රට තුළ පවතින සෞඛ්ය අර්බුදය සම්බන්ධයෙන් සියලු පාර්ශව දැනුවත් කිරීමේ විශේෂ වැඩසටහනක් අද (04) සිට ආරම්භ කිරීමට රජයේ වෛද්ය නිලධාරීන්ගේ සංගමය තීරණය කර තිබෙනවා.
ඒ අනුව පවතින සෞඛ්ය අර්බුදය සම්බන්ධයෙන් දේශපාලන පක්ෂ, ආගමික නායකයින් සහ සිවිල් සංවිධාන ඇතුළු පාර්ශව දැනුවත් කිරීමට කටයුතු කරන බවයි එම සංගමයේ මාධ්ය ප්රකාශක වෛද්ය චමිල් විජේසිංහ සඳහන් කළේ.
පවතින සෞඛ්ය අර්බුදය සම්බන්ධයෙන් සමාජයට තුළ නිසි අවබෝධයක් ඇති කිරීම වෙනුවෙන් මෙම වැඩපිළිවෙල දිවයින පුරා ක්රියාත්මක කරන බවයි ඔහු වැඩිදුරටත් සඳහන් කළේ.
පවතින අයහපත් කාලගුණ තත්ත්වයත් සමඟ රත්නපුර දිස්ත්රික්කයේ ඇහැළියගොඩ ප්රදේශීය ලේකම් කොට්ඨාසයට නායයෑමේ රතු නිවේදනයක් නිකුත් කර තිබෙනවා.
එසේම කළුතර දිස්ත්රික්කයේ බුලත්සිංහල ඉංගිරිය ප්රාදේශිය ලේකම් කොට්ඨාසවලට, කෑගල්ල දිස්ත්රික්කයේ වරකාපොල ප්රාදේශිය ලේකම් කොට්ඨාසය සහ රත්නපුර දිස්ත්රික්කයේ කුරුවිට සහ රත්නපුර ප්රාදේශිය ලේකම් කොට්ඨාසවලට අදියර 2 යටතේ අවධානයෙන් සිටින ලෙස අනතුරු ඇඟවීමක් සිදුකර ඇති බවද සඳහන්.
මේ අතර ගාල්ල දිස්ත්රික්කයේ බද්දේගම, නාගොඩ, ඇල්පිටිය කළුතර දිස්ත්රික්කයේ මතුගම, පාලින්දනුවර, වලල්ලාවිට, කෑගල්ල දිස්ත්රික්කයේ දැරණියගල, බුලත්කොහුපිටිය, යටියන්තොට, දෙහිඕවිට, රුවන්වැල්ල සහ රත්නපුර දිස්ත්රික්කයේ කලවාන, කිරිඇල්ල, අයගම ප්රාදේශිය ලේකම් කොට්ඨාසවලට අදියර 1 යටතේ විමසිලිමත් වන ලෙස ජාතික ගොඩනැගිලි පර්යේෂණ ආයතන විසින් අනතුරු ඇඟවීමක් නිකුත් කර තිබෙනවා.
සමනල වැව ජලාශයෙන් ජලය කාන්දුවන ස්ථාන වසා දැමීමේ කටයුුතු එළඹෙන සතිය තුළ ආරම්භ කරන බව ලංකා විදුලිබල මණ්ඩලය පවසනවා.
මේ අවස්ථාවේ කාන්දු වසා දැමීමට පියවර නොගතහොත් ඊට යළි අවස්ථාවක් උදා නොවනු ඇති බවයි පේරාදෙණිය විශ්වවිද්යාලයේ ජ්යෙෂ්ඨ කථිකාචාර්ය ආචාර්ය ජගත් ගුණතිලක මහතා ජලාශයේ නිරීක්ෂණයකට එක්වෙමින් සඳහන් කළේ.
මිලියන 10-15 අතර මුදලකින් මෙහි ජල කාන්දුවන ස්ථානය වසා දැමිය හැකි බවයි ඔහු වැඩිදුරටත් සඳහන් කළේ.
ජාතික ඉන්ධන අවසරපත් QR ක්රමවේදය ඉදිරියේදී තවත් උසස් තාක්ෂණික ක්රමවේදයන් සමග වැඩිදියුණු කර, දත්ත එක්කිරීම වෙනුවෙන් සහ දත්ත විශ්ලේෂණය වෙනුවෙන් භාවිතා කරන මෙවලමක් ලෙස ක්රියාත්මක කිරීමට බලාපොරොත්තු වන බව විදුලි බල හා බලශක්ති අමාත්යංශය පවසනවා.
ඒ අනුව QR ක්රමවේදය පසුගිය වසරේ හදුන්වාදීමේ අරමුණ වූයේ, ඒ අවස්ථාවේ පැවති ඉන්ධන අර්බුදය සහ ආර්ථික අර්බුදයට පිළියමක් ලෙස පැවති සම්පත් කළමනාකරණය කරමින් බෙදා හැරීමේ වැඩපිළිවෙළක් ලෙස ක්රියාත්මක කිරීම බවයි අමාත්ය කංචන විජේසේකර පෙන්වා දෙන්නේ.
පෙරේදා දින වන විට QR ක්රමවේද පද්ධතියේ ලක්ෂ 65ක් ඉක්මවූ පිරිසක් සහ රථ වාහන සංඛ්යාවක් ලියාපදිංචිය සහ එම පද්ධතිය හරහා ඉන්ධන බෙදා හැරීමේ ගනුදෙනු ලක්ෂ 3,500ක් ඉක්මවා සිදුකර තිබෙන බවද සඳහන්.
පසුගිය කාලය තුළ රජය විසින් ගත් ප්රතිපත්ති තීරණ, හඳුන්වාදුන් ඉන්ධන මිල සූත්රය, ඉන්ධන වෙළෙඳපොළට නව බෙදුම්කරුවන් එකතු වීම යන කරුණු මඟින් ඉන්ධන ආනයනයට අවශ්ය මූල්ය අවශ්යතාවන් කළමනාකරණය වී ඇති බැවින් QR කේතය තවදුරටත් අවශ්ය නොවන බවයි කංචන විජේසේකර අමාත්යවරයා වැඩිදුරටත් සඳහන් කළේ.
ශ්රී ලංකා මහ බැංකු අධිපති ආචාර්ය නන්දලාල් වීරසිංහ 2023 ලොව ‘A-‘ ශ්රේණියේ මහ බැංකු අධිපතිවරුන් 21දෙනා අතරට නම් කර තිබෙනවා.
1994 වසරේ සිට ක්රියාත්මක ග්ලෝබල් ෆිනෑන්ස් සඟරාව විසින් සිදුකරන ලද වාර්ෂික සමීක්ෂණයට අනුව ආචාර්ය නන්දලාල් වීරසිංහ මෙලෙස ‘A-‘ ශ්රේණියේ මහ බැංකු අධිපතිවරුන් අතරට ඇතුළත් කර ඇති බවයි සඳහන් වන්නේ.
උද්ධමනය පාලනය, ආර්ථික වර්ධනය, මූල්ය ස්ථාවරත්වය හා පොලී අනුපාත කළමනාකරණය යනාදියේ සුවිශේෂී කාර්යය සාධනය සැලකිල්ලට ගනිමින් මෙලෙස ශ්රේණිගත කිරීම සිදුකර ඇති බවයි සඳහන් වන්නේ.
මූල්ය ව්යාපාර කරගෙන යාමට මුදල් ව්යාපාර පනත යටතේ බිම්පුත් ෆිනෑන්ස් පීඑල්සී වෙත නිකුත් කර ඇති බලපත්රය අවලංගු කිරීමට මුදල් මණ්ඩලය තීරණය කර තිබෙනවා.
ඒ අනුව 2011 අංක 42 දරන මුදල් ව්යාපාර පනත යටතේ බලපත්රලාභී මුදල් සමාගමක් ලෙස ක්රියාත්මක වූ බිම්පුත් ෆිනෑන්ස් පීඑල්සී ආයතනය එම පනතේ ප්රතිපාදනයන් සහ ඒ යටතේ නිකුත් කරන ලද විධාන සහ නීති ගණනාවක් අඛණ්ඩවම කඩ කරමින් / පටහැනි ලෙස කටයුතු කර ඇති බවයි මහ බැංකුව පෙන්වා දෙන්නේ.
එහි ප්රතිඵලයක් ලෙසින් ප්රාග්ධන ඌණතාවය, වත්කම් වල අඩු ගුණාත්මක මට්ටම හා අඛණ්ඩ අලාභ ලැබීම හේතුකොට ගෙන සමාගමේ මූල්ය තත්ත්වය පරිහානියට පත් වී තිබෙනවා.
ඒ අනුව, බිම්පුත් ෆිනෑන්ස් පීඑල්සී හට අද (01) දිනයේ සිට ක්රියාත්මක වන පරිදි මූල්ය ව්යාපාරවල නිරත වීමට අවසර නෙමැති බවයි මහ බැංකුව වැඩිදුරටත් සඳහන් කරන්නේ.
බහාලුම් ප්රවාහන ගාස්තු අද (01) මධ්යම රාත්රියේ සිට ක්රියාත්මක වන පරිදි ඉහළ දැමීමට තීරණය කර තිබෙනවා.
ඒ අනුව එම ගාස්තු 5% කින් වැඩි කෙරෙන බව බහාලුම් ප්රවාහනය කරන්නන්ගේ සංගමය වැඩිදුරටත් සඳහන් කළේ.
මාලිගාවත්ත ප්රදේශයේදී සිදුකළ වෙඩිතැබීමකින් තුවාල ලැබූ පුද්ගලයෙකු රෝහල්ගතකර ඇති බව පොලීසිය පවසනවා.
ඒ අනුව යතුරුපැදියකින් පැමිණි දෙදෙනෙකු විසින් මෙම වෙඩිතැබීම සිදුකර පළාගොස් ඇති බවයි පොලීසිය වැඩිදුරටත් සඳහන් කළේ.
බංග්ලාදේශයෙන් ශ්රී ලංකාව ලබා ගත් ඩොලර් මිලියන 200 ක විනිමය හුවමාරු පහසුකමට අදාළ දෙවන වාරිකය ද ගෙවා ඇති බව බංග්ලාදේශ මාධ්ය වාර්තා කර තිබෙනවා.
ඒ අනුව දෙවන වාරිකය වශයෙන් ඩොලර් මිලියන 100 ක් ගෙවා ඇති බවයි එම මාධ්ය වාර්තා සඳහන් කරන්නේ.
පසුගිය මාසයේ දී මෙම විනිමය හුවමාරු ණය පහසුකමෙහි පළමු වාරිකය ලෙස ඩොලර් මිලියන 50ක් ශ්රී ලංකාව විසින් ගෙවීමට කටයුතු කර තිබුණා.
ජාතික ඉන්ධන බලපත්රය හෙවත් ඉන්ධන QR ක්රමවේදය අද (01) අහෝසි කිරීමට තීරණය කළ බව විදුලිබල හා බලශක්ති අමාත්ය කංචන විජේසේකර පවසනවා.
ඒ අනුව පාරිභෝගිකයන්ට සාමාන්ය පරිදි ඉන්ධන ලබා ගැනීමේ හැකියාව පවතින බවයි අමාත්යවරයා සඳහන් කරන්නේ.
