Author: Supun

දුම්රිය ආසන වෙන්කර ගැනීමේ තොරතුරු ඩිජිටල් ක්‍රමවේදයකට ලබාගැනීමේ පහසුකමක් රටවටා දුම්රිය මඟින්ගේ ෆේස්බුක් සමූහය විසින් හඳුන්වා දී තිබෙනවා.

ඔවුන් විසින් හඳුන්වා දුන් RDMNS ඇප් එක හරහා මෙම නව පහසුකම සපයා ඇති අතර ඒ හරහා මෙරට සියලු දුම්රිය සේවාවන්ගේ ප්‍රවේශපත් ගාස්තු, ආසන වර්ග, ආසන අංක සහ දුම්රිය ආසන වෙන් කරගැනීමේ උපදෙස් ලබාගැනීමේ හැකියාව පවතිනවා.

ආසන වෙන් කරගැනීමට පෙර මේ හරහා දුම්රිය මැදිරි තුළට ඩිජිටල්ව පිවිස එම මැදිරි නැරඹීමට හැකි වීමද විශේෂත්වයක්.

මේ මොහොත වන විට ශ්‍රී ලංකාවේ නිවාස ලක්ෂ හයක පමණ විදුලිය විසන්ධි කර ඇති බව පාර්ලිමේන්තු මන්ත්‍රී එස්.එම්. මරික්කාර් පවසනවා.

විදුලි ගාස්තු ජනතාවට ගෙවීමට හැකිදැයි ගැටලුවක් පවතින බවත්, ජනතාවගේ ආදායම් මාර්ග ඉහළ යාමක් සිදුවී නොමැති බවයි අද (24) අයවැය විවාදයට එක්වෙමින් මන්ත්‍රීවරයා සඳහන් කළේ.

විදුලිබල මණ්ඩලයට විශාල නිෂ්පාදන වියදමක් දැරීමට සිදුව ඇත්තේ, විදුලිබල මණ්ඩලය හරහා සිදුවන වංචා දූෂණ නාස්තිය නිසා බවයි ඔහු වැඩිදුරටත් සඳහන් කළේ.

උසස් පෙළ නැවත සමීක්ෂණ ප්‍රතිඵල නිකුත් කර ඇති බව විභාග දෙපාර්තමේන්තුව පවසනවා.

ඒ අනුව එම ප්‍රතිඵල www.doenets.lk සහ results.exams.gov.lk වෙබ් අඩවි වෙත පිවිස ලබාගත හැකි බවයි එම දෙපාර්තමේන්තුව වැඩිදුරටත් සඳහන් කළේ.

අදළ නිවේදනය පහතින්,

ඔස්ට්‍රේලියානු කාන්තාවකට ලිංගික අතවර කළ බවට එල්ල වූ චෝදනාවෙන් නිදහස් කළ ශ්‍රී ලංකා ක්‍රිකට් ක්‍රීඩක ධනුෂ්ක ගුණතිලකට එරෙහිව එරට පොලීසිය අසාධාරණ ලෙස කටයුතු කර ඇති බව තීන්දු කර තිබෙනවා.

ඒ අනුව ඔහුගේ නඩු ගාස්තු ඔහුට ලබා ගැනීමට හැකි වන පරිදි සහතිකයක් නිකුත් කරන ලෙසද විනිසුරුවරිය නියෝග කර ඇති බවයි විදෙස් මාධ්‍ය වාර්තා කරන්නේ.

වියදම්වලට අදාළ නඩු කටයුත්ත අද (24) කැඳවූ අවස්ථාවේදී රජයේ පාර්ශ්වය පැවරූ එම නඩුව සම්බන්ධයෙන් සැලකිය යුතු ගැටලු තිබූ බවට පෙන්වාදී තිබෙනවා.

ඔස්ට්‍රේලියානු තරුණියකට ඇයගේ නිවසේදී අතවර කළ බවට ගුණතිලකට එරෙහිව චෝදනා එල්ල වී තිබූ අතර නඩු විභාගයකින් අනතුරුව ඔහු පසුගිය සැප්තැම්බර් මාසයේදී චෝදනාවෙන් නිදොස් කොට නිදහස් කෙරුණා.

ශ්‍රී ලංකා ක්‍රිකට් අතුරු කමිටුව පත් කිරීමට එරෙහි නඩුව වැඩිදුර සලකා බැලීම සඳහා සඳුදා (27) දිනය දක්වා කල් තබා තිබෙනවා.

ඒ අනුව අදාළ පෙත්සම් අද (24) යළි කැඳවූ අවස්ථාවේදී කරුණු සලකා බැලීමෙන් අනතුරුව අභියාචනාධිකරණ විනිසුරු මඬුල්ල මෙලෙස නියෝග කර ඇති බවයි සඳහන් වන්නේ.

ශ්‍රී ලංකා ක්‍රිකට් ආයතනයේ මෙහෙයුම් කටයුතු සඳහා අතුරු පාලක කමිටුවක් පත්කිරීමට ක්‍රීඩා අමාත්‍යවරයා ගත් තීරණය අභියෝගයට ලක්කරමින් ශ්‍රී ලංකා ක්‍රිකට් ආයතනයේ සභාපති ශම්මි සිල්වා විසින් මෙම පෙත්සම ගොනුකර තිබෙනවා.

උඩරට දුම්රිය මාර්ගයේ ධාවන කටයුතු යථා තත්ත්වයට පත් කර, බදුල්ල දක්වා දුම්රිය ගමන් ආරම්භ කර ඇති බව දුම්රිය දෙපාර්තමේන්තුව පවසනවා.

අයහපත් කාලගුණ තත්ත්වය හේතුවෙන් ඇතිවූ අධික වැස්සත් සමග උඩරට දුම්රිය මාර්ගයට ගස් සහ පස් කඳු කඩාවැටී දුම්රිය ධාවනයට බාධා සිදුවී තිබුණු අතර, මේ හේතුවෙන් බදුල්ල දක්වා ධාවනය වන දුම්රිය නානුඔය දක්වා සීමා කිරිමට කටයුතු කර තිබුණා.

මේ වසරේ ජනවාරි සිට නොවැම්බර් 20 දක්වා සිදුකළ වැටලීම්වලින් රුපියල් කෝටි 24 ක දඩ මුදල් අය කරගැනීමට හැකිවූ බව පාරිහෝගික කටයුතු අධිකාරිය පවසනවා.

වැටලීම් 22,000 ක් සිදුකර ඇති බවත්, ඒ අතරින් සහල් වැටලීම් 3,151 ක් සහ සීනි වැටලීම් 510 ක් පමණ සිදුකර ඇති බවද එම අධිකාරිය සඳහන් කළා.

මෙම උත්සව සමයේ පාරිභෝගික ජනතාව මිලදී ගන්නා භාණ්ඩ සහ ආහාරවල සුරක්ෂිතතාව උදෙසා සියලුම දිස්ත්‍රික්ක ආවරණය වන පරිදි වැටලීම් සහ විමර්ශන වැඩි කිරීමට කටයුතු යොදා ඇති බවයි එම අධිකාරිය වැඩිදුරටත් සඳහන් කළේ.