පසුගිය 24 වැනිදා කොට්ටාව – ගල්කිස්ස 255 බස් මාර්ගයේ බස් රථයක ගමන් කළ තරුණයෙකුට බස් කොන්දොස්තර සහ රියදුරු ඇතුළු පිරිසක් විසින් අමානුෂික ලෙස පහර දීමේ සිද්ධිය සම්බන්ධයෙන් ප්‍රවාහන අමාත්‍යාංශය නිවේදනයක් මගින් කරුණු දක්වා තිබෙනවා.
ඒ අනුව, සිද්ධියට අදාළව සැක පිට අත්අඩංගුවට ගත් පුද්ගලයින් තිදෙනෙකු නොවැම්බර් 24 සිට 29 දින දක්වාම රිමාන්ඩ් ගතකර සිටින බව මොරටුව මූලස්ථාන පොලිස් පරීක්ෂකවරයා පවසා ඇති බවයි සඳහන් වන්නේ.
ඔවුන් අධිකරණයට ඉදිරිපත් කර, ඉන්පසු අදාළ අධිකරණ නියෝග අනුව ඉදිරි නීතිමය කටයුතු සිදුකිරීමට නියමිත බවයි එම නිවේදනයේ දැක්වෙන්නේ.
අදාළ බස් රථය දිගු වේලාවක් නවතා‍ගෙන සිටීම, වලංගු ප්‍රවේශපත්‍ර නිකුත් නොකිරීම, මගීන් අපහසුතාවයට පත් කිරීම හා තර්ජනය කිරීම ඇතුළු කරුණු සම්බන්ධයෙන් රියදුරු හා කොන්දොස්තරවරයාගෙන් ප්‍රශ්න කිරීම නිසා ඔවුන් තමාට අමානුෂික ලෙස පහරදුන් බවට පහරකෑමට ලක්වූ තරුණයා ගල්කිස්ස පොලිසියට පැමිණිල්ලක් කර තිබුණා.
