2019 විසර්ජන පනත් කෙටුම්පතේ අවසන් ඡන්ද විමසීම ලබන අප්‍රේල් මස 04 වන දින සිදු කිරීමට නියමිත බව මුදල් හා ජනමාධ්‍ය අමාත්‍යංශය පවසයි. 2019 විසර්ජන පනත අනුමැතිය සඳහා ලබන සතියේ අමාත්‍ය මණ්ඩලය වෙත ඉදිරිපත් කරනු ලබන අතර එය මුදල් හා ජනමාධ්‍ය අමාත්‍ය මංගල සමරවීර මහතා විසින් පෙබරවාරි 05දින පාර්ලිමේන්තුවට ඉදිරිපත් කිරීමට නියමිතයි. අයවැය දෙවන වර කියවීම මාර්තු මස 05 වන දින සිදුකරන අතර තුන්වන වර කියවීමේ විවාදය මාර්තු මස 13වන දින සිදු කිරීමට නියමිතය. 2019 වසරේ නව අයවැය සම්මත කර ගන්නා තෙක් මුල් කාර්තුවේ රජයේ වියදම් පියවා ගැනීම සඳහා ආණ්ඩුව විසින් ඉකුත්දා පාර්ලිමේන්තුවේදී අතුරු සම්මත ගිණුමක් සම්මත කර ගත් අතර 2019 වසර සඳහා වන අයවැය ප්‍රධාන වශයෙන් කාර්ය සාධනය මත පදනම් වූ අයවැයක් ලෙස ඉදිරිපත් කිරීමට රජය බලාපරොත්තු වන බව එම අමාත්‍යංශය වැඩිදුරටත් සදහන් කරන ලදී.
2019 වර්ෂය සඳහා ඉදිරිපත් කිරීමට නියමිත නව අයවැය මගින් රාජ්‍ය ආදායම දළ දේශීය නිෂ්පාදිතයෙන් 17%කට වඩා වැඩි අගයක් දක්වා වර්ධනය කිරීම නව රජයේ අපේක්ෂාව වන අතර ඒ අනුව අමාත්‍යාංශවල වැය ශීර්ෂ සඳහා ප්‍රතිපාදන වෙන් කරනු ලබනුයේ අදාළ අමාත්‍යාංශ මගින් ක්‍රියාත්මක කරනු ලබන ව්‍යාපෘති සහ වැඩසටහන් සඳහා ක්‍රියාකාරි සැලසුම් ඉදිරිපත් කිරීමේ පදනම මතය. රාජ්‍ය ආදායම් ප්‍රතිශතය තව දුරටත් වර්ධනය කර ගනිමින් 2019 වර්ෂයේ එය 17% දක්වා වැඩි කිරීමට රජය අපේක්ෂා කරයි. එමෙන්ම පුනරාවර්තන වියදම්, දළ දේශිය නිෂ්පාදිතයෙන් 15%ප්‍රතිශතයකට සීමා කිරීම, රජයේ ආයෝජන දළ දේශීය නිෂ්පාදනයෙන් 3.5% ක ප්‍රතිශතයක පවත්වාගෙන යාම, අයවැය හිඟය දළ දේශිය නිෂ්පාදිතයෙන් 3.5% ප්‍රතිශතයකට සීමා කිරීම සහ රාජ්‍ය ණය දළ දේශීය නිෂ්පාදිතයෙන් 70%ක ප්‍රතිශතයකට වඩා අඩුවෙන් පවත්වාගෙන යාමත් අපේක්ෂා කරනු ලබයි.
සටහන – පබසරා රාජකරුණා
