මිහින්තලය රජරට විශ්ව විද්‍යාලයේ සිසුන් ඉලක්ක කර ගනිමින් කාලාන්තරයක් තිස්සේ මත්පෙති අලෙවි කිරීමේ ජාවාරමක නිරත වූ බව කියන තරුණයින් දෙදෙනෙකු මත් පෙති තොගයක්ද සමඟ අත්අඩංගුවට ගැනීමට සුරාබදු නිලධාරීන් ඊයේ (24) රාත්‍රියේ සමත්ව තිබේ.

යුධ හමුදා බුද්ධි නිලධාරීන්ගේ තොරතුරකට අනුව සුුරාබදු නිලධාරීන් විසින් ඊයේ (24) රාත්‍රියේ මිහින්තලය ප්‍රදේශයේ දී සිදුකල විශේෂ මෙහෙයුමකදී මත්පෙති තොගයක්ද සමඟ එම සැකකරුවන් අත්අඩංගුවට ගැනීමට හැකිව තිබේ.

අදාළ සැකකාර තරුණයින් විශ්ව විද්‍යාල සිසුන්ට අලෙවි කිරීමට සූදානමි කල මත්පෙති තොගයක් ද රැගෙන මිහින්තලය රජරට විශ්ව විද්‍යාලය ආසන්නයේ වූ ලැගුම් හලක රාත්‍රි කාලයේ රැදී සිටියදී මෙලෙස සුරාබදු නිලධාරීන්ගේ අත්අඩංගුවට පත්ව තිබේ.

විශ්ව විද්‍යාල සිසුන්ට අලෙවි කිරීමට සුදානම් කර තිබූ මත් පෙති 700ක් ද එම සැකකරුවන් සන්තකයේ තිබී සොයාගැනීමට සුරා බදු නිලධාරීන් මෙහිදී සමත්ව තිබිණ.

මත්පෙති සමඟ මෙලෙස අත්අඩංගුවට පත් සැකකාර තරුණයින් මිහින්තලය මිස්සක පාර හා වෙදගෙදර මාාවත යන ප්‍රදේශවල පදිංචිකරුවෝ වෙති. රජරට විශ්ව විද්‍යාල සිසුන් ඉලක්ක කර ගනිමින් කාලාන්තරයක් තිස්සේ මත්පෙති අලෙවි කිරීමේ ජාවාරමේ නිරතව ඇති එම සැකකාර තරුණයින් අවුරුදු 28 හා 24 යන වයස්වල පසුවෙති.

මෙම මත් පෙති ජාවාරම සම්බන්ධයෙන් සුරාබදු නිලධාරීන් විසින් අත්අඩංගුවට ගෙන ඇති සැකකාර තරුණයින් අදාල මත්පෙති තොගය ද සමඟ අද (25) අනුරාධපුර මහේස්ත්‍රාත්වරයා හමුවට ඉදිරිපත් කිරීමට නියමිතව තිබේ.