මිලි මීටර් 40 මල්ටි ග්රෙනේඩ් ලොන්චරයට භාවිතා කරන බෝම්බ පතුරම් 06ක් අඩංගු පාර්සලයක් හබරණ පොලොන්නරුව මාර්ගයේ බෝක්කුවක් යට තිබී අද (25) සවස සොයා ගත් බව හබරණ පොලිසිය පවසයි.
මාර්ගය සුද්දපවිත්ර කිරීමේ රාජකාරිවල නිරතව සිටි මාර්ග සංවර්ධන අධීකාරියේ හබරණ කාර්යාලයේ කම්කරුවන් පිරිසක් කළ දැනුම්වත් කිරීමක් අනුව හබරණ පොලිස් ස්ථානයේ නිලධාරීන් පිරිසක් විසින් එම පතුරම් අඩංගු පාර්සලය සොයා ගෙන තිබේ.
හබරණ පොලිස් ස්ථානයේ අපරාධ අංශයේ ස්ථානාධිපති පො.ප. විමල් සිරිවර්ධන මහතා ඇතුළු නිළධාරින් කණ්ඩායමක් විසින් සිදුකළ ස්ථානීය පරීක්ෂාවකදී එම පතුරම් අඩංගු පාර්සලය සොයා ගත් බවත්, එම පාර්සලය තුළ තිබී මිලි මීටර් 40 මල්ටි ග්රෙනේඩ් ලොන්චරයට භාවිතා කරන බෝම්බ පතුරම් 06 ක් සොයා ගැනීමට හැකි වූ බවත් පොලිසිය කියයි.
මෙම සිද්දිය සම්බන්ධයෙන් හිඟුරක්ගොඩ මහේස්ත්රාත් අධීරණයට කරුණු වාර්ථා කිරීමට පොලිසිය කටයුතු කර තිබේ. එහිදී අධීකරණයෙන් පොලිසියට ලත් නියෝගයක් අනුව එම බෝම්බ පතුරම් 06 නිෂ්ක්රීය කිරීමට නියමිත අතර, කුරුණෑගල පොලිස් විශේෂ කාර්ය බලකා නිලධාරීන් විසින් හෙට(26) දින එම පතුරම් නිශ්ක්රීය කිරිමට හබරණ පොලිසිය කටයුතු යොදා තිබේ.
එම බෝම්බ පතුරම් අඩංගු පාර්සලය එම ස්ථානයට කවුරුන් විසින් රැගෙනවිත් දමා ඇතිදැයි යන්න හා එම සැකකරුවන් කවුරුන්දැයි යන්න අනාවරණය කර ගැනීම සඳහා පොලිස් විමර්ෂණ ආරම්භ කර තිබේ. හබරණ පොලිස් ස්ථානය මගින් එම වැඩිදුර විමර්ශන සිදු කෙරේ.
කැකිරාව – කුෂාන් ජයවර්ධන
