට නියමිත බව අමාත්‍යවරයා පැවසීය.

ගල් අගුරු බලාගාරයක් වෙනුවට ස්වභාවික වායු බලාගාරයක් ඉදිකිරීමට ඉන්දියානු රජය අකමැති බැවින් එය ඉන්දිය ජපන් හවුල්කාරීත්වයක් යටතේ ඉදිකිරීමට සිදු වන බවද හෙතෙම කීය.

කෙසේ වෙතත් සාම්පූර්හී ස්වභාවික වායු බලාගාරයක් ඉදිකිරීමට කොරියානු සහ ජපන් රජයෙන් යෝජනා ඉදිරිපත් වූ බවත් ඉන් කොරියානු රජය ඉදිරිපත් කළ යෝජනාව වඩා වාසි සහගත එකක් වූ බවත් අමාත්‍යවරයා පැවසීය. නමුත් ජපානය තාක්ෂණික වහයෙන් ඉදිරියෙන් සිටින බැවින් සහ ශ්‍රී ලංකාව හා ජපානය අතර පවතින රාජ්‍ය තාන්ත්‍රික සබදතා සළකා බලා ජපාන රජය සමග ගිවිසුමට ඇතුළත් වීමට තීරණය කළ බවද අමාත්‍යවරයා වැඩිදුරටත් පැවසීය.

මෙවර අ.පො.ස උසස් පෙළ විභාගයේ ප්‍රවේශ පත් නිකුත් කර ඇතැයි ශ්‍රි ලංකා විභාග දෙපාර්තමේන්තුව සදහන් කරයි.

ඒ අනුව විභාගය  සඳහා පෙනී සිටින පාසල් අයදුම්කරුවන් 2,37943කගේ ප්‍රවේශ පත්‍ර අදාළ විදුහල්පතිවරුන් වෙතත් පෞද්ගලික අයදුම්කරුවන් 77,284 කගේ ප්‍රවේශ පත්‍ර  ඔවුන්ගේ පෞද්ගලික ලිපිනයන් වෙතත්  තැපැල් කර ඇත.

මෙවර අ.පො.ස. (උ.පෙ) විභාගය  ලබන අගෝස්තු මස 08 වන දින සිට සැප්තැම්බර් මස 02 දිින දක්වා පැවැත්වීමට නියමිතය. දිවයින පුරා විභාග මධ්‍යස්ථාන 2,230 ක් මෙම විභාගය පැවැත්වීමට සැළසුම් කර තිබේ.

නියමිත දිනය පුවේශපත් නොලද පෞද්ගලික අයදුම්කරුවන් තමා ඉදිරිපත් කළ ඉල්ලුම්පතේ පිටපතක්, විභාග ගාස්තු ගෙවූ කුවින්තාන්සියේ පිටපතක් හෝ විභාග ගාස්තු ගෙවූ බවට  තැපැල් ස්ථානාධිපතිගෙන් ලබාගත් සහතික කළ ලිපියක් සහ අයදුම්පත්‍රය ලියාපදිංචි තැපෑලට යොමු කළ කුවින්තාන්සිය විභාග දෙපාර්තමේන්තුවේ පාසල් විභාග සංවිධාන ශාඛාව වෙත ඉදිරිපත් කර ප්‍රවේශ පත්‍රය ලබා ගත හැක.

ප්‍රවේශ පත්‍රයන්හි විෂය සංශෝධන , භාෂා මාධ්‍ය සංශෝධන හෝ වෙනත් සංශෝධන සිදු කිරීමට අවශ්‍යය පාසල් අයදුම්කරුවන් තම විදුහලේ විදුහල්පති මඟින් ද පෞද්ගලික අයදුම්කරුවන් තමා විසින් ද 2017.07.20 දිනට පෙර  පාසල් විභාග සංවිධාන ශාඛාව වෙත යොමු කිරීමෙන්  අදාල සංශෝධන සිදු කර ගත හැකි බව ශ්‍රි ලංකා විභාග දෙපාර්තමේන්තුව සදහන් කරයි.

මේ සම්බන්ධයෙන් යම් විමසිමක් වෙතොත් පාසල් විභාග සංවිධාන හා ප්‍රතිඵල ශාඛාවේ 0112784208/ 0112784537/ 0113140314යන දුරකතන අංක අමතා හෝ ෆැක්ස් අංක 0112784422 මගින් නැතිනම් ක්ෂණික ඇමතුම් අංක 1911 මගින් තොරතුරු විමසිය හැකි බව ශ්‍රි ලංකා විභාග දෙපාර්තමේන්තුව වැඩිදුරටත් සදහන් කරයි.

මොරටුව සරසවියේ අයාලේ යන සුනඛයන් සදහා නිර්වින්දන ඹෟෂධ එන්නත් කිරීමෙන් පසුව එම සුනඛයින් මිය යාම සම්බන්ධය නීතිමය පියවර ගන්නා බව රජයේ පශු වෛද්‍යවරුන්ගේ සංගමය සදහන් කරයි.

මෙම සුනඛයින් නිර්වින්දනය කිරීම සදහා තහනම් ඖෂධවර්ගයක් යොදාගෙන ඇතැයි එම සංගමයේ ලේකම් වෛද්‍ය ප්‍රදීප් කුමාරවඩු පෙන්වාදෙයි.

මේ පිළිබද අදහස් දක්වමින්  මොරටුව විශ්ව විද්‍යාලයේ උපකුලපති  මහාචාර්ය ආනන්ද ජයවර්ධන පැවසුවේ විශ්ව විද්‍යාලය තුළ සුනඛයන් අධික බැවින් අධ්‍යාපනය සදහා සුදුසු ආරක්ෂිත පරිසරයක් නිර්මාණය කිරීමට සුනඛයින් එලවා දැමීමටත් එළවා දැමිය නොහැකි සුනඛයින්  සදහා වද එන්නත් ලබාදීමට විශ්වවිද්‍යාල ආරක්ෂක අංශ වෙත දැනුම් දුන් බවයි.

එහිදී එම එන්නත් විෂ වීමෙන් සුනඛයින් දෙදෙනෙක් පමණක් මිය ගොස් ඇතැයි වාර්තා වූ බවත් ඒ සම්බන්ධයෙන් සිය කණගාටුව ප්‍රකාශ කරන බවත් හෙතෙම මාධ්‍ය වෙත අදහස් දක්වමින් අවධාරණය කළේය.

 කෙසේ වෙතත් මේ බව අනාවරණය වූ වහාම එම සුනඛයින්ට හිංසාකාරී වන ලෙස කටයුතු නොකරන මෙන් තමා උපදෙස් දුන් බවද ඒ මහතා වැඩිදරටත් පැවසීය

දූෂණ ලේකම් කාර්යාලයේ කාලය අවසන් වීමක් මිස  අහෝසි කිරීමක් සිදු වන්නේ නැතැයි සෞඛ්‍ය පෝෂණ හා දේශීය වෛද්‍ය අමාත්‍ය  සම කැබිනට් ප්‍රකාශක රාජිත සේනාරත්න පැවසීය.

මෙම කාර්යාලය  වසරක කාලයක් සදහා පමණක් ආරම්භ කළ බවත් පසුව තවත් කැබිනට් පත්‍රිකාවක් මගින් මාස 6ක කාලයකට  දීර්ඝ  කල බවත් හෙතෙම කීය.

එලෙස දිගු කල කාලයද කාලය ජුලි 31න් අවසන් වන බැවින් එහි කටයුතු නැවැත්වීමට සිදු වන බව අමාත්‍යවරයා පෙන්වා දුන්නේය.

රජයේ ප්‍රවෘත්ති දේපාර්තමේන්තුවේදී (12) පැවති කැබිනට් තීරණ දැනුම්දීමේ ප්‍රවෘත්ති සාකච්ඡාවේදී අමාත්‍යවරයා මේ බව අවධාරණය කළේය.

එසේම මෙම කාර්යාලය පිහිටවන ලද්දේ  මූල්‍ය අපරාධ විමර්ෂණ කොට්ඨාශයට අවශ්‍ය මූලික ලිපි ගොණු සකස් කිරිමට මිස දූෂණ සෙවීමට නොවන බවද  දූෂණ සෙවීමට මේ වන විටත් ආයතය 14 ක් තිබෙන බව අමාත්‍යවරයා පෙන්වා දුන්නේය.

එසේම මෙම ආයතනය පිහිටුවන ලද්දේ මහා පරිමාණ දූෂණ සෙවීමට මිස සිල්ලර චංචා සෙවීමට නොවන බවත් මේ වන විට එම ආයකනයට යොදවන ලද මුදල් ප්‍රමාණය හා එයින් ඉටු  කරන ලද කාර්යයන් පිළිබද ගැටලුවක් තිබෙන බවත් අමාත්‍යවරයා පැවසීය.

කැලිකසළ බැහැර කිරීම පිළිබඳව ජාතික ප්‍රතිපත්තියක් සකස් කරන ලෙස රජයට නියම කරන ලෙස ඉල්ලා ශ්‍රේෂ්ඨාධිකරණයට ගොනු කළ පෙත්සමක් සලකා බැලීම කල්දමා තිබේ.

පරිසර යුක්ති කේන්ද්‍රය විසින් ඉදිරිපත් කළ පෙත්සමෙන් ජනාධිපතිවරයා, මධ්‍යම පරිසර අධිකාරිය, කොළඹ මහනගර සභාව ඇතුළු පාර්ශව කිහිපයක් වගඋත්තරකරුවන් වශයෙන් නම් කර ඇති බව වාර්තා වේ.

කැලිකසළ බැහැර කිරීම පිළිබඳව විධිමත්, විද්‍යාත්මක ජාතික ප්‍රතිපත්තියක් නොමැතිකමින් ගැටළු රාශියක් පැනනැඟී ඇති බවත්, මීතොටමුල්ල ඛේදවාචකය එයින් එකක් පමණක් බවත්, රට පුරා එවැනි ගැටළු දකින්නට ඇති බවත් පෙත්සම්කරුවන් පෙන්වාදී තිබේ.

මේ හේතුව නිසා කසළ බැහැර කිරීම සම්බන්ධයෙන් ජාතික ප්‍රතිපත්තියක් සකසන ලෙස රජයට නියෝගයක් නිකුත් කරන මෙන් පෙත්සම්කරුවන් විසින් ඉල්ලා තිබේ.

මෙහිදී වගඋත්තරකාර පාර්ශවය වෙනුවෙන් පෙනී සිටි රජයේ නීතිඥයින් පවසා ඇත්තේ මෙම සිද්ධියට අදාළව කරුණු අධ්‍යයනය කිරීමකින් තොරව යමක් ප්‍රකාශ කළ නොහැකි බව හා ඒ හේතුවෙන් කරුණු අධ්‍යයනය කිරීම සඳහා කාලය අවශ්‍ය බවයි.

ඉදිරිපත්වූ කරුණු සලකා බැලූ ශ්‍රේෂ්ඨාධිකරණය විසින් අදාළ පෙත්සම අගෝස්තු 09 වන දින යළි කැඳවීමටත්, එදිනට පෙත්සම සලකා බැලීමටත් තීරණය කළ බව වාර්තා වේ.

නුවරඑළිය, මහනුවර හා ගාල්ල හා කොටුව තැපැල් කාර්යාල ගොඩනැගිලිවලින් තැපැල් කාර්යාල ඉවත් කර සංචාරක හෝටල් ඉදිකිරීමට රජය ගෙන ඇති තීරණයට විරෝධතාවය පලකිරීම ඇතුළු ඉල්ලීම් තුනක් මුල් කරගනිමින් තැපැල් සේවකයන් දියත් කළ වැඩ වර්ජනය අඛණ්ඩව පවත්වාගෙන යන බව ඒකාබද්ධ තැපැල් වෘත්තිය සමිති පෙරමුණේ කැදවුම්කරු බොස්ටන් ලංකා අප කළ විමසීමකට පිළිතුරු වශයෙන් පැවසීය.

මේ වන විට සිය ගැටලු සදහා විසදුම් ලබාදීමට කිසිදු පාර්ෂවයක් ඉදිරිපත්ව නැති බවද හෙතෙම අවධාරණය කළේය.

වර්ජනය හේතුවෙන් මේ වන විට දිවයින පුරා තැපැල් කාර්යාල 653ක් හා උපතැපැල් කාර්යාල 3410ක් අඩපණව ඇති බවද වෘත්තිය සමිති පෙරමුණේ කැදවුම්කරු සදහන් කළේය.

එසේම වැඩ වර්ජනය හේතුවෙන් ඊයේ මධ්‍යම රාත්‍රිය වන විට කොළඹ මධ්‍යම තැපැල් හුවමාරැවේ පමණක් ලිපි ලක්ෂයක් පමණ ගොඩගැසී ඇති බවද හෙතෙම පැවසීය.

ඊශ‍්‍රායල් රජයෙන් ශ්‍රී ලංකාවට ලැබෙන රැකියා ආරක්ෂා කිරීමේ වගකීම එරට රැකියාවල නිරත ශ්‍රී ලාංකික ශ්‍රමිකයින් සතුව පවතින බව විදේශ රැකියා අමාත්‍ය තලතා අතුකෝරාල මහත්මිය පවසයි.

ඊශ‍්‍රායලයේ රැකියා සඳහා යන ශ්‍රී ලාංකික ශ්‍රමිකයින් සිය සේවා කාලසීමාව ඉක්මවීමෙන් පසු නීති විරෝධීව එරට රැදී සිටීම හේතුවෙන් ඊශ‍්‍රායලයේ කෘෂි අංශයේ රැකියා අවස්ථාවන් අහිමිවීමේ තර්ජනයක් ඇති බව අමාත්‍යවරිය පෙන්වා දෙයි.

මේ හේතුවෙන් නීති විරෝධීව එරට රැදී සිටින ශ්‍රමිකයින්  සම්බන්ධයෙන් නීතිමය ක්‍රියාමාර්ග ගැනීමට නියමිත බව තලතා අතුකෝරාල මහත්මිය සඳහන් කළේය.

ඊශ‍්‍රායලයේ රැකියා සඳහා යන ශ්‍රමිකයින් 38 දෙනෙකු සඳහා ගුවන් ටිකට් පත් පිරිනැමීමේ අවස්ථාවකට සහභාගී වෙමින් විදේශ රැකියා අමාත්‍යවරිය මෙම අදහස් පල කර තිබේ.