විදේශ ගමන් බලපත්‍ර ගැටලුව විසඳීම සඳහා රජය උපරිමයෙන් කටයුතු කරන බව ජනාධිපති අනුර කුමාර දිසානායක පවසනවා.
ඒ අනුව මේ වන විට ඇනවුම් කර ඇති විදෙස් ගමන් බලපත්‍ර ලක්ෂ හතහමාර අවසන්වීමට පෙර නව ඇනවුමක් ගෙන ඒමට කටයුතු කරන බවයි ඊයේ (06) රාත්‍රියේ පැවති රූපවාහිනී වැඩසටහනකට එක්වෙමින් ජනාධිපතිවරයා සඳහන් කළේ.
පළපුරුදු යැයි පවසන නායකයින් සිදුකර තිබුණේ පැවති විදේශ ගමන් බලපත්‍ර තොගය අවසන් වෙමින් තිබියදී තවත් තොගයක් ගෙන ඒම වෙනුවට නව E – පාස්පෝට් එකක් සඳහා ටෙන්ඩර් කැඳවීම බවයි ජනාධිපතිවරයා ප්‍රකාශ කළේ.
එම E – පාස්පෝට් එක පැමිණෙන කාලයක් ගැන ඔවුන්ට අදහසක් නොතිබූ බවත්, එම කාලය තුළ විදෙස් ගමන් බලපත්‍ර තොගය අවසන් වූ පසු E – පාස්පෝට් සමාගමටම පාස්පෝට් මුද්‍රණය කිරීමට ලබාදී ඇති බවත් ජනාධිපතිවරයා සඳහන් කළා.
කෙසේ වෙතත් මෙම පාස්පෝට් තොගය ද ලැබෙන්නේ කඩින් කඩ බවත්, එකවර ලබාදීම වෙනුවට කඩින් කඩ ලබාදීම තුළින් විදෙස් ගමන් බලපත්‍ර හිඟයක් ඇතිවීම අනිවාර්යය බවත්, මෙම ගැටලුවට පැවති පාලනය වග නොකියා නව රජය වග කියන්නේ කෙසේද යන බවයි ජනාධිපතිවරයා වැඩිදුරටත් ප්‍රකාශ කළේ.
