Category: news_sub

කතරගම, නාගහවීදීය යාල වන උද්‍යානයට ආසන්න ප්‍රදේශයක දීර්ඝ කාලයක සිට එළිමහනේ ගසක හා කොන්ක්‍රීට් කනුවක ගැටගසා සිටි ළමුන් දෙදෙනෙකු සොයාගෙන තිබේ.

රුහුණු මාගම් පත්තුවේ ප්‍රධාන අධිකරණ සංඝනායක ශාස්ත්‍රපති පූජ්‍ය කපුගම සරණතිස්ස හිමියන්ට ලැබුණු තොරතුරක් මත කතරගම පොලීසිය සමඟ එක්ව එම ප්‍රදේශය වෙත ගොස් මෙම ළමුන් දෙදෙනා සොයාගෙන ඇති බව අද දෙරණ වාර්තාකරු පැවසුවේය.

වයස අවුරුදු 9 ක් පමණ වන පිරිමි දරුවා කොන්ක්‍රීට් කණුවක ගැටගසා තිබී ඇති අතර වයස අවුරුදු 17 ක් පමණ වන ගැහැණු දරුවාගේ අත් ගසක ගැටගසා තිබූ බව සඳහන්වේ.

මෙම දරුවන්ගේ පියා මියගොස් ඇති බවත් මව තවත් ආබාධිත දරුවෙකු සමඟ කතරගම පූජා භූමියේ සිගමන් යදිමින් සිටින බවත් අනාවරණය වී තිබේ.

ප්‍රදේශවාසීන් ප්‍රකාශ කර ඇත්තේ වසර ගණනාවක් පුරා මෙම දරුවන් දෙදෙනා මෙලෙස ගැට ගසා මව අනෙක් දරුවා සමඟ  සිගමන් යැදීමට යන බවය.

සෑම දිනකම පස්වරුවේ බීමතින් පැමිණෙන මව දරුවන්ට පහර දෙන බව ද ප්‍රදේශවාසීන් ප්‍රකාශ කර තිබේ.

සිද්ධියට අදාළ මව  සහ දරුවන් තිදෙනා ද පොලීසිය වෙත රැගෙන ගිය බව දේශීය මාධ්‍ය වාර්තාවලින් අනාවරණය විය.

එජාප කටාන ආසන සංවිධායිකා, බස්නාහිර පළාත් මන්ත්‍රීනි රෝස් ප්‍රනාන්දු මෙනවිය ඇය විසින් දරනු ලබන සියලුම පක්ෂ තනතුරුවලින් ඉල්ලා අස්වී තිබේ.

ඒ බැව් සඳහන් ලිපියක් තමන් විසින් අග්‍රාමාත්‍ය රනිල් වික්‍රමසිංහ මහතා වෙත හා පක්ෂ මූලස්ථානය වෙත යොමු කොට ඇතැයි ඇය අද (19) කාටාන එජාප කාර්යාලයේ පැවති පුවත්පත් සාකච්ඡාවකදී සඳහන් කළාය.

කටුනායක ජාත්‍යන්තර ගුවන්තොටුපළෙන් මෙරටට පැමිණෙන ගුවන් මගීන්ට කුලී රථ සේවා පහසුකම් සැපයීමේ කවුළුවක් අධිකරණ නියෝග මත නීත්‍යනුකූල ටෙන්ඩරයක් මගින් ලබාදී තිබියදී එයට පරිබාහිරව සංචාරක බලපත්‍ර නිකුත් කිරීම සඳහා ක්‍රිස්තියානි කටයුතු හා සංචාරක අමාත්‍ය ජෝන් අමරතුංග මහතාගේ අධාරකරුවන්ටද කුලී වාහන බලපත් දෙන තත්ත්වයක් උදාවී ඇති බව ඇය කියා සිටියි.

මෙම කාරණයට අදාළව ජෝන් අමරතුංග මහතා හා තමන් අතර මත ගැටුමක් නිර්මාණයවූ බවත්, ඇමතිවරයාගේ මෙම යහපාලන විරෝධී ක්‍රියාව නිසා තමන් මෙසේ ඉල්ලා අස්වීමට තීරණය කළ බව රෝස් ප්‍රනාන්දු මෙනවිය අවධාරණය කළාය.

ජනාධිපතිවරයා හා අග්‍රාමාත්‍යවරයා මැදිහත්වී මෙවන් යහපාලන විරෝධී ක්‍රියාවන් වහා නැවැත්විය යුතුව ඇති බවත්, තමන් කිසිවෙකුටත් ණය හෝ බය නැති බවත් ඇය කියා සිටියාය.

මීතොටමුල්ල කුණු කන්ද නායයෑම පිළිබඳ විමසා බැලීම සඳහා ජපානයේ විශේෂ තාක්ෂණික කණ්ඩායමක් කඩිනමින් ශ්‍රී ලංකාවට යොමුකිරීමට ජපාන රජය තීරණය කර තිබේ.

ඔවුන් විසින් ඊට අදාළව ඉදිරි සැලසුම් සිදුවිය යුතු ආකාරය පිළිබඳ උපදෙස් ලබාදීමට නියමිත බව සඳහන්ය.

මීතොටමුල්ල කුණු කන්ද නායයෑමෙන් මියගිය පුද්ගලයින් සහ පීඩාවට පත් පුද්ගලයින් සම්බන්ධයෙන් ශෝකය පළ කරමින් ජපාන අග්‍රමාත්‍ය  ෂින් ෂෝ අබේ මේ බව දැනුම් දී තිබේ.

අග්‍රමාත්‍ය රනිල් වික්‍රමසිංහ මහතා වෙත විශේෂ පණිවිඩයක් යොමුකරමින් ජපාන අග්‍රමාත්‍යවරයා ප්‍රකාශ කර ඇත්තේ මෙම අවසනාවන්ත සිදුවීම පිළිබඳ ජපාන රජය සහ ජනතාව බලවත් කණගාටුව පළ කරන බවයි.

විපතට පත් ජනතාවට යළි සිය සාමාන්‍ය ජීවන තත්ත්වය උදාකර ගැනීම සඳහා ජපාන රජයේ පූර්ණ සහය ලබාදෙන බව ද ජපාන අග්‍රමාත්‍යවරයා සිය පණිවිඩයෙන් දැනුම් දී ඇති බව අග්‍රමාත්‍ය කාර්යාලය සඳහන් කළේය.

මීතොටමුල්ල කුණ කන්ද නාය යාමෙන් පසු කොළඹ නගරයේ එකතුවන කුණු බැහැර කිරීමට ස්ථානයක් ලබාදෙන ලෙසට කොළඹ මහ නගර සභාව කැස්බෑව මහේස්ත්‍රාත් අධිකරණයෙන් ඉල්ලීක් කර තිබේ.

ඒ අනුව ඊයේ (අප්‍රේල් 17)  සිට එළඹෙන 28 වනදා දක්වා දිනකට මෙට්‍රික්
ටොන් 350 බැගින් කැස්බෑව කරදියාන කසල අංගනයට බැහැර කිරීමට කැස්බෑව
මහේස්ත්‍රාත් අධිකරණය කොළඹ මහ නගර සභාවට අවසර දී  ඇත.

කොළඹ මහ නගර සභාව අධිකරණයෙන් කළ ඉල්ලීම අනව  එම කසල බාරගන්නා ලෙස කැස්බෑව මහේස්ත්‍රාත් අධිකරණය  අපද්‍රව්‍ය කළමනාකරණ අධිකාරියේ අධ්‍යක්ෂවරයාට නියෝග කර තිබේ.

කරදියාන අපද්‍රව්‍ය කළමණාකරණ අංශයේ සභාපතිනිය  මේ සදහා අවශ්‍ය පහසුකම් ලබාදීමට එකගතාවය කලකඑ තිබෙන අතර පිළියන්දල කරදියාන කසල අංගනයට මේ වන විට පොලිස් ආරක්ෂාව ලබාදීමටද කටයුතු කර තිබේ

සිංහල හින්දු අලුත් අවුරුදු උත්කර්ශයේ උණුසුම ශ්‍රී ලාංකික සිත්සතන්වලින් බැහැර කළ නොහැකි නමුත් මීතොටමුල්ලේ සිදු වූ අනපේක්ෂීත ව්‍යසනයේ කම්පනය හා සංවේදීතාවය ගැඹුරින් වටහාගෙන ඊට උපරිම දායකත්වය ලබා දෙමින් ආපාදා සහන ක්‍රියාවලියට මැදිහත් වන ලෙස රජය මාධ්‍ය ආයතන ඇතුළු සියළුම පාර්ශව වලින් ඉල්ලා සිටී.

එමෙන්ම පිළිගත් මූලාශ්‍ර පමණක් උපුටා දක්වමින් නිවැරදි තොරතුරු පමණක් වාර්තා කරන ලෙසද රජය සියළු ජනමාධ්‍ය ආයතන වලින් ඉල්ලා සිටී.

මීතොටමුල්ලේ අද පවත්නා තත්ත්වය පිළිබඳ නිරීක්ෂණය කොට ඒ සම්බන්ධයෙන් සාකච්ඡා කර මිය ගිය පිරිස් හා තුවාල වූවන් සම්බන්ධයෙන් ඉදිරි ක්‍රියා මාර්ග ගන්නා බව ආපදා කළමනාකරණ අමාත්‍ය අනුර ප්‍රියදර්ශන යාපා මහතා පවසයි.

විපතට පත්වූ අය රඳවා ගැනීමට මේවන විට කඳවුරක් ස්ථාපිත කර ඇති බවත්, අවශ්‍ය ආහාර පාන රජය සහ පරිත්‍යාගශීලින්ගෙන් ලබාගෙන පහසුකම් සලසන බව අමාත්‍යවරයා අද දෙරණ කළ විමසුමකට ප්‍රතිචාර දක්වමින් කියා සිටියේය.

මෙවැනි අවස්ථාවක චක්‍රලේඛ හෝ වෙනත් කරුණු මත රැඳෙන්නට නොහැකි බවත්, ඒ නිසා දැනට කළ යුතු දේ ගැන තමන් අමාත්‍යංශ නිලධාරීන්ට උපදෙස් ලබාදී ඇති බවත්, ජනාධිපතිවරයාත් ඒ සම්බන්ධයෙන් ක්‍රියාතමක වන ලෙස උපදෙස් ලබාදී ඇති බවත් ඔහු සඳහන් කළේය.

අවතැන් වූවන් 80 ක පමණ පිරිසක් සිටින බවත්, උපරිම වශයෙන් 200ක් පමණ වෙතැයි උපකල්පනය කරන බවත්, ප්‍රමාණය කොපමණ වුණත් අවශ්‍ය උපරිම පහසුකම් සලසන බවත් ප්‍රියදර්ශන මහතා සඳහන් කළේය.

මෙම කුණු කන්ද සම්බන්ධයෙන් දීර්ඝ කාලීනව කතා කර ඇති මුත්, නිශ්චිත විසඳුමක් අවශ්‍යව ඇති බව ඔහු පැහැදිලි කළේය.

සනීපාරක්ෂක කසළ රඳවනයක් ස්ථාපිත කිරීම ඒ සඳහා වන එක් විසඳුමක් බවත්, ඒකට කොරියාවේ ආධාර අරන් දොම්පෙ ප්‍රදේශයේ එවැන්නක් ස්ථාපිත කර ඇති බවත්, දැනට එහි රඳවන්නේ එම පළාතේ කසළ පමණක් බවත් අමාත්‍යවරයා සිහිපත්  කළේය.

කෙසේ වෙතත් එවැනි කසළ රඳවන 5ක් රට පුරා හදන්න ඒ කාලයේ යෝජනා වුණත් එය ක්‍රියාත්මක නොවුණු බවත්, එසේ වූයේ මන්දැයි තමන් නොදන්නා බවත් අමාත්‍යවරයා අවධාරණය කළේය.

එමෙන්ම තවත් විසඳුමක් ලෙස කුණු දහනය කිරීමේ වැඩපිළිවෙළකට යා හැකි බවත්, ඒ සඳහා විශාල වියදමක්  දැරිය යුතු බවත්, ඒ මුදලට සාමාන්‍ය ජනතාවත් යම් ගෙවීමක් කළ යුතුව ඇති බවත්, ඒ සඳහා දැනට එක්තරා සමාගමක් සමග එම කටයුත්ත ක්‍රියාත්මක කිරීමට කැබිනට් අනුමැතිය ලැබී ඇති බවත් ඔහු වැඩිදුරටත් පෙන්වා දුන්නේය.

මීතොටමුල්ල කුණු කන්දේ කොටසක් කඩා වැටීමෙන් මිය ගිය සංඛ්‍යාව 16 දෙනෙකු දක්වා ඉහළ ගොස් තිබේ.

මියගිය පිරිස අතර ළමුන් 05 දෙනෙකු ද වන බව යුද හමුදා මාධ්‍ය ප්‍රකාශක බ්‍රිගේඩියර් රොෂාන් සෙනෙවිරත්න මහතා පැවසුවේය.

ඒ අනුව මියගිය පිරිස අතර වන කාන්තාවන්ගේ සංඛ්‍යාව 07 ක් දක්වා ඉහළ ගොස් තිබේ.

මේ අතර සිද්ධියෙන් තුවාල ලැබූවන් 12 දෙනෙකුද කොළඹ ජාතික රෝහලේ නේවාසිකව ප්‍රතිකාර ලබන බව  පොලීසිය සඳහන් ක‍ළේය.

ඊයේ පස්වරුවේ මීතොටමුල්ලේ කුණු කන්දේ කොටසක් කඩා වැටීමෙන් නිවාස 145කට පමණ හානි සිදුව ඇති බව පොලීසිය පවසයි.

පවුල් 180ට අයත් පුද්ගලයින් 625 දෙනෙකු අවතැන්වී ඇති අතර ඔවුන් කොලොන්නාව ටෙරන්ස් ද සිල්වා  පාසලේ සහ අවට ප්‍රජාශාලාවල රැදී සිටින බව පොලීසිය පවසයි.

ඇති වූ හදිසි ආපදා තත්ත්වය හේතුවෙන් අවතැන් වූ ජනතාවට අවශ්‍ය පහසුකම් සැලසීමට මේ වන විටත් කඩිනම් පියවර ගෙන ඇති බව ආපදා කළමනාකරණ අමාත්‍ය  අනුර ප්‍රියදර්ශන යාපා මහතා ප්‍රකාශ කළේය.

මේ අතර කසළ කළමනාකරණය සම්බන්ධයෙන් වන ගැටළුවට නිශ්චිත විසඳුමක් ලබාදීමේ අවශ්‍යතාව පවතින බව ද අනුර ප්‍රියදර්ශන යාපා අමාත්‍යවරයා වැඩිදුරටත් පවසයි.

මේ අතර නීතිය, සාමය හා දක්ෂිණ සංවර්ධන අමාත්‍ය සාගල රත්නායක මහතා  අද උදෑසන මීතොටමුල්ල ප්‍රදේශයේ නිරීක්ෂණ සංචාරයක නිරත වුණි.