යුද ජයග්‍රහණයට වසර 16ක් සපිරීම නිමිත්තෙන් පැවැත්වෙන ජාතික විජයග්‍රාහී සැමරුම් උත්සවයට සහභාගීවීමට අවසන් මොහොතේ හෝ තීරණය කිරීම සම්බන්ධයෙන් ජනාධිපති අනුර කුමාර දිසානායකට ස්තූතිවන්ත වන බව එක්සත් ජනරජ පෙරමුණේ නායක පාඨලී චම්පික රණවක පවසනවා.
අනුර කුමාර ජනාධිපතිවරයා වියට්නාමයට ගිය අවස්ථාවේ එරට විරුවන් සැමරීමට එක්වූ බවත්, අගමැතිවරිය ද පලස්තීන නිදහස වෙනුවෙන් පැවති උත්සවයට සහභාගී වූ බවයි අද (19) පැවති මාධ්‍ය හමුවකට එක්වෙමින් ඔහු සඳහන් කළේ.
පසුගිය ජනාධිපතිවරණයේදී ‘අදිටන’ නමින් රණවිරුවන් විශාල ප්‍රමාණයක් ජාතික ජන බලවේගයට සහයෝගය දැක්වූ බවද, ඒ හේතුවෙන් ජනාධිපතිවරයා එයට සහභාගීවීම වැදගත් බවද හිටපු මන්ත්‍රීවරයා ප්‍රකාශ කළා.
වත්මන් රජයට මෙතරම් විශාල බලයක් ලැබුණත්, සමාජයේ ඇති විභේදනයන් එකතු කර, එක රටක් කරා යාමට එම අසීමාන්තික ජනවරම භාවිතා කිරීමට වත්මන් රජය කටයුතු කර නොමැතිවීම කණගාටුදායක බවයි පාඨලී චම්පික රණවක වැඩිදුරටත් ප්‍රකාශ කළේ.
