කැකිරාවේ රිය අනතුරකින් 12 හැවිරිදි පාසැල් සිසුවෙක් එම ස්ථානයේදීම මරුට.

24-03-21
කැකිරාව කුෂාන් ජයවර්ධන

කැකිරාවේ රිය අනතුරකින් 12 හැවිරිදි පාසැල් සිසුවෙක් එම ස්ථානයේදීම මරුට.
============

කැකිරාව ගනේවල්පොල මාර්ගයේ ඇඹුල්ගස්වැව ප්‍රෙද්ශයේදී අද (21) සවස සිදුවූ මාරක රිය අනතුරකින් වයස අවුරුදු 12ක පාසැල් සිසුවකු එම ස්ථානයේදීම ජිවිතක්ෂයට පත්ව තිබේ.
මෙලෙස මිය ගොස් ඇත්තේ කැකිරාව බස්තියන් සිල්වා විද්‍යාලයේ 06 වැනි වසරේ ඉගෙනුම ලැබූ කුසල යුගත් සංජීව නම් 12 වැනි වියෙහි පසුවූ පාසැල් සිසුවෙකි. එම පවුලේ එකම දරුවා ද ඔහුය. මිය ගිය සිසුවා කැකිරාව නෙල්ලියගම ප්‍රෙද්ශයේ පදිංචිව සිටි අයෙකි.
කුඩා කල සිට ඇඹුල්ගස්වැව මහ විද්‍යාලයේ ඉගෙනුම ලබා ඇති මෙම සිසුවා මින් දින තුනකට පමන ඉහතදී කැකිරාව බස්තියන් සිල්වා විද්‍යායට ඇතුළත්ව තිබිණ. පළමු වරට බස්තියන් සිල්වා විද්‍යාලයට ගිය ඉකුත් දිනයේ එහි සිහිවටනයක් ලෙස එම පාසැලේ නිලඇදුමින් සැරසී සිහිවටන ඡායාරෑපයක් ද ලබා ගැනීමට එම සිසුවා කටයුතු කර තිබිණ.
මිය ගිය සිසුවාට කලක පටන් පිය සෙනෙහසද අහිමිව සිට ඇති අතර මව ද කලකට ඉහතදී විදේශ ගතව ඇති අතර එම සිසුවා සිය මිත්තනිය භාරයේ සිට අධ්‍යාපන කටයුතු සිදුකරමින් සිට ඇත.
සුපුරුදු පරිදි අද(21) දිනයේ පාසැල් ගොස් ඇති සිසුවා පාසැලේ පැවැති විශේෂ පුහුනු වැඩසටහනකට සහභාගී වීමට ක්‍රීඩා ඇදුමින් සැරසී පාසැල් ගොස් තිබිණ. සිය පාසැල් කටයුතු නිම වීමෙන් පසුව අද සවස පොදු ප්‍රවාහන බස් රථයකින් නිවසට පැමිණීමට එම සිසුවා කටයුතු කර තිබිණ. එලෙස නිවස බලා පැමිණි සිසුවා ඇඹුල්ගස්වැව මංසන්දියේදී බසයෙන් බැස පාර මාරුවීමට ගිය අවස්ථාවේ ගනේවල්පොල දෙස සිට පැමිණි ලොරි රථයක ගැටී මෙලෙස අනතුරට ලක්ව ඇති බව පොලිසිය කියයි. සිසුවා පාර මාරුවීමට ගිය අවස්ථාවේ ලොරි රථය එනු දැක ඇති ඒ ආසන්නයේ සිටි කාන්තාවක විසින් දැක ඇති අතර නවතින ලෙස දරුවාට ඒ බව දන්වා කෑ ගසා ඇති බවද පොලිසිය සිදු කළ විමර්ශණවලදී හෙළිව තිබේ. කෙසේ වෙතත් එම අවස්ථාවේ පාර මාරුවෙමින් සිටි සිසුවා ලොරි රථයේ ගැටී ඇවැටී ලොරි රථයට යටවී ඇතැයි පොලිසිය කියයි , ලොරි රථයේ ගැටීමෙන් හා ඊට යටවීමෙන් සිසුවාගේ හිසට බරපතල හානි සිදුව තිබිණ. බරපතල තුවාල ලත් සිසුවා එම ස්ථානයේදීම ජීවිතක්ෂයට පත්ව තිබූ අතර මිය ගිය පාසැල් සිසුවාගේ පාසැල් පොත් බෑගය ද සිසුවාගෙ මෘත ශරීරයෙහි කරෙහි එම අවස්ථාව වනවිටත් දක්නට ලැබිණ..
ලොරි රථයේ රියදුරාගේ අපරික්ෂාකාරී රිය පැදවීම අනතුරට හේතු වී ඇති බව සිදු කළ විමර්ශණ වලදී අනාවරණය වී ඇතැයි පොලිසිය කියයි.
අනතුර සැලවීමත් සමග ප්‍රෙද්ශවාසී බොහෝ දෙනෙකු එම ස්ථානයට එක්රොක්ව සිටියහ.
අනතුර සිදුවූ ස්ථානයට පැමිණි කැකිරාව මහේස්ත්‍රාත්වරිය විසින් සිසුවකුට මරු කැදවූ එම මාරක රිය අනතුර සම්බන්ධයෙන් වූ ස්ථානීය මහේස්ත්‍රාත් පරීක්ෂණය සිදුකරනු ලැබීය. අදාළ සිසුවාගේ මළ සිරුර සම්බන්ධයෙන් පශ්චාත් මරණ පරීක්ෂණක් පැවැත්වීම සදහා සිරුර අනුරාධපුර මහ රෝහලේ අධිකරණ වෛද්‍ය නිලධාරීවරයා වෙත යොමු කිරීමට එහිදී මහේස්ත්‍රාත්වරිය පොලිසියට නියෝග කළාය. ඒ අනුව පශ්චාත් මරණ පරීක්ෂණය සදහා මිය ගිය සිසුවාගේ මෘත ශරීරය අනුරාධපුර ශික්ෂණ රෝහල වෙත රැගෙන යාමට පොලිසිය කටයුතු කරනු ලැබීය.
සිසුවාට මරුකැදවූ මාරක රිය අනතුරට සම්බන්ධ ලොරි රථය හා එහි රියදුරු මේ වනවිට සිදු කෙරෙන වැඩිදුර විමර්ශණ කටයුතු සදහා පොලිස් අත්අඩංගුවට ගෙන ඇති අතර මෙලෙස පොලිස් අත්අඩංගුවට ගෙන ඇති රියදුරු මුන්දලම ප්‍රෙද්ශයේ පදිංචි 59 හැවිරිදි පුද්ගලයෙකි.
පොලිස් අත්අඩංගුවට ගෙන ඇති ලොරි රථයේ රියදුර හෙට(22) කැකිරාව මහේස්ත්‍රාත් අධීකරණය වෙත ඉදිරිපත් කිරීමට නියමිත බව කැකිරාව පොලිසිය පවසයි.
කැකිරාව- ගනේවල්පොල මාර්ගය මෑතකදී අලුත්වැඩියා සිදුකළ එකක් වන අතර එම මාර්ගයේ මාර්ග සංඥා හෝ පදික මාරු යොදා නොතිබීම නිසා මෙවැනි අනතුරු සිදුවන බව මෙම අනතුර සම්බන්ධයෙන් අදහස් දැක්වූ ප්‍රෙද්ශවාසීහු පවසති. ඇඹුල්ගස්වැව මංසන්දිය නිරන්තරයෙන් පාසැල් සිසුන් ගැවසෙන ස්ථානයක් වන බැවින් බලධාරීන් ඒ සම්බන්ධයෙන් විශේෂ අවධානය යොමු කළයුතු බව ද එම මාර්ගයේ මාර්ග සංඥා කඩිනමින් යෙදිමට කටයුතු කළ යුතු බවද එම ප්‍රෙද්ශවාසීහු වැඩිදුරටත් පවසති.
ප්‍රෙද්ශය භාර උසස් පොලිස් නිලධාරීන්ගේ නියෝග අනුව කැකිරාව පොලිස් ස්ථානාධීපති ප්‍රධාන පොලිස් පරීක්ෂක සුමිත් මුණසිංහ මහතාගේ මෙහෙයවීම මත කැකිරාව පොලිස් රථවාහන අංශයේ වැඩ බලන ස්ථානාධීපති උප පොලිස් පරීක්ෂක බී හේරත් මහතාගේ ප්‍රධානත්වයෙන් පොලිස් සැරයන්වරුන් වන 36918- බණ්ඩාරනායක 51535- රාජකරුණා මගින් මෙම අනතුර සම්බන්ධයෙන් වූ වැඩි දුර විමර්ශණ සිදුකරයි.