දිවයිනට පැමිණ සිටින ඉන්දීය යුද හමුදාධිපති ජෙනරල් උපේන්ද්ර ද්විවේදි ඇතුළු දූත පිරිස අද (7) ශ්රී ලංකා යුද හමුදා මූලස්ථානයේ නිල සංචාරයක නිරත වූහ.
මෙහිදී ඉන්දීය යුද හමුදාධිපතිවරයාව යුද හමුදාධිපති ලුතිනන් ජෙනරල් ලසන්ත රොද්රිගෝ විසින් පිළිගන්නා ලද අතර, ඊට පෙර යුද හමුදා භටපිරිස් විසින් ඉන්දියානු යුද හමුදාධිපති වෙත හමුදා සම්ප්රදායානුකූල සම්මාන මුරයේ ගෞරවාචාරය පිරිනමන ලදී.
ඉන් අනතුරුව දෙරට යුද හමුදාධිපතිවරු අතර සුහද හමුවක් පැවැති අතර, එය අවසන්වීමෙන් පසු ඉන්දියානු ආධාර බුත්තල යුද හමුදා යුධ විද්යාලයේ ඉදි කිරීමට යෝජිත ඉන්දු – ලංකා ක්රීඩා සංකීර්ණයේ ඉදිකිරීම් සඳහා වූ ගිවිසුම අත්සන් කරනු ලැබීය.
මෙහිදී ශ්රී ලංකාවට බළපෑ ආපදා තත්ත්වය තුළදී සක්රීයව දායකත්වය දැක්වූ යුද හමුදා ප්රතිචාර කණ්ඩායම්වල සාමාජිකයින්ගේ විශිෂ්ට හා කැපවූ සේවය ඇගයීම සඳහා සංවිධානය කරන ලද උත්සවයකටද ඉන්දීය යුද හමුදාපතිවරයා සහභාගි විය.
මේ අතර මහින්ද්රා ස්කොර්පියෝ වර්ගයේ වාහන 20ක්, පුහුණු සමාකෘති සහ ගිලන් රථ 2ක් නිල වශයෙන් ශ්රී ලංකා යුධ හමුදාව වෙත ප්රදානය කිරීමද සිදුවිය.
මෙම අවස්ථාව සඳහා යුද හමුදා ජ්යෙෂ්ඨ නිලධාරීන්, නිලධාරීන් සහ සෙසුනිලයන් පිරිසක් සහභාගි වූහ.
යුද හමුදා මූලස්ථානයේ නිල සංචාරයට පෙර ජෙනරල් උපේන්ද්ර ද්විවේදි මහතා ආරක්ෂක සේවා අණ සහ මාණ්ඩලික විද්යාලය වෙත පැමිණියේය.
එහිදී ඉන්දියානු යුද හමුදාධිපති විසින් එම විද්යාලයීය පුස්තකාලයේ ‘ඉන්දියානු අංශය’ විවෘත කළ අතර, විද්යාලය වෙත ගිලන් රථයක් ද පරිත්යාග කළේය.
එමෙන්ම, ඉන්දියානු යුද හමුදාධිපති බත්තරමුල්ල ඉන්දීය සාම සාධක හමුදා ස්මාරකය වෙත පුෂ්පෝපහාර දක්වමින් දිවිපිදූ ඉන්දීය හමුදා සාමාජිකයන් වෙත ගෞරවාචාර පිදීමකටද එක්විය.
