හිටපු අමාත්ය කෙහෙළිය රඹුක්වැල්ල, ඔහුගේ බිරිඳ සහ දියණිය, ඇප කොන්දේසි සපුරාලීමෙන් අනතුරුව මුදා හැරීමට කොළඹ මහේස්ත්රාත් අධිකරණය අද (19) නියම කර තිබෙනවා.
මුදල් විශුද්ධිකරණය වැළැක්වීමේ පනත යටතේ අත්අඩංගුවට ගෙන ඇප මත මුදා හැරීමෙන් අනතුරුව, ඇප කොන්දේසි සපුරාලීමට නොහැකිවීම හේතුවෙන් ඊයේ දිනයේ ඔවුන් නැවත රක්ෂිත බන්ධනාගාරගත කර තිබුණා.
ගැටලු කිහිපයක් මුල් කර ගනිමින්, අද (19) මධ්යම රාත්රියේ සිට ක්රියාත්මක කිරීමට නියමිතව තිබූ දුම්රිය නියාමකවරුන්ගේ වැඩ වර්ජනය සති දෙකක කාලයක් සඳහා කල්දමා තිබෙනවා.
ඒ අනුව අද (19) දුම්රිය නියාමකවරුන් හා බලධාරීන් සමඟ පැවති සාකච්ඡාවකින් අනතුරුව මෙම තීරණය ගෙන ඇති බවයි සඳහන් වෙන්නේ.
ඉරානය තුළ වර්තමානයේ පවතින ගැටුම්කාරී තත්ත්වය සැලකිල්ලට ගනිමින්, ටෙහෙරානයේ ශ්රී ලංකා තානාපති කාර්යාලය තාවකාලිකව වෙනත් ස්ථානයක ස්ථානගත කිරීමට කටයුතු කර තිබෙනවා.
ඒ අනුව Amini Villa, Kohestan Alley, Imam Khomeini Street, Owlom, Masal, Rasht යන ලිපිනයේ තානාපති කාර්යාලය තාවකාලික ස්ථාපිත කර ඇති බවයි සඳහන් වෙන්නේ.
එසේම දුරකථන අංක +98 939 205 5161 / +98 991 205 7522 / +98 936 636 0260 හා slembiran@yahoo.com යන විද්යුත් තැපැල් ලිපිනය ඔස්සේ ඉරානයෙන් පිටවීමට අපේක්ෂා කරන හෝ සහාය අවැසි ඕනෑම අයෙකුට තානාපති කාර්යාලය හා සම්බන්ධ විය හැකි බවයි සඳහන් වෙන්නේ.
මත්තල රාජපක්ෂ ජාත්යන්තර ගුවන්තොටුපොළ වටා ඉදිකර ඇති ආරක්ෂිත වැට සම්බන්ධව පවත්නා ගැටලු සාකච්ඡා කිරීම සඳහා ආරක්ෂක ලේකම් එයාර් වයිස් මාර්ෂල් (විශ්රාමික) සම්පත් තුයියකොන්තාගේ ප්රධානත්වයෙන් රැස්වීමක් පවත්වා තිබෙනවා.
වන අලින්ගෙන් ගුවන්තොටුපොළ ආරක්ෂිත වැටට නිරන්තරයෙන් සිදුවන හානි සහ එම හානි වළක්වා ගැනීමට ගත යුතු ඉදිරි පියවර සම්බන්ධයෙන් එහිදී අවධානය යොමුව ඇති බවයි සඳහන් වෙන්නේ.
ගුවන්තොටුපොළ මෙහෙයුම් සහ මහජන ආරක්ෂාව යන දෙඅංශයටම ඇති විය හැකි තර්ජනය හඳුනා ගනිමින්, ගැටලු විසඳලීමට අවශ්ය කඩිනම් පියවර ගන්නා ලෙස එහිදී ආරක්ෂක ලේකම්වරයා විසින් ත්රිවිධ හමුදාව ඇතුළු අදාළ සියලුම පාර්ශ්වකරුවන්ට උපදෙස් ලබාදී තිබෙනවා.
මෙම සාකච්ඡාව සඳහා සිවිල් ආරක්ෂක දෙපාර්තමේන්තුව, වනජීවී සංරක්ෂණ දෙපාර්තමේන්තුව, ගුවන්තොටුපොළ සහ ගුවන් සේවා (ශ්රී ලංකා) පුද්ගලික සමාගම සමඟ ත්රිවිධ හමුදා ජ්යෙෂ්ඨ නිලධාරින් හා ආරක්ෂක අමාත්යාංශයේ ජ්යෙෂ්ඨ නිලධාරීන් ද සහභාගී වී ඇති බවයි වැඩිදුරටත් දැක්වෙන්නේ.
සබරගමුව විශ්ව විද්යාලයේ තාක්ෂණ පීඨයේ දෙවන වසරේ සිසුවෙකු වූ චරිත් දිල්ෂාන් බරපතල නවක වධ සිද්ධියකට මුහුණ පා සියදිවි නසා ගැනීමේ සිද්ධිය සම්බන්ධයෙන් ශ්රී ලංකා නීතීඥ සංගමය විසින් ගොනුකළ මූලික අයිතිවාසිකම් පෙත්සම සලකා බැලීම සඳහා ජූලි 18 වැනිදා කැඳවන ලෙස ශ්රේෂ්ඨාධිකරණය අද (18) නියෝග කර තිබෙනවා.
අදාළ සිසුවා බරපතල නවක වධ සිද්ධියකට මුහුණ පා සියදිවි නසා ගැනීමේ සිද්ධිය තුළින් මූලික මිනිස් අයිතිවාසිකම් උල්ලංඝනය වී ඇති බවට තීන්දුවක් ලබාදෙන ලෙසයි නීතීඥ සංගමය ඉල්ලා සිටින්නේ.
ශ්රී ලංකා නීතීඥ සංගමයේ සභාපති නීතීඥ රජීව් අමරසූරිය, එහි ලේකම් චතුර ගල්හේන යන අය විසින් මෙම පෙත්සම් ඉදිරිපත් කර තිබෙනවා.
එහි වග උත්තරකරුවන් ලෙස සබරගමුව විශ්ව විද්යාලය, එහි උප කුලපතිවරයා ඇතුළු පාලක සභාවේ සාමාජිකයින්, උසස් අමාත්යාංශයේ ලේකම්, ආරක්ෂක ලේකම්, පොලිස්පති, වැඩබලන පොලිස්පති, අපරාධ පරීක්ෂණ දෙපාර්තමේන්තුවේ ස්ථානාධිපතිවරයා, නීතිපතිවරයා ඇතුළු 69 දෙනෙකු නම් කර ඇති බවයි වැඩිදුරටත් සඳහන් වන්නේ.
අයහපත් දේ වළක්වා ගැනීමට පොරබැඳීම මෙන්ම යහපත් දේ නිර්මාණය කිරීමට දායකවීම රාජ්ය නිලධාරින්ගේ වගකීම බවත්, එහිදී මුදල් අමාත්යාංශයේ ලේකම් මහින්ද සිරිවර්ධන රටට මහඟු ආදර්ශයක් සැපයූ බවත් ජනාධිපති අනුර කුමාර දිසානායක පවසනවා.
එසේම, පසුගිය ආර්ථික අර්බුදයෙන් පසු ඇතිවූ පරිවර්තනීය යුගයේදී ඉතා සුමට ලෙස මෙරට ආර්ථිකය හසුරවමින්, රටට ආර්ථික ජයග්රහණ අත්කර දීමට එතුමා ලබා දුන් සුවිශේෂී දායකත්වය සහ කැපවීම අගය කළ ජනාධිපතිවරයා ඒ වෙනුවෙන් සිය කෘතඥතාව ඔහුට පිරිනැමූ බවයි ජනාධිපති මාධ්ය අංශය සඳහන් කළේ.
මුදල් අමාත්යාංශයේ ලේකම් මහින්ද සිරිවර්ධන මහතා ධුරයෙන් විශ්රාම යාම වෙනුවෙන්, අද (18) පෙරවරුවේ ජනාධිපති කාර්යාලයේදී සංවිධානය කර තිබූ උත්සවය අමතමින් ජනාධිපතිවරයා මෙම අදහස් පළ කරනු ලැබුවා.
මේ සම්බන්ධයෙන් නිකුත් කළ නිවේදනය පහතින්.
ජාත්යන්තර මූල්ය අරමුදලේ විධායක මණ්ඩලය ජූලි 01 වනදා රැස්වීමට නියමිත බව ජාත්යන්තර මූල්ය අරමුදලේ පළමු නියෝජ්ය කළමනාකාර අධ්යක්ෂිකා ආචාර්ය ගීතා ගෝපිනාත් පවසනවා.
ඒ අනුව විස්තීර්ණ අරමුදල් පහසුකම (EFF) යටතේ වන ශ්රී ලංකාවේ සිව්වන සමාලෝචනය එහිදී ඇගයීමට නියමිත බවයි ඇය සඳහන් කළේ.
ශ්රී ලංකාවට හිමිවීමට නියමිත මීළඟ වාරිකය ලෙස ඩොලර් මිලියන 344ක පමණ මූල්ය පහසුකමක් සඳහා ප්රවේශය ලබා ගැනීමට හැකිවනු ඇති බවයි වැඩිදුරටත් සඳහන් වෙන්නේ.
චීන කොමියුනිස්ට් පක්ෂයේ ආරාධනයක් මත මේ දිනවල චීනයේ සංචාරයක නිරත වන ජනතා විමුක්ති පෙරමුණේ ප්රධාන ලේකම් ටිල්වින් සිල්වා ඇතුළු පිරිස, චීන කොමියුනිස්ට් පක්ෂයේ විදේශ කටයුතු දෙපාර්තමේන්තුවේ මූලස්ථානයේදී එහි ප්රධානියා වන Liu Jianchao ඇතුළු ඉහළ පෙළේ නායකයින් සමග සාකච්ඡාවක් පවත්වා තිබෙනවා.
ජනතා විමුක්ති පෙරමුණ සහ චීන කොමියුනිස්ට් පක්ෂය අතර පවතින දීර්ඝකාලීන මිත්රත්වය කිසිවෙකුටත් පලුදු කළ නොහැකි බවත්, එම මිත්රත්වය පලුදු කිරීමට කිසිවෙකුටත් ඉඩ නොදෙන බවයි Liu Jianchao අවධාරණය කර තිබෙන්නේ.
රට සංවර්ධනය කිරීමේ වැඩපිළිවෙළට අවශ්ය ඕනෑම විටෙක සහාය ලබාදීමට චීනය සූදානම් බවද, කිසිදු රටක ස්වෛරීභාවයට හානිවන අකාරයේ ක්රියා මාර්ගවලට චීනය සූදානම් නැති බවද ඔහු සඳහන් කර තිබෙනවා.
චීනය සහ ලංකාව අතරත්, ජනතා විමුක්ති පෙරමුණ සහ චීන කොමියුනිස්ට් පක්ෂය අතරත් පවතින මිත්රත්වය මෙම වසරේ මුලදී සිදු කෙරුණු ජනතා විමුක්ති පෙරමුණේ නායක, ජනාධිපති අනුර කුමාර දිසානායකගේ සංචාරයේදී තව දුරටත් වර්ධනය වූ බවත්, එමෙන්ම තමන් ඇතුළු පිරිස සිදු කරන මෙම සංචාරයේදී එම මිත්රත්වය තවදුරටත් වර්ධනය වන බවයි එහිදී ජනතා විමුක්ති පෙරමුණේ ප්රධාන ලේකම් ටිල්වින් සිල්වා සඳහන් කර ඇත්තේ.
Air India ගුවන් සමාගමට අයත් ගුවන් යානයක ඇති වූ තාක්ෂණික දෝෂයක් හේතුවෙන්, එම ගුවන් යානය ගුවන්ගත කිරීමට පෙර ගුවන් ගමන අවලංගු කිරීමට පියවර ගෙන ඇති බව ඉන්දීය මාධ්ය වාර්තා කරනවා.
ඒ අනුව එම යානය අහමදාබාද් සිට ලන්ඩන් බලා පියාසර කිරීමට නියමිතව තිබුණු අතර, එම ගුවන් ගමන අවලංගු කිරීම හේතුවෙන් මගීන් 200කට වැඩි පිරිසක් පීඩාවට පත් වූ බවයි සඳහන් වෙන්නේ.
ජුනි 12 වන දින සිදුවූ මාරාන්තික ගුවන් අනතුරෙන් පසු අහමදාබාද් සිට ලන්ඩන් බලා පිටත්වීමට සූදානම් වූ පළමු ගුවන් යානය මෙය වන බවයි විදෙස් මාධ්ය වාර්තා සඳහන් කළේ.
දීර්ඝකාලීනව නොවිසඳුනු පරිපාලන ගැටලු මුල් කරගනිමින් වෘත්තීය ක්රියාමාර්ගයකට යොමුවීමට තීරණය කළ බව ලංකා දුම්රිය නියාමක සංගමය පවසනවා.
ඒ අනුව දිස්ත්රික් ප්රවාහන පරීක්ෂක ප්රවාහන/වාණිජ තනතුරේ බඳවා ගැනීම් සිදු කිරීම ප්රමාදවීම, නියාමක විශේෂ පංතියේ උසස්වීම් ලබාදීම ප්රමාදවීම, නියාමක විශේෂ පංතියේ වැටුප් ගැටලුව නොවිසඳීම, දෙපාර්තමේන්තු පරීක්ෂණ පැවැත්වීම ප්රමාදවීම ඇතුළු ගැටළු කිහිපයක් මුල් කර ගනිමින් මෙලෙස වෘත්තීය ක්රියාමාර්ගයකට යොමුවීමට තීරණය කර ඇති බවයි සඳහන් වන්නේ.
සිය ගැටලු සඳහා විසඳුම් ලබාදීමට කටයුතු නොකළහොත්, 20 වැනි සිකුරාදා දින මධ්යම රාත්රියේ සිට පැය 48 ක සංකේතාත්මක වැඩ වර්ජනයක නිරතවන බවයි දුම්රිය නියාමක සංගමය වැඩිදුරටත් ප්රකාශ කළේ.
