24-03-21
කැකිරාව කුෂාන් ජයවර්ධන
අනුරාධපුර- නුවර වැවේ සැකකටයුතු මළ සිරුරක්
===========
ශරීරයේ ස්ථාන කිහිපයක තුවාල සහිත සැක කටයුතු ලෙස මියගිය පිරිමි පුද්ගලයකුගේ මළ සිරුරක් අනුරාධපුර නුවර වැවෙහි පාවෙමින් තිබියදී ඊයේ(20) සවස සොයා ගත් බව අනුරාධපුර පොලිසි පවසයි.
නුවර වැවෙහි මළ සිරුරක් තිබෙනු දැක ඇති ප්‍රෙද්ශවාසියකු කළ දැනුම් දීමක් අනුව පොලිස් ජීවිතාරක්ෂක කණ්ඩායමක් සිදුකළ සෝදිසි මෙහෙයුමකදී මෙම පුද්ගල මළ සිරුර සොයාගැනීමට හැකිවූ බව අනුරාධපුර පොලිසිය කියයි.
මියගොස් සිටින පුද්ගලයාගේ වයස අවුරුදු 35ත් 40ත් අතර වන බවට පොලිසිය අනුමාන කරයි. මළ සිරුරෙහි ස්ථාන කිහිපයක තුවාල කිහිපයක් ද දක්නට ඇති බවත්, මිය ගිය පුද්ගලයා කවුරුන්ද කිනම් ප්‍රෙද්ශයක ද යන්න මෙතෙක් තහවුරු කරගැනීමට නොහැකිවූ බවත්, පොලිසිය කියයි.
ඒ අනුව මෙය මනුෂ්‍ය ඝාතනයක්ද යන්න සැක සහිත බැවින්, එම අභිරහස් මරණය සම්බන්ධයෙන් සොය බැලීමට අනුරාධපුර පොලිස් ස්ථානය මඟින් මේ වනවිට පුළුල් විමර්ශණයක් ආරම්භ කර තිබේ.
අනුරාධපුර පොලිස් සොකෝ ඒකකයේ පරීක්ෂණ නිලධාරීන් කණ්ඩායමක් ද පැමිණ සිද්ධියට සම්බන්ධයෙන් ස්ථානීය පරීක්ෂණයක් ද සිදු කර තිබේ. ඊයේ (20) සවස එම ස්ථානයට පැමිණි අනුරාධපුර නාගරික හදිසි මරණ පරීක්ෂකවරයාගේ නියෝගය මත ඔහු ඉදිරියේ මළ සිරුර ගොඩ ගැනීමට පොලිසිය කටයුතු කර තිබිණ..
මළ සිරුර පරීක්ෂාවෙන් පසුව හදිසි මරණ පරීක්ෂකවරයා ලබා දුන් නියෝගයක් අනුව මළ සිරුර පශ්චාත් මරණ පරීක්ෂණය සඳහා අනුරාධපුර ශික්ෂණ රෝහලේ අධිකරණ වෛද්‍යවරයා වෙත යොමු කිරීමට පොලිසිය පියවර ගෙන තිබිණ.
අනුරාධපුර උසස් පොලිස් නිලධාරීන්ගේ නියෝග මත අනුරාධපුර මූලස්ථාන පොලිසියේ නිලධාරීන් කණ්ඩායමක් සිද්දිය සම්බන්ධයෙන් මේ වනවිට වැඩිදුර විමර්ශණ ආරම්භ කර තිබේ. .
