මෙරට ජීවත්වන ජනතාවට ගුණාත්මක, ප්‍රශස්ත සහ විධිමත් නිදහස් සෞඛ්‍ය සේවාවක් අඛණ්ඩව ලබා දීම සඳහා ඉදිරි තෙවසර තුළදී ප්‍රධාන ධාරාවන් පහක් ඔස්සේ මෙරට සෞඛ්‍ය සේවාව සංවර්ධනය කිරීමට කටයුතු කරන බව සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස පවසනවා.
ආයුර්වේද වෛද්‍ය සභාවට සාමාජිකයන් පත් කිරීම වෙනුවෙන් ඊට අදාළ පත්වීම් ලිපි ප්‍රධානය කිරීමේ අවස්ථාවට එක්වෙමින් අමාත්‍යවරයා මේ බව සඳහන් කළා.
මෙරට ජනතාවට සෞඛ්‍ය සම්පන්න ජිවිතයක් ගත කිරීම සදහා දැනට පවතින ආයුර්වේද ක්ෂේත්‍රය සංවර්ධනයට පියවර ගැනීම මෙන්ම බටහිර, ආයුර්වේද, සිද්ධ, යුනානි, හෝමියෝපති, පාරම්පරික සහ දේශීය වෛද්‍ය ක්‍රමයන් පිළිබඳවත්, පවතින කාලීන ගැටලු පිළිබඳවත් මෙහිදී කරුණු විමසූ අමාත්‍යවරයා විසඳුම් ලබාදිය හැකි යැයි හඳුනාගත් ගැටළු රාශියකට කඩිනම් විසඳුම් ලබාදීමට එම අවස්ථාවේදීම කටයුතු කර ඇති බවයි සඳහන් වෙන්නේ.
දේශීය වෛද්‍ය ක්‍රමය මනා ලෙස සංවර්ධනය කරමින්, අනාගත ඉලක්කගතව, එම වෛද්‍ය ක්‍රමයට ගම්‍යවූ සුවිශේෂතා හඳුනාගනිමින්, එම සුවිශේෂතා සංචාරක ව්‍යාපාරය හා බද්ධ කර සංචාරක ක්ෂේත්‍රය දියුණු කිරීම ද රජයේ ප්‍රමුඛතම අරමුණක් බවයි අමාත්‍යවරයා මෙහිදී වැඩිදුරටත් සඳහන් කර ඇත්තේ.
