Category: business

2023 වර්ෂයේ තෙවන කාර්තුවේ ස්ථාවර මිල (2015) ගණන් යටතේ රුපියල් මිලියන 2,987,544 ක් ලෙස වාර්තා වූ දළ දේශීය නිෂ්පාදිතය 2024 වර්ෂයේ තෙවන කාර්තුවේ දී රුපියල් මිලියන 3,151,941 ක් දක්වා ඉහළ ගොස් ඇති බව ජන හා සංඛ්‍යාලේඛණ දෙපාර්තමේන්තුව පවසනවා.

ඒ අනුව 2024 වර්ෂයේ තෙවන කාර්තුවේ දළ දේශීය නිෂ්පාදිතයේ වර්ධනය 5.5%  ක ධනාත්මක වර්ධනයක් ලෙස වාර්තා වී ඇති බවයි එම දෙපාර්තමේන්තුව සඳහන් කළේ.

2024 වර්ෂයේ තෙවන කාර්තුවේ දී කෘෂිකාර්මික ආර්ථික කටයුතු, කර්මාන්ත ආර්ථික කටයුතු හා සේවා ආර්ථික කටයුතු පිළිවෙලින් 3.0% ක් හා 10.8% ක් සහ 2.6% ක් වශයෙන් ධන වර්ධනයන් වාර්තා කර ඇති බවයි වැඩිදුරටත් සඳහන් වෙන්නේ.

කොළඹ කොටස් වෙළෙඳපොළ සියලු කොටස් මිල දර්ශකය අද (16) නැවත වතාවක් වාර්තාවක් පිහිටුවීමට සමත්ව තිබෙනවා.

ඒ අනුව කොළඹ කොටස් වෙළෙඳපොළෙහි සියලු කොටස් මිල දර්ශකය ඉතිහාසයේ ප්‍රථමවරට අද (16) ඒකක 14,500 සීමාව ඉක්මවා ගොස් තිබෙනවා.

ඒ අනුව අද දිනය නිමාවන විට ඒකක 295 කින් සියලු කොටස් මිල දර්ශකයේ අගය ඉහළ ගොස්, එහි අගය ඒකක 14,500.44 ක් ලෙස සටහන් වී තිබුණා.

එසේම අද දිනයේ පිරිවැටුම රුපියල් බිලියන 8.27 ක් බවයි වැඩිදුරටත් සඳහන් වෙන්නේ.

කොළඹ කොටස් වෙළෙඳපොළේ සියලු කොටස් මිල දර්ශකය (ASPI) එහි ඉතිහාසයේ වාර්තා වූ ඉහළම අගය අද (04) දිනයේදී වාර්තා කරනු ලැබුවා.

ඒ අනුව එම අගය ඒකක 171.69 කින් ඉහළ ගොස්, 13,511.73 ක් ලෙස දැක්වුනු අතර, මුළු පිරිවැටුම රු. බිලියන 5.2 යි ලෙසයි සඳහන් වන්නේ.

2022 ජනවාරි 19 වැනි දින පිහිටුවා තිබූ පෙර වාර්තාව අභිබවා යමින් මෙම නව අගය වාර්තා වී තිබෙනවා.

ලංකා ඛනිජ තෙල් නීතිගත සංස්ථාවට අයත් ඉන්ධනවල මිල අද (30) මධ්‍යම රාත්‍රියේ සිට ක්‍රියාත්මක වන පරිදි සංශෝධනය කර තිබෙනවා.

ඒ අනුව අඩු වූ මිල සහ නව මිල පහතින්.

* පෙට්‍රල් 92 – රු. 02 කින් (නව මිල රු.309)

වැඩි වූ මිල සහ නව මිල පහතින්.

* ඔටෝ ඩීසල් – රු. 03 කින් (නව මිල රු.286)

* භූමිතෙල් – රු. 05 කින් ( නව මිල රු.188)

මිල නොවෙනස් වන ඉන්ධන වර්ග:

* පෙට්‍රල් 95 – ( මිල රු.371)

* සුපර් ඩීසල් – ( මිල රු.313)

උපයන විට ගෙවීමේ බද්ද (PAYE Tax) හි අනිවාර්යය සංශෝධනයක් ඉදිරි අයවැය මඟින් සිදුකරන බව ජනාධිපති අනුර කුමාර දිසානායක පවසනවා. එය යහපත් සංශෝධනයක් වනු ඇති බවයි ඔහු ප්‍රකාශ කරන්නේ.

එසේම ඇතැම් භාණ්ඩ කිහිපයක වැට් බදු ඉවත් කිරීමටත්, ඉලක්ක සහගත පිරිසකට සහනාධාර ලබාදීමටත් ඉදිරි අයවැය තුළින් කටයුතු කරන බවයි ඊයේ (06) පැවති රූපවාහිනී වැඩසටහනකට එක්වෙමින් ජනාධිපතිවරයා සඳහන් කළේ.

එමෙන්ම ඔවුන්ගේ සැලසුම් අනුව PAYE Tax අයකරන වැටුප් තලයන්හි අඩු වැටුප් තලයන් වල සිටින අයට වැඩි සහනයක් ලැබෙනු ඇති බවයි ඔහු වැඩිදුරටත් පවසා සිටියේ.

ලංකා ඛනිජ තෙල් නීතිගත සංස්ථාවට අයත් ඉන්ධනවල මිල අද (31) මධ්‍යම රාත්‍රියේ සිට ක්‍රියාත්මක වන පරිදි සංශෝධනය කර තිබෙනවා.

ඒ අනුව අඩු වූ මිල සහ නව මිල පහතින්.

* පෙට්‍රල් 95 – රු. 06 කින් (නව මිල රු.371)

* සුපර් ඩීසල් – රු. 06 කින් ( මිල රු.313)

මිල නොවෙනස් වන ඉන්ධන වර්ග:

* පෙට්‍රල් 92 – (මිල රු.311)

* ඔටෝ ඩීසල් –  (මිල රු.283)

* භූමිතෙල් (මිල රු.183)

ශ්‍රී ලංකා මහ බැංකුවේ දෛනික විනිමය අනුපාතික සටහනට අනුව අද (08) දිනයේ රුපියලට සාපේක්‍ෂව අමෙරිකානු ඩොලරයේ අගය පහළගොස් තිබෙනවා.

ඒ අනුව අද දින අමෙරිකානු ඩොලරයේ ගැණුම් මිල රුපියල් 288.96 ක් හා විකුණුම් මිල 298.03 ක් ලෙසයි දැක් වුණේ.