මත්පැන් බෝතල්වලට යොදන QR කේත සහිත ස්ටිකර් ව්යාජව මුද්රණය කිරීම හේතුවෙන් රජයට විශාල පාඩුවක් සිදු වන බව රජයේ මුදල් පිළිබඳ කාරක සභාවේ සභාපති ආචාර්ය හර්ෂ ද සිල්වා මහතා පවසයි.
ඔහු කොළඹ අද (18) පැවති මාධ්ය හමුවකට එක්වෙමින් සඳහන් කළේ, ඉන් සිදුවන බදු පාඩුව, සුවසැරිය සඳහා වසරකට වෙන්කරන මුදල් ප්රමාණය මෙන් අට ගුණයක් බවය.
මෙම අනීතික ක්රියාව නැවැත්වීමට රජය වහා කටයුතු කළ යුතු බව ද මන්ත්රීවරයා අවධාරණය කළේය.
රජයට හිමි බදු ආදායම ආරක්ෂා කිරීම සහ නීතිවිරෝධී මත්පැන් වෙළෙඳාම පාලනය කිරීමේ අරමුණින් මත්පැන් බෝතල් සඳහා රජයේ ආරක්ෂිත බදු ස්ටිකර් ක්රමවේදය ආරම්භ කෙරුණි.
එවන් පසුබිමක ව්යාජ QR කේත සහිත ස්ටිකර් අලවා තිබු නීතිවිරෝධි මත්පැන් බෝතල් අවස්ථා කිහිපයකදී දිවයිනේ ස්ථාන කිහිපයකින්ම පසුගියදා සොයා ගැණින.
මේ සම්බන්ධයෙන් අදහස් පළ කරමින්, ආචාර්ය හර්ෂ ද සිල්වා මහතා පවසන්නේ, මේ හරහා රජයට විශාල බදු ආදායමක් අහිමි වන බවය.
“මට පේන මහා ලොකු මගඩියක් මෙතන සිද්ධ වෙන්නේ. බදු එකතු කරන්න ක්රමයක් හැටියට තමයි ඔය ස්ටිකර් එක පාවිච්චි කළ යුතුයි කියන තීරණයට ඇවිල්ලා තිබුණේ. දැන් ප්රශ්නේ වෙලා තියෙන්නේ මේ ස්ටිකර් හොරට ගහනවා ද කියන වැඩේ. මේ ළඟදී මේ සුරාබදු එකෙන් අහන කොට දැන් මේ හොර ස්ටිකර් ගහලා තියෙනවා කියලා ආරංචි වෙනවා කිව්වා. නෑ නෑ එහෙම ලොකු ප්රශ්නයක් නෑ. ඔක්කොම වාගේ දැන් හරියට සිද්ධ කියලා මං හිතන්නේ දවස් තුන හතරක් ගියේ නෑ. මහා විශාල එකක් කරලා මේ මාලඹේ පැත්තේ අහුවෙලා තිබුණා මහා විශාල තොගයක්.
දැන් එතකොට මෙතන තියෙන ප්රශ්නේ තමයි මේ ස්ටිකර් එක කොහොමද මේ කට්ටියට ගියේ? හොරට ගියේ. එක පැත්තකින් ඒක ගියේ ඒගොල්ලොන්ගෙන්ම ආයතනයෙන්මද? හොර ක්රමයකට එහෙමත් නැත්නම් වෙන කවුරුහරි එව්වා ගහලා ද? එතකොට මේ දෙකම වෙන්න බෑනේ.
මට අදාළ වෙන්නේ මුදල් කමිටුවේ සභාපති හැටියට මේ ආදායම් අහිමිවීම. ඉතින් මේ හොර ස්ටිකර් ගහලා දූෂිත ක්රමවේද හරහා රජයට, භාණ්ඩාගාරයට ලැබිය යුතු මුදල අහිමි වෙනවා නම් ඒක මහ ලොකු දැවැන්ත පාඩුවක්. අපි සුව සැරියට වියදම් කරන ප්රමාණය වගේ අවුරුද්දකට මගේ ගණනය කිරීම ඒ වගේ අට ගුණයක විතර බද්දක් අපිට අහිමි වෙනවා.”
