රජයේ බදු ප්රතිපත්තිවලට එරෙහිව වෘත්තීයවේදීන් ප්රකාශයට පත්කර ඇති කළු විරෝධතා සතිය අද (27) පස් වැනි දිනටත් ක්රියාත්මක වුණා.
අදත් විවිධ ප්රදේශවලදී වෘත්තියවේදීන් විරෝධතා ව්යාපාරවල නිරත වූ අතර පසුගිය 23 වැනි දා ආරම්භ කළ කළු විරෝධතා සතිය අද දිනයෙන් අවසන් වනවා.
ඒ අනුව ලංකා ඛනිජ තෙල් සංස්ථාවේ කොළොන්නාව නිමාව ඉදිරිපිටදී ඛනිජ තෙල් වෘත්තිය සමිති එකමුතුව අද (27) දහවල් විරෝධතාවක් පැවැත්වූ අතර ‘එක්වෙමු – පෙළගැසෙමු, අසාධාරණ බදු ප්රතිපත්තිය වහා හකුලා ගනු’ යන තේමාව යටතේ එම විරෝධතාව සංවිධානය කර තිබුණා.
ත්රෛනිකායික මහා නායක හිමිවරුන්ගේ අත්සනින් යුතුව ජනාධිපතිවරයා වෙත විශේෂ ලිපියක් යොමුකර තිබෙනවා.
ඒ අනුව උතුරු නැගෙනහිර පළාත් තුළ පිහිටි විහාරස්ථානයන්ගේ හා රට පුරා පිහිටි සුවිශේෂී ඓතිහාසික බෞද්ධ සිද්ධස්ථානයන්ගේ ආරක්ෂාව හා ප්රතිසංස්කරණ කටයුතු තහවුරු කිරීම සම්බන්ධයෙන් මෙම ලිපිය ජනාධිපතිවරයා වෙත යොමුකර ඇති බවයි සඳහන් වන්නේ.
එසේම පසුගිය කාලවකවානුව තුළ දිවයිනේ අනෙකුත් පළාත්වල සුවිශේෂී ඓතිහාසික වැදගත් කමකින් යුත් විහාරස්ථානයන්ගේ ආරක්ෂාව හා සංවර්ධන කටයුතු සඳහා ත්රිවිධ හමුදාව විශේෂ දායකත්වයක් ලබාදුන් බවත් එම සිද්ධස්ථානයන්ගෙන් ආරක්ෂක අංශ ඉවත් කිරීම එම සංවර්ධන කාර්යයන් අඩාල කිරීමට හේතුවන බවද අදාළ ලිපිය මඟින් පෙන්වා දී තිබෙනවා.
ඒ හේතුවෙන් උතුරු නැගෙනහිර හා අනෙකුත් පළාත්වල සුවිශේෂී ඓතිහාසික වැදගත්කමකින් යුත් බෞද්ධ සිද්ධස්ථානවල ආරක්ෂාව සඳහා හමුදා නිලධාරීන් එම සිද්ධස්ථාන ආශ්රිතව යෙදවීම සුදුසු බවත් උතුරු නැගෙනහිර පළාත්වල විහාස්ථානවල ආශ්රිතව පවතින හමුදා කඳවුරු එම ප්රදේශවල ආරක්ෂාව සඳහා එලෙසම පවත්වා ගැනීම සුදුසු බවයි මහනාහිමිවරුන් එම ලිපිය මඟින් වැඩිදුරටත් සඳහන් කරන්නේ.
බෞද්ධ හා පාලි විශ්ව විද්යාලය වහා විවෘත කරන ලෙස බල කරමින් පවත්වන සත්යග්රහයක් අද (27) පැවැත්වෙනවා.
ඒ අනුව අත්තනෝමතිකව සිසුන් 39 දෙනෙකුට ලබා දී ඇති ශිෂ්යභාවය අහෝසි කිරීම් වහා හකුලා ගන්නා ලෙසයි ඔවුන් ඉල්ලා සිටින්නේ.
හෝමාගම ශ්රී ලංකා බෞද්ධ හා පාලි විශ්වවිද්යාලයීය පරිපාලන ගොඩනැගිල්ල ඉදිරිපිටදී මෙම සත්යග්රහය පැවැත්වෙනවා.
අනුරාධපුර ප්රදේශයේ නිවසක ඇතිවූ ගින්නකින් එකම පවුලේ මව සහ දරුවන් දෙදෙනෙකු ජීවිතක්ෂයට පත්ව තිබෙනවා.
ගින්නෙන් තුවාළ ලැබූ පියා අනුරාධපුර ශික්ෂණ රෝහලට ඇතුළත් කර ඇති බවයි පොලීසිය සඳහන් කළේ.
ඊයේ රාත්රියේ අනුරාධපුර ඇලයාපත්තුව ප්රදේශයේ නිවසක් මෙලෙස ගිනි ගැනීමට ලක්ව ඇති අතර සිද්ධිය සම්බන්ධයෙන් ඇලයාපත්තුව පොලීසිය වැඩිදුර විමර්ශන සිදුකරනවා.
75 වන නිදහස් උත්සවය සම්බන්ධයෙන් ෆේස්බුක් හරහා තර්ජනාත්මක අදහස් පළකළ පුද්ගලයෙක්ව මහරගම දී අත්අඩංගුවට ගෙන තිබෙනවා.
ෆේස්බුක් සමාජ ජාලයෙහි මහජන කැලඹීමක් ඇති වන ආකාරයෙන් නිදහස් උත්සවයට සමගාමීව විවිධ අදහස් (පෝස්ට්) පළකර ඇති බවට ලද පැමිණිල්ලක් අනුව සිදුකළ විමර්ශනවලදී සැකකරුව අත්අඩංගුවට ගත් බවයි පොලීසිය සඳහන් කළේ.
40 හැවිරිදි සැකකරු අද (27) නුගේගොඩ ගංගොඩවිල මහෙස්ත්රාත් අධිකරණයට ඉදිරිපත් කිරීමට නියමිතයි.
ජනවාරි 26 සිට පෙබරවාරි 17 දක්වා සිදු කිරීමට සැලසුම් කර ඇති කිසිදු විදුලි කප්පාදුවක් මහජන උපයෝගීතා කොමිසම විසින් අනුමත නොකරන බව එම කොමිසමේ සභාපති ජනක රත්නායක පවසනවා.
ඒ අනුව එම කාලසීමාව තුළ අඛණ්ඩ විදුලි සැපයුමක් පවත්වාගෙන යෑමට කටයුතු කරන ලෙස ලංකා විදුලිබල මණ්ඩලයට විධානයක් ලබාදී ඇති බවද ඔහු සඳහන් කළා.
ලංකා විදුලි බල මණ්ඩලය එම විධානය උල්ලංඝණය කරමින් කටයුතු කළ හොත් නීතිමය ක්රියාමාර්ග ගැනීමට කටයුතු කරන බවයි වැඩිදුරටත් සඳහන් වන්නේ.
අ.පො.ස උසස් පෙළ විභාගය පැවැත්වෙන සමයේ අඛණ්ඩ විදුලි සැපයුමක් පවත්වාගෙන යන ලෙස මහජන උපයෝගීතා කොමිෂන් සභාව විසින් ලංකා විදුලිබල මණ්ඩලයට 2023.01.26 වන දින විධානයක් ලබාදී ඇති බව එම කොමිෂන් සභාව අවධාරණය කරනවා.
විදුලිබල මණ්ඩලය අදාළ විධානය පිළිපැදීමට අපොහොසත් වන්නේ නම්, කොන්දේසි උල්ලංඝනය කිරීමක් ලෙස සලකා නීතිමය ක්රියාමාර්ග ගැනීමට කටයුතු කරන බවයි මහජන උපයෝගීතා කොමිෂන් සභාව විසින් මානව හිමිකම් කොමිෂමට ලබාදුන් ලිපියේ සඳහන් වන්නේ.
අදාළ සම්පුර්ණ ලිපිය පහතින්.
අද (26) අලුයම් කාලයේ දී දියවන්නා වැවේ මාළු ඇල්ලීමට ගිය පිරිසක් රැගත් ඔරුවක් පෙරළී යාමෙන් 18 හැවිරිදි තරුණයෙකු අතුරුදන්ව ඇති බව පොලීසිය පවසනවා.
අතුරුදන් වූ පුද්ගලයා සොයා පොලීසිය සහ නාවික හමුදා මෙහෙයුම් කටයුතු දියත් කර ඇති අතර අතර ඔරුවේ සිටි ඉතිරි පුද්ගලයින් තිදෙනා පොලිස් අත්අඩංගුවට ගෙන තිබෙනවා.
තාරුණ්යයට හෙටක් සංවිධානය සඳහා ශ්රී ලංකා විනිමය හා සුරැකුම් කොමිසමේ සභාපතිවරයා වශයෙන් කටයුතු කරන සමයේ දී රු. ලක්ෂ 50ක් ලබාදීම තුළින් රජයේ මුදල් සාපරාධී පරිහරණය කළ බවට පැවරී තිබූ නඩුවෙන් මහාචාර්ය නාලක ගොඩහේවා නිදොස් කොට නිදහස් කර තිබෙනවා.
පැමිණිල්ල විසින් විත්තිකරුවන්ට එරෙහි චෝදනා ඔප්පු කිරීම සඳහා ඉදිරිපත් කළ සාක්ෂි ප්රමාණවත් නොවන බව පවසමින් කොළඹ මහාධිකරණ විනිසුරු අමල් රණරාජා විසින් මෙම තීන්දුව ලබාදී තිබෙනවා.
ඊයේ (25) දිනයේ දී නිකුත් කරන ලද 5 වසර ශිෂ්යත්ව විභාගයේ ප්රතිඵල නැවත සමීක්ෂණය සඳහා සිසුන්ට අවශ්ය වන්නේ නම් ඒ සඳහා පෙබරවාරි 28 වනදා දක්වා කල් ලබාදී ඇති බව විභාග දෙපාර්තමේන්තුව නිවේදනය කරනවා.
