දිට්වා සුළි කුණාටුවෙන් සිදුවූ ආපදාවට හෙට දිනය වනවිට මාස තුනක් සපිරෙන නමුත්, එහි බලපෑමට ලක්වූ බොහෝ පිරිසක් අදටත් දැඩි පීඩාවකට මුහුණ දෙමින් සිටිති.
මෙම පුවත ආපදාවෙන් නිවාස අහිමිව, තෙමසක් මුළුල්ලේම තාවකාලික කූඩාරම්වල ජීවත්වන පවුල් කිහිපයක් පිළිබඳවයි.
දිට්වා සුළි කුණාටුව සමඟ ඇතිවූ නායයෑම් හා ගංවතුර හේතුවෙන් නුවරඑළිය දිස්ත්රික්කයේ රේන්දපොළ, ගහ්ගල ප්රදේශවලට දැඩි හානි සිදුවිය. එහිදී හග්ගල වතුයාය ප්රදේශයේ පවුල් 23ක් අවතැන් විය.
අවතැන් වූ මෙම පවුල්වල සාමාජිකයන් තාවකාලික කූඩාරම්වල රැඳවීමට නුවරඑළිය දිස්ත්රික් ආපදා කළමනාකරණ ඒකකය විසින් පියවර ගෙන තිබුණි.
කෙසේ වෙතත්, ආපදාවට මාස තුනක් සපිරෙන මෙම අවස්ථාවේදීත්, එම පවුල්වලට තවමත් ස්ථිර නවාතැන් පහසුකම් හිමි වී නොමැති අතර, ඔවුන්ට තාවකාලික කූඩාරම්වලම දිවි ගෙවීමට සිදුව ඇත.
නුවරඑළියේ වරින්වර වෙනස්වන ශීතල කාලගුණ තත්ත්වයන් මධ්යයේ, ජීවත්වීමට අවශ්ය අවම පහසුකම් පවා නොමැතිව ඔවුන් පීඩා විඳිමින් සිටින බව සඳහන් වේ.
දවස පුරා වතු කම්කරු සේවයේ නිරත වන මෙම ජනතාවට බීමට පානීය ජලය හා සනීපාරක්ෂක පහසුකම් සපයා නොමැති අතර, එම අවශ්යතා සපුරාලීමට සැතපුම් ගණනක් පයින් ගමන් කිරීමට සිදුව ඇති බවත් ඔවුන් පවසති.
මේ වනවිට ජීවිතය සඳහා දැඩි අරගලයක නිරත මෙම පවුල් රජයෙන් ඉල්ලා සිටින්නේ, ස්ථිර නිවාස ඉදිකර දෙන තෙක් තමන් මෙම කූඩාරම්වලින් ඉවත් කර සුදුසු ස්ථානයක පදිංචි කරවීමට කාරුණික වන ලෙසයි.
