Category: business

මහ බැංකුව ප්‍රතිසංස්කරණය සඳහා නව පනතක් හඳුන්වාදීමට ආණ්ඩුව සූදානම් වන බව ඩිව් ගුණසේකර පවසනවා. ජාත්‍යන්තර මූල්‍ය අරමුදලේ ණය සහනය අනුමත වීමට එම ප්‍රතිසංස්කරණ සිදු කිරීම අනිවාර්ය බවයි මාධ්‍ය වෙත අදහස් දක්වමින් ඔහු සඳහන් කළේ. විදුලි ගාස්තු සහ ඉන්ධන මිල වැඩි කිරීම ජාත්‍යන්තර මූල්‍ය අරමුදලේ යෝජනා බවත් මහ බැංකුව ප්‍රතිසංස්කරණය කිරීමට පනතක් ගෙන ඒමේ යෝජනාව කැබිනට් මණ්ඩලයේදී සඳුදා අනුමත කර ඇති බවට තොරතුරු ලැබී ඇති බවත් ඔහු සඳහන් කළා.

වත්මන් බදු ප්‍රතිපත්තිය සාමාන්‍ය බදු ප්‍රතිපත්තියක් නොව, ගලවා ගැනීමේ මෙහෙයුමක් බව ජනාධිපති රනිල් වික්‍රමසිංහ පවසනවා. ඒ අනුව මෙම ක්‍රියාවලිය කඩාකප්පල් වුවහොත් ජාත්‍යන්තර මූල්‍ය අරමුදල සමඟ වැඩසටහනට ඇතුළත්වීමට නොහැකි වන අතර ශ්‍රී ලංකාවට කිසිඳු විදෙස් රටක් සමඟ ගනුදෙනු කිරීමට අවස්ථාව ද නොලැබෙන බවයි “2023 බදු සමුළුව” ආරම්භක දේශනය සිදු කරමින් ජනාධිපතිවරයා සඳහන් කළේ. 2023 වසර සඳහා ඉදිරිපත් කළ අය වැය ද සාමාන්‍ය අය වැයක් නොව, වැටී ඇති ආර්ථිකය ගොඩනැංවීමේ මෙහෙයුමක් බවයි එහිදී ජනාධිපතිවරයා වැඩිදුරටත් සඳහන් කළේ. මේ සම්බන්ධයෙන් නිකුත් කළ නිවේදනය පහතින්.

ශ්‍රී ලංකාවේ ණය ප්‍රතිව්‍යූහගත කිරීම සඳහා චීනයේ සහාය ලබාදෙන බවට වන සහතිකය නොමැතිව වූවද ජාත්‍යන්තර මූල්‍ය අරමුදල (IMF) විසින් ණය පහසුකම ලබාදීමට අවධානය යොමුව ඇති බව රොයිටර් පුවත් සේවය වාර්තා කරනවා.

මූල්‍ය අරමුදල විසින් කලාතුරකින් භාවිත කරනු ලබන ප්‍රතිපත්තියක් යටතේ මෙම ණය පහසුකම මෙලෙස අනුමත කිරීමට සැරසෙන බව එම වාර්තාවේ දැක්වෙනවා.

කෙසේ වෙතත් ශ්‍රී ලංකාවේ බලධාරීන් විසින් චීනයේ මූල්‍ය සහතිකය ලබාගැනීම සඳහා දිගටම කටයුතු කරගෙන යනු ඇති බවයි එම වාර්තාවේ වැඩිදුරටත් සඳහන් වන්නේ.

අදාළ වාර්තා කිරීම පහතින්:
https://www.reuters.com/markets/asia/imf-mulls-loan-approval-sri-lanka-even-without-chinas-assurance-bloomberg-news-2023-02-17/

බිත්තර හිඟය සහ අවශ්‍යතාව සැළකිල්ලට ගනිමින් තාවකාලිකව බිත්තර ආනයනය කිරීමට සත්ත්ව නිෂ්පාදන හා සෞඛ්‍ය දෙපාර්තමේන්තුව අවසර ලබාදී තිබෙනවා.

ඒ අනුව එම බිත්තර, බේකරි කර්මාන්තය සඳහා පමණක් භාවිත කිරීමට නියමිත බවයි කෘෂිකර්ම අමාත්‍ය මහින්ද අමරවීර සඳහන් කළේ.

එම ආනයනික බිත්තර සාමාන්‍ය පරිභෝජනය සඳහා වෙළඳසැල් තුළ අලෙවියට අවසර නොදෙන බවයි කෘෂිකර්ම අමාත්‍යවරයා වැඩිදුරටත් සඳහන් කළේ.

ලංකා සතොස මගින් අත්‍යවශ්‍ය භාණ්ඩ 6ක මිල පහළ දැමීමට තීරණය කර තිබෙනවා.

ඒ අනුව අර්තාපල්, ලොකු ළූණු, ආනයනික සම්බා, රතු පරිප්පු ඇතුළු භාණ්ඩ කිහිපයක මිල මෙලෙස අඩුකර ඇති බවයි සඳහන් වන්නේ.

අදාළ භාණ්ඩ ලැයිස්තුව පහතින්,

ජාත්‍යන්තර මූල්‍ය අරමුදලේ ණය යෝජනා ක්‍රමය මාර්තු මාසයේ දී ක්‍රියාත්මක කිරීමට හැකිවනු ඇතැයි අපේක්ෂා කරන බව ජනාධිපති රනිල් වික්‍රමසිංහ පවසනවා.

එසේම මේ වන විට උද්ධමනය ක්‍රමිකව අඩු වීමට සාපේක්ෂව බැංකු පොළී අනුපාත අඩු කිරීම පිළිබඳවද සළකා බලන බවයි ජනාධිපතිවරයා සඳහන් කළේ.

සුළු හා මහා පරිමාණ සහල් මෝල් හිමියන් මුහුණ දී ඇති ගැටලු සහ ඒවා විසඳා ගැනීමට ගතයුතු පියවර පිළිබඳ සොයා බැලීමට ඊයේ (16) පස්වරුවේ ජනාධිපති කාර්යාලයේ පැවති සාකච්ඡාවකට එක්වෙමින් ජනාධිපතිවරයා මේ බව සඳහන් කළා.

මේ සම්බන්ධයෙන් නිකුත් කළ නිවේදනය පහතින්,

විදුලි ගාස්තු සංශෝධනය සඳහා අනුමැතිය ලබාදීම විදුලිබල පනතේ 30 වන වගන්තියට පටහැනි බව මහජන උපයෝගීතා කොමිසමේ සභාපති ජනක රත්නායක පවසනවා.

ඒ අනුව සෙසු සාමාජිකයන් මෙවැනි නීති විරෝධී තීරණයක් ගනු ලැබුවේ දේශපාලන අධිකාරියේ, ලංකා විදුලිබල මණ්ඩලයේ හා විදුලිබල අමාත්‍යංශයේ නිලධාරීන්ගේ බලපෑම්වලට යටත්ව බවයි ප්‍රකාශයක් නිකුත් කරමින් ඔහු සඳහන් කරන්නේ.

පාඩු ලබන විදුලිබල මණ්ඩලයේ අලාභය පියවා ගැනීම, ඉදිරියේදී වැඩි මිලක් ගෙවා ගල් අඟුරු සහ ඉන්ධන ලබා ගැනීම සඳහා අවශ්‍ය කටයුතු සිදු කෙරෙමින් ඇති බවයි ඔහු පෙන්වා දෙන්නේ.

මෙම ගාස්තු සංශෝධනය නීතියට පටහැනි බවත් ඉදිරියේදී අවශ්‍ය නීතිමය පියවර ගෙන මෙම අත්තනෝමතික ලෙස වැඩිකරනු ලැබූ විදුලි ගාස්තු සංශෝධනය නතර කරනු ඇතැයි බලාපොරොත්තු වන බවයි මහජන උපයෝගීතා කොමිසමේ සභාපති ජනක රත්නායක වැඩිදුරටත් සඳහන් කළේ.

රුපියල් බිලියන 287 ක අමතර ආදායමක් විදුලි බල මණ්ඩලයට ලැබෙන පරිදි 66% කින් විදුලි ගාස්තු වැඩි කිරීමට මහජන උපයෝගීතා කොමිසමේ බහුතර සාමාජිකයන්ගේ අනුමැතිය හිමිවී තිබෙනවා.

මෙම යෝජනාව සඳහා මහජන උපයෝගීතා කොමිසමේ සභාපති ජනක රත්නායක සිය විරෝධය පළකර ඇති අතර සෙසු සාමාජිකයන් තිදෙනා වන නීතීඥ චතුරිකා විජේසිංහ, ඩග්ලස් නානායක්කාර සහ එස්. ජී. සේනාරත්න එකඟතාව පළ කිරීම හේතුවෙන් එම යෝජනාව සම්මත වී ඇති බවයි සඳහන් වන්නේ.

මහජන උපදේශන හා සියලු පාර්ශවයන්ගේ යෝජනා අනුව රුපියල් බිලියන 142 ක ආදායමක් ලැබෙන පරිදි 36% ක විදුලි ගාස්තු වැඩිවීමක් මහජන උපයෝගීතා කොමිසම සකස් කර තිබූ නමුත් ඊට පක්ෂ වී ඇත්තේ කොමිසමේ සභාපති ජනක රත්නායක පමණක් බවයි සඳහන් වන්නේ.

ඒ අනුව අද (15) සිට මෙම සංශෝධනය ක්‍රියාත්මක වීමට නියමිත බවයි වාර්තා වන්නේ.

අත්‍යවශ්‍ය සහ හදිසි සෞඛ්‍ය සේවාවන් බාධාවකින් තොරව පවත්වාගෙන යාම තහවුරු කිරීම සඳහා ඩොලර් මිලියන 38ක ප්‍රදානයක් ලබාදීමට ජපන් රජය එකඟතාව පළකර තිබෙනවා.

ඒ අනුව අත්‍යවශ්‍ය සේවා සහ ප්‍රවාහන පහසුකම් තහවුරු කරමින් ශ්‍රී ලංකාවේ සෞඛ්‍ය අංශයේ සෞඛ්‍ය සේවා සැපයුම් පද්ධතිය වැඩිදියුණු කිරීම සඳහා මෙම ප්‍රදානය ලබාදී ඇති බවයි කැබිනට් තීරණ දැනුම්දීමේ මාධ්‍ය හමුවට එක්වෙමින් කැබිනට් මාධ්‍ය ප්‍රකාශක අමාත්‍ය බන්දුල ගුණවර්ධන සඳහන් කළේ.

සෞඛ්‍ය සේවාවන් බාධාවකින් තොරව පවත්වාගෙන යාම තහවුරු කිරීම සඳහා මෙම ප්‍රදානය හරහා ඉන්ධන සැපයීමට මෙම ජපාන ආර්ථික හා සමාජ සංවර්ධන වැඩසටහන යටතේ බලාපොරොත්තු වන බවයි අමාත්‍යවරයා වැඩිදුරටත් සඳහන් කළේ.

ලෝක වෙළෙඳපොළෙහි බොර තෙල් මිල අඩුවී ඇති බව විදෙස් මාධ්‍ය වාර්තා කරනවා.

ඒ අනුව අද (13) බ්‍රෙන්ට් බොර තෙල් බැරලයක මිල ඩොලර් 85.59 ක් ලෙස සටහන් වී ඇති අතර WTI බොර තෙල් බැරලයක මිල ඩොලර් 78.89 ක් ලෙසයි සටහන්වී තිබෙන්නේ.

අමෙරිකාවේ උද්ධමන දත්ත මෙලෙස බොරතෙල් මිල අඩුවීමට හේතුවී ඇති බවයි විදෙස් මාධ්‍ය වාර්තා වැඩිදුරටත් සඳහන් කරන්නේ.