ශිෂ්‍යත්ව ප්‍රතිඵල නැවත සමීක්ෂණය සඳහා පැමිණි ගුරුභවතුන්ට නිසිලෙස පහසුකම් සපයා නොමැති වීමෙන් අද (20) උදෑසන විභාග දෙපාර්තමේන්තුව අසල උණුසුම් තත්ත්වයක් හටගෙන තිබෙනවා.
දුර බැහැර පළාත්වලින් ප්‍රශ්න පත්‍ර ඇගයීම් කටයුතු වෙනුවෙන් පැමිණි ගුරුවරුන්ට නවාතැන් පහසුකම් ඇතුළු සෙසු පහසුකම් සපයා නොදීම හේතුවෙන් ඔවුන් ඊයේ (19) රාත්‍රිය වනතුරු නවාතැන් ස්ථාන සොයා ගැනීමට පවා නොහැකිව බොහෝ අපහසුතාවයට පත්වූ බවයි එම ගුරුවරුන් සඳහන් කරන්නේ.
අධික මුදලක් වැයකර නවාතැන් ස්ථාන සොයාගෙන මෙවැනි කටයුත්තක් සිදුකිරීම අපහසු බව පවසමින් ඔවුන් අද (20) ප්‍රශ්න පත්‍ර නැවත සමීක්ෂණ කටයුතුවලින් ඉවත්වූ බවයි සඳහන් වන්නේ.
පසුව විභාග දෙපාර්තමේන්තුවේ කොමසාරිස් ජනරාල්වරයා පැමිණ ගුරුවරුන්ව නැවත සමීක්ෂණ කටයුතු සඳහා රැගෙන යෑමට සහ ගැටලුව විසඳීමට මැදිහත් වූ බවයි වැඩිදුරටත් සඳහන් වන්නේ.
