පවතින උණුසුම් කාලගුණය සමඟ ජලය ප්‍රවේශමෙන් භාවිතා කරන්න – ජල සම්පාදන මණ්ඩලය

මේ දිනවල දිවයිනේ පවතින අධික වියළි කාලගුණික තත්ත්වය හේතුවෙන් ජල මුලාශ්‍රයන් හි ජල මට්ටම සීඝ්‍රයෙන් පහළ බසිමින් පවතින බව ජාතික ජල සම්පාදන හා ජලාපවහන මණ්ඩලය පවසනවා.

එසේම, උෂ්ණාධික බව නිසා ජනතාවගේ ජල පරිභෝජනය ද ඉතා ඉහළ මට්ටමක පවතින බවයි එම මණ්ඩලය සඳහන් කළේ.

පානීය ජල සැපයුම සීමාසහිත වන බැවින්, එය සැමගේ අත්‍යවශ්‍ය පානීය හා සනීපාරක්ෂක කටයුතුවලට සම සේ බෙදාහැරිය යුතු බව ද ජාතික ජල සම්පාදන හා ජලාපවහන මණ්ඩලය පෙන්වා දෙනවා.

එබැවින් වාහන සේදීම, ගෙවතු වගාව වැනි කටයුතු සඳහා ජලය භාවිතා කිරීම අවම කොට, අවශ්‍ය දෛනික කටයුතුවලට පමණක් ජලය භාවිතා කරන මෙන් ජාතික ජල සම්පාදන හා ජලාපවහන මණ්ඩලය ජනතාවගෙන් වැඩිදුරටත් ඉල්ලා සිටිනවා.