Category: business

අසාධාරණ ලෙස බදු අය කිරීම අත්හිටුවීමට මෙම සතිය තුළ පියවර නොගන්නේ නම් එළඹෙන සතියේ සිට දැඩි වෘත්තීය ක්‍රියාමාර්ගයක් ගන්නා බව වෘත්තීයවේදීන්ගේ වෘත්තීය සමිති එකමුතුව පවසනවා.

ඒ අනුව එම වෘත්තීය සමිති එකමුතුව නියෝජනය කරන රජයේ වෛද්‍ය නිලධාරීන්ගේ සංගමයේ මාධ්‍ය ප්‍රකාශක වෛද්‍ය චමිල් විජේසිංහ සඳහන් කළේ, අද (31) සාකච්ඡාවක් ඉල්ලා ජනාධිපතිවරයා වෙත ලිපියක් යොමු කරන බවයි.

මේ අතර සමස්ත ලංකා වරාය පොදු සේවක සමිතියේ ප්‍රධාන ලේකම් නිරෝෂන් ගොරකානගේ සඳහන් කළේ, සියළුම වරාය වෘත්තීය සමිති එක්වී හෙට (01) දිනයේ මේ සම්බන්ධයෙන් තීරණයක් ගන්නා බවයි.

රට තුළ වර්තමානයේ පවතින ආර්ථික අර්බුදයෙන් මිදීමට ජාත්‍යන්තර මුල්‍ය අරමුදල සිදුකරන මඟ පෙන්වීම් අනුව ක්‍රියා කරනවා හැර වෙනත් විකල්පයක් නොමැති බව මුදල් රාජ්‍ය අමාත්‍ය රංජිත් සියඹලාපිටිය පවසනවා. ඒ අනුව අද (30) පැවති මාධ්‍ය හමුවකට එක්වෙමින් රාජ්‍ය අමාත්‍යවරයා සඳහන් කළේ, මේ වසර තුළ -3.5ක ආර්ථික වර්ධනයක් බලාපොරොත්තු වන බවත්, 2024 වසරේ දී ධන ආර්ථිකයක් කරා ගමන් කළ හැකි බවයි. මේ වන විට අලුත් බදු ගැන සාකච්ඡා කළද එම බොහෝමක් බදු පෙර තිබූ ඒවා බවත් ඒවා යම් ප්‍රමාණයක් පෙර තිබූ තත්ත්වයට වඩා වැඩි බවයි රාජ්‍ය අමාත්‍යවරයා සඳහන් කළේ.

බිත්තර මිල සම්බන්ධ ගැටලුවට ආණ්ඩුව වහාම විසඳුමක් ලබාදිය යුතු බව ආපන ශාලා හිමියන්ගේ සංගමය පවසනවා.

අද (27) කොළඹ පැවති මාධ්‍ය හමුවකට එක්වෙමින් එහි සභාපති අසේල සම්පත් සඳහන් කළේ, නිදහස් සැමරුමට පෙර බිත්තර මිල සම්බන්ධ ගැටලුවට විසඳුම් ලබාදිය යුතු බවයි.

ඒ සඳහා විසඳුම් නොලැබුන හොත් කුකුළන් සහ කිකිළියන් රැගෙන නිදහස් උත්සවයට පැමිණෙන බවයි ආපන ශාලා හිමියන්ගේ සංගමය වැඩිදුරටත් සඳහන් කළේ.

රජය විසින් පනවා ඇති පුද්ගලික ආදායම් බද්දට (PAYE) එරෙහිව මහ බැංකු සේවකයින් විසින් අද (26) විරෝධතාවයක නිරත වුණා.

ඒ අනුව කළු වර්ණයෙන් සැරසුණු ශ්‍රී ලංකා මහා බැංකුවේ වෘත්තීය සමිති පහකට අයත් සේවකයන් අද උදෑසන සිට පස්වරු කාලය දක්වා සේවයෙන් ඉවත්වී මෙලෙස විරෝධතාවයේ නිරතව සිටි බවයි වාර්තා වන්නේ.

වැටුප් අර්බුදය විසඳීම සඳහා රාජ්‍ය සහ පෞද්ගලික යන දෙඅංශයේම සේවකයන්ට සතිපතා වැටුප් ගෙවිය යුතු බවට පිවිතුරු හෙළ උරුමයේ නායක පාර්ලිමේන්තු මන්ත්‍රී උදය ගම්මන්පිල යෝජනා කරනවා. මාධ්‍ය වෙත අදහස් දක්වමින් මන්ත්‍රීවරයා පෙන්වා දුන්නේ මේ මාසයේ රාජ්‍ය සේවකයින්ගේ වැටුප් ගෙවීමේ ප්‍රමාදයක් සිදුවන බවට රජය දන්වා ඇති අතර ඇතැම් පෞද්ගලික ආයතන ද මෙවැනි ගැටලුවකට මුහුණ පා සිටින බවයි. මාසික වැටුප් ලබාගැනීමේදී මාසයේ තුන්වන සතිය වන විට සේවකයන්ට මුදල් නොමැති බවත්, ඊළඟ වැටුප ලැබෙන තුරු ණය ලබා ගැනීමට සිදුවන බවත් ඔහු වැඩිදුරටත් පෙන්වා දුන්නා.

ජාත්‍යන්තර මූල්‍ය අරමුදලේ (IMF) ඉන්දියාව, ශ්‍රී ලංකාව, බංග්ලාදේශය සහ භූතානය භාර විධායක අධ්‍යක්ෂ ආචාර්ය ක්‍රිෂ්ණමුර්ති සුබ්‍රමනියම් සහ මුදල් රාජ්‍ය අමාත්‍ය ආචාර්ය රංජිත් සියඹලාපිටිය අතර විශේෂ සාකච්ඡාවක් අද (26) පැවැත්වුණා.

මෙහිදී රාජ්‍ය ආදායම සහ රටේ ජනතාව මුහුණ දී සිටින ගැටලු සම්බන්ධයෙන් සාකච්ඡා කළ බවයි අමාත්‍යවරයා නි‍වේදනයක් නිකුත් කරමින් පවසා සිටියේ.

එහිදී කළ සාකච්ඡා සාර්ථක බවත් නුදුරේ දීම IMF පළමු වාරිකය ලැබෙනු ඇති බවට විශ්වාසය පළ කරන බවයි අමාත්‍යවරයා වැඩිදුරටත් පවසා සිටියේ.

දිනකට බිත්තර මිලියන 3ක පමණ තාවකාලික හිඟයක් පවතින බව කෝප් කමිටුවේදී අනාවරණය වූ අතර මේ සඳහා කඩිනම් පිළියමක් මේ වන විට නොමැති බව වෙළඳ හා කෘෂිකර්ම අමාත්‍යාංශ නිලධාරීන් විසින් COPE කමිටුව හමුවේ දී ප්‍රකාශ කර තිබෙනවා.

එබැවින් පාරිභෝගික අවශ්‍යතාව සැලකිල්ලට ගෙන සීමිත බිත්තර ප්‍රමාණයක් වෙළඳපොළ සඳහා ආනයනය කිරීමට එකඟ වී ඇති බවයි ඔවුන් කියා සිටියේ.

පෙර පැවති COPE කමිටු රැස්වීමේදී ලබාදුන් නියෝගයට අනුව ඊයේ (25) වෙළඳ හා කෘෂිකර්ම අමාත්‍යාංශ නිලධාරීන් විසින් බිත්තරයක් නිෂ්පාදනය සඳහා යන පිරිවැය සැලකිල්ලට ගෙන බිත්තරයක මිල තීරණය කිරීම සඳහා මිල සූත්‍රයක් ඉදිරිපත් කර තිබෙනවා.

මේ පිළිබඳව සාකච්ඡා කිරීමෙන් අනතුරුව කාරක සභා සභාපති මහාචාර්ය රංජිත් බණ්ඩාර මෙම මිල සූත්‍රය ක්‍රියාත්මක කිරීමේදී ඇතිවිය හැකි විවිධ ප්‍රායෝගික ගැටළු හේතුවෙන් මෙම මිල සූත්‍රය නැවත සලකා බලන ලෙසට අදාළ නිලධාරීන්ට උපදෙස් ලබාදී තිබුණා.

එම කරුණු සැලකිල්ලට ගනිමින් මිල සූත්‍රය සංශෝධනයට පියවර ගන්නා බව පැමිණ සිටි අදාල නිලධාරින් පවසා තිබුණා.

බැංකුවල, විශ්වවිද්‍යාලවල සහ රෝහල්වල සිටින කළු ඇදගත් පිරිසගෙන් මේ රටේ වැඩිම ආදායම ලබන පිරිස කවුද යන්න පිළිබඳව ජනතාවට දැනගත හැකි බව කළු විරෝධතා සතිය පිළිබඳව අදහස් දක්වමින් ආයෝජන ප්‍රවර්ධන රාජ්‍ය අමාත්‍ය දිලුම් අමුණුගම පවසනවා.

රුපියල් ලක්ෂයකට වඩා වැඩියෙන් වැටුප් ගන්නා පුද්ගලයින්ට අයවන බදු මුදල රුපියල් 3,000 ක් බවත්, ලක්ෂ 2 සිට ඉහළට වැටුප් ගන්නා පිරිසට සැලකිය යුතු බද්දක් අය කරන බවත් අමාත්‍යවරයා පවසනවා.

පහුගිය කාලවලදී වැඩියෙන් වැටුප් ලබන අයට සහ අඩුවෙන් වැටුප් ලබන අයට පැවතියේ එකම බද්ද බවත් ඒ හේතුවෙන් අද රජයට මෙම තත්ත්වය උදාවී ඇති බවත් අමාත්‍යවරයා පවසනවා.

රජයක් පවත්වා ගන්නේ බදු ආදායම මගින් බවත්, ආදායම වැඩි අයගෙන් වැඩි බද්දක් අය කිරීම ජනාධිපතිවරයාගේ ප්‍රතිපත්තිය බවත් වැඩිදුරටත් අදහස් දක්වමින් ඔහු පැවසුවා.

දේශීය ආදායම් දෙපාර්තමේන්තුව සිය බදු ආදායම් එකතු කරගැනීමේ කාර්යක්ෂමතාවය වැඩි කිරීම සඳහා 2014 වසරේදී සාදාගත් RAMIS නම් ආදායම් බදු කළමනාකරණ මෘදුකාංග පද්ධතිය සඳහා රුපියල් බිලියන 10ක පමණ ආයෝජනයක් සිදුකර ඇති නමුත්, එය මේ වනවිට නිසි තත්ත්වයෙන් ක්‍රියාත්මක නොවන බවට තොරතුරු ලැබී ඇති බව COPA කමිටුව පවසනවා.

අදාළ මෘදුකාංග පද්ධතිය වැඩි දියුණු කිරීම වෙනුවෙන් තවත් විශාල මුදලක් මේ වන විට වැයකොට ඇතැයි තමන් විශ්වාස කරන බව පැවසූ COPA සභාපතිවරයා අවධාරණය කළේ, තව දුරටත් මේ වෙනුවෙන් මුදල් වියදම් කිරීම ප්‍රතිඵලදායකද යන්න සොයාබැලීම අත්‍යාවශ්‍ය වන බවයි.

මෙම RAMIS මෘදුකාංග පද්ධතිය පිළිබඳ ප්‍රසම්පාදනය ඇතුළු අංශ ගණනාවක් සම්බන්ධයෙන් ගැටලුකාරී තත්ත්වයන් පෙනීයන හෙයින්, මෙම පද්ධතිය රටට ගැලපෙන ආකාරයෙන් ක්‍රියාකාරී මට්ටමට පත්කිරීමේ හැකියාව විමර්ශනය කොට නිගමන ඉදිරිපත් කිරීම සඳහා COPA කමිටුව විසින් අනු කමිටු දෙකක් පිහිටුවීමටද යෝජනා වී තිබෙනවා.