දළදා ප්රදර්ශනය හේතුවෙන් මහනුවර නගරයේ තෝරාගත් පාසල් 37 ක් වසා දැමීමට නියමිත බව මහනුවර අධ්යාපන ලේකම්වරයා පවසනවා.
ඒ අනුව, අප්රේල් 21 සිට 25 දක්වා අදාළ පාසල් වසා දැමීමට නියමිත බවයි ඔහු සඳහන් කළේ.
ලබන 18 වැනිදා ආරම්භ වන සිරි දළදා වන්දනාව දින 10ක් පුරා පැවැත්වීමට නියමිතයි.
ලබන 18 වැනිදා ආරම්භ වන සිරි දළදා වන්දනාවට අවශ්ය සියලු කටයුතු මේ වනවිටත් සූදානම් කෙරෙමින් පවතිනවා.
අනිද්දා සිට දින 10ක් පුරා ඓතිහාසික සිරි දළදා වන්දනාව සඳහා සියල්ල සූදානම් බවයි ඓතිහාසික ශ්රී දළදා මාලිගය සඳහන් කළේ.
දළදා ප්රදර්ශනය වෙනුවෙන් ප්රවේශ මාර්ග තුනක් හඳුන්වාදීමට දළදා මාලිගය පියවර ගෙන තිබෙන අතර, ඩී.එස්. සේනානායක වීදියේ සිට දළදා මාලිගයේ පෝලිම් මාර්ගය දක්වා එක් මාර්ගයක් ද, රතු බෝක්කුව දෙස සිට මහනුවර වැව් රවුම, සංඝරාජ මාවත හරහා දළදා මාලිගයේ ප්රධාන පිවිසුම තෙක් ස්ථාපිත කර ඇති පෝලිම් මාර්ගය දක්වා තවත් පිවිසුම් මාර්ගයක් ද, රතු බෝක්කුව දෙස සිට වැව රවුම මාලිගාව පෙදෙස හරහා ප්රධාන පිවිසුම තෙක් මාර්ගයක්ද ලෙස එය ක්රියාත්මකයි.
දළදා ප්රදර්ශනය හේතුවෙන් මහනුවර නගරයේ තෝරාගත් පාසල් ලබන 21 සිට 25 දක්වා වසා දැමෙන බවත්, ඒ වෙනුවට එම පාසල්වල පාසල පැවැත්වෙන කාලය අප්රේල් 28 වැනිදා සිට සති 05ක් අතිරේකව පැයක් වැඩි කෙරෙන බවයි මහනුවර කලාප අධ්යාපන කාර්යාලය නිවේදනය කර තිබෙන්නේ.
මේ අතර සිරි දළදා ප්රදර්ශනය සඳහා අවශ්ය සියලු ආරක්ෂාව සැපයීමට ආරක්ෂක අංශ කටයුතු යොදා තිබෙන අතර, සනීපාරක්ෂක කටයුතු සඳහා අවශ්ය ජංගම සහ ක්ෂේත්ර වැසිකිලි 135කට ආසන්න සංඛ්යාවක් දැනටමත් ඉදිකර අවසන් බවයි වැඩිදුරටත් සඳහන් වෙන්නේ.
දුක කඳුළ වේදනාව වෙනුවට සතුට සම්පත රජ කරවන නව වසරක් වෙනුවෙන් පෙළ ගැසෙන ලෙස විපක්ෂ නායක සජිත් ප්රේමදාස පවසනවා.
මෙම අලුත් අවුරුද්දේ සුපුරුදු අභියෝග සේම නුපුරුදු අලුත් අභියෝග ද අප ඉදිරිපිට තිබෙන අතර ඒවා නිසි පරිදි කළමනාකරණය කර ගෙන රටත් ජනතාවත් ප්රගතිය වෙත රැගෙන යාම අප සියලුදෙනා සතු සාමූහික වගකීමක් බවයි සිය අලුත් අවුරුදු පණිවිඩය නිකුත් කරමින් විපක්ෂ නායකවරයා සඳහන් කරන්නේ.
මේ සම්බන්ධයෙන් නිකුත් කළ නිවේදනය පහතින්.
භෞතිකව හා ආධ්යාත්මිකව අලුත් වීමේ අපේක්ෂාව සංකේතවත් කරන, සිංහල හා දෙමළ අලුත් අවුරුද්ද අප මෙවර සමරන්නේ රටක් ලෙස ජයග්රහණ රැසක් අත් පත් කර ගනිමින් බව ජනාධිපති අනුර කුමාර දිසානායක පවසනවා.
අගාධයට ඇද වැටී තිබු අප රට පසුගිය මාස කිහිපය තුළ නැවත ගොඩනගමින්, ආර්ථික, සමාජයීය සහ දේශපාලනික වශයෙන් නව තලයකට ඔසවා තැබීමට අපි සමත් වූ බවයි අලුත් අවුරුදු පණිවුඩය නිකුත් කරමින් ජනාධිපතිවරයා සඳහන් කළේ.
අභියෝග හමුවේ නොසැලී රට වෙනුවෙන් අපගේ වගකීම තවත් ශක්තිමත්ව ඉටු කිරීමේ ධෛර්යය වගකිව යුතු රජයක් ලෙස ඔවුන් සතු බවත්, රට ඉදිරියේ ඇති සියලු ආකාරයේ අභියෝග ජය ගැනීමට අවශ්ය සැලසුම් රජය මේ වනවිට ක්රියාවට නංවමින් සිටින බවද ජනාධිපතිවරයා සඳහන් කර තිබෙනවා.
එසේම රටට අවැසි නව ආර්ථික, සමාජයීය සහ දේශපාලනික පරිවර්තනයක් සාක්ෂාත් කෙරෙන ජාතික වැඩපිළිවෙළ සාර්ථක කර ගනිමින් රටත්, ජනතාවත් දිනවීම පිණිස මේ එළැඹෙන අලුත් අවුරුද්දේ තවත් සවිමත්ව, සහෝදරත්වයෙන් එකම අරමුණකට පෙළගැසෙන්නට ආරාධනා කරන බවයි ජනාධිපතිවරයා වැඩිදුරටත් ප්රකාශ කළේ.
මේ සම්බන්ධයෙන් නිකුත් කළ නිවේදනය පහතින්.
අප්රේල් මස 09වන දා සිට 21 වනදා දක්වා දුම්රිය දෙපාර්තමේන්තුව සහ ශ්රී ලංකා ගමනාගමන මණ්ඩලය එක්ව ඒකාබද්ධ ප්රවාහන සැලැස්මක් සකස් කර තිබෙනවා.
ඒ අනුව එම කාල සීමාව තුළ දවසේ පැය 24ම ආවරණය වන පරිදි මෙහෙයුම් මැදිරියක් සහ පාරිභෝගික සත්කාරක ඒකකයක් ජාතික ගමනාගමන කොමිෂන් සභාව ස්ථාපිත කර ඇති බව එම කොමිෂන් සභාව පවසනවා.
1955 ක්ෂණීක දුරකතන අංකය සහ 0712 595 555 වට්ස්ඇප් අංකය මගින් මගී ජනතාවට සම්බන්ධ විය හැකි බවත් ජාතික ගමනාගමන මණ්ඩලයේ බස්රථ සම්බන්ධයෙන් විස්තර 1958 සහ දුම්රිය විමසීම් සඳහා 1971 කෙටි දුරකතන අංකවලට ඇමතීමෙන් වැඩිදුර තොරතුරු ලබා ගැනීමේ හැකියාව පවතිනවා.
අප්රේල් 13 වනදා සිට 21 දක්වා සෑම දිනකම දිවා කාලයේ පස්වරු 3.00 දක්වා තම නිවෙස්වල ඇති සූර්ය පද්ධතිය අක්රීය කරන ලෙස ලංකා විදුලිබල මණ්ඩලය ජනතාවගෙන් ඉල්ලා සිටිනවා.
ඒ අනුව අවුරුදු සමය තුළ විදුලි ඉල්ලුම අවම මට්ටකම පැවතීම හේතුවෙන් ජාතික විදුලිබල පද්ධතියට එක් කෙරෙන ඉහළ විචල්යතාවයකින් යුතු පුනර්ජනනීය බලශක්ති දායකත්වය ජාතික පද්ධතියට අසාමාන්ය ආතතියක් ඇති කරන බවයි එම මණ්ඩලය සඳහන් කළේ.
එහි ප්රතිඵලයක් ලෙස පද්ධතියේ අවස්ථාතිය තියුණු ලෙස පහත වැටී ඇති අතර එය ඉතා සුළු උච්ඡාවචනයකදී පවා අර්ධ වශයෙන් ඇණහිටීමට හෝ රට පුරා විදුලිය විසන්ධිවීමක් ඇති කරන මට්ටමකට පැමිණීමේ අවධානමක් පවතින බවයි ලංකා විදුලිබල මණ්ඩලය වැඩිදුරටත් සඳහන් කළේ.
මේ සම්බන්ධයෙන් නිකුත් කළ නිවේදනය පහතින්.
රට සංවර්ධනය කිරීමට නම් ගමේ පාලනය ද දූෂණයෙන් තොර විය යුතු බව ජනාධිපති අනුර කුමාර දිසානායක පවසනවා.
සමන්තුරෙයි ප්රදේශයේ පැවති ජන හමුවකට එක්වෙමින් ජනාධිපතිවරයා මේ බව සඳහන් කර සිටියා.
ජාතික දේශපාලනය මෙන්ම, ගමේ දේශපාලනය ද පිරිසිදු කළ යුතු බවයි ජනාධිපතිවරයා එහිදී වැඩිදුරටත් පවසා සිටියේ.
හිටපු රාජ්ය අමාත්ය සිවනේසතුරෙයි චන්ද්රකාන්තන් හෙවත් ‘පිල්ලෙයාන්’ ගෙන් වැඩිදුර ප්රශ්න කිරීම සඳහා අපරාධ පරීක්ෂණ දෙපාර්තමේන්තුව (CID) විසින් දින 90ක රැඳවුම් නියෝගයක් ලබාගෙන තිබෙනවා.
2006 වර්ෂයේ නැගෙනහිර පළාතේදී විශ්ව විද්යාල උපකුලපතිවරයෙකු අතුරුදන්වීමේ සිද්ධියක් සම්බන්ධයෙන් සිදුකරන විමර්ශනයකට අදාළව, පසුගිය 08 වැනිදා මඩකලපුවේදී ඔහු අත්අඩංගුවට ගනු ලැබුවා.
උත්සව සමයේදී සිදුවන හදිසි අනතුරු වළක්වා ගැනීම සඳහා කටයුතු කරන ලෙසට සෞඛ්ය අමාත්යාංශයේ බෝ නොවන රෝග ඒකකය ජනතාවට දැනුම් දෙනවා.
සෑම වසරකම අවුරුදු සතිය තුළදී පුද්ගලයින් 28,000 – 30,000 අතර සංඛ්යාවක් අනතුරු හේතුවෙන් රෝහල්ගත වන බවයි එහි ප්රජා වෛද්ය විශේෂඥ සමිත සිරිතුංග පවසන්නේ.
එසේම අවුරුදු සතිය තුළ සිදුවන අනතුරු හේතුවෙන් පුද්ගලයින් 75 – 100 අතර සංඛ්යාවක් මියයන බව ද ඔහු වැඩිදුරටත් සඳහන් කර සිටියා.
වාර්ෂිකව නව පිළිකා රෝගීන් 33,000කට ආසන්න ප්රමාණයක් මෙරටින් හඳුනාගන්නා බව සෞඛ්ය හා ජනමාධ්ය අමාත්ය, වෛද්ය නලින්ද ජයතිස්ස පවසනවා.
ඉන් බහුතරය මුඛ පිළිකා සහිත පිරිමි පාර්ශ්වය වන බවත්, කාන්තාවන් අතර පියයුරු පිළිකාව ප්රධාන තැනක් ගන්නා බවත් ඔහු සඳහන් කරනවා.
පිළිකා රෝගී තත්ත්වයන් හේතුවෙන් වසරකට 19,000 කට ආසන්න පිරිසකගේ ජීවිත අහිමි වන බව සෞඛ්ය දත්ත මගින් පෙන්වා දෙන බවයි අමාත්යවරයා පවසා සිටියේ.
පිළිකා රෝගය මර්දනය කිරීම සඳහා ජනතාව දැනුවත් කිරීමට සාධනීය විශේෂ වැඩසටහන් සැලසුම් කරමින්, ක්රියාත්මක කිරීමේ අවශ්යතාවය අමාත්ය නලින්ද ජයතිස්ස අවධාරණය කර සිටිනවා.
