ඇල්ල රොක් කඳු පන්තියේ හටගත් ගින්න මේ වනවිට පාලනය කර ඇති බව බදුල්ල දිස්ත්‍රික් ආපදා කළමනාකරණ මධ්‍යස්ථානයේ සහකාර අධ්‍යක්ෂ ඒ.එල්.එම් උදය කුමාර පවසනවා.
13 වැනිදා පස්වරුවේ මෙම ගින්න හටගත් අතර, ඒ හේතුවෙන් ඇල්ල රොක් කඳු පන්තියේ ගල් රත්වී, එම ගල් පුපුරායාමේ අවදානමක්ද මතුවී තිබුණු බවයි සඳහන් වන්නේ.
මේ වනවිට කඳු පන්තියේ ගල් නිරාවරණය වී ඇති බැවින්, ගල් පහළට පෙරළීමේ අවදානමක් ද ඇති බවත්, ඒ හේතුවෙන් ඇල්ල – වැල්ලවාය මාර්ගයේ ගමන් ගන්නා රියදුරන් දැඩි විමසිලිමත්ව රිය ධාවනය කළ යුතු බවට දැනුම්දෙන බවයි සහකාර අධ්‍යක්ෂවරයා වැඩිදුරටත් සඳහන් කළේ.
