පාතාලයේ බිහිසුනු ක්‍රියාකාරකම් හේතුවෙන් හිටපු ජනාධිපති මහින්ද රාජපක්ෂ මහතා, දේශපාලඥයින් ඇතුළු සමස්ත මහජනතාවගේ ජිවිතවලට තර්ජනයක් එල්ල වී ඇතැයි පාර්ලිමේන්තු මන්ත්‍රී ඩලස් අලහප්පෙරුම මහතා පැවසීය.
බන්ධනාගාර නිලධාරීන් දෙදෙනෙකුට මරු කැදවමින් අධිකරණයට ගෙන යමින් සිටි සමයන් නැමැති පාතාල සාමාජිකයා ඇතුළු තවත් සැකකරුවන් පිරිසක් පාතාල සාමාජිකයින් පිරිසක් විසින් මරා දමා ඇත්තේ බිහිසුනු අයුරින් බවද ඒ මහතා පැවසීය.
බස්නාහිර පළාත කේන්ද්‍ර කරගනිමින් ක්‍රියාත්මක වූ පාතාලය සහ උතුරේ ත්‍රෂ්තවාදය අවසන් කිරිමට පසුගිය රජය ක්‍රියාකළ හෙයින් පාතාල නායකයින් තොග පිටින් රට අතහැර ගිය නමුත් වත්මන් රජය බලයට පැමිණීමත් සමග රට අතැර ගිය පාතාල සාමාජිකයින්ව ආණ්ඩුවේම සමහර නායකයින් විසින් නැවතත් මෙරටට ආනයනය කර ඇතැයිද ඒ මහතා පැවසිය.
පාතාල ක්‍රියාකාරකම් සම්බන්ධයෙන් පාර්ලිමේන්තුවේදි තමන් ප්‍රශ්න කළ අව්ථාවේ නිතිය හා සාමය පිළිබද අමාත්‍යවරයා 2015 වසරේදී පාතාල ක්‍රියාකාරකම් හේතුවෙන් ඝාතන 443කුත් 2016 සැප්තැම්බර් වන විට ඝාතන 334ක්තු සිදුව ඇති බව ප්‍රකාශ කල බවත් එම ඝාතනවලින් 156ක්ම ස්වයංක්‍රීය ගිනි අවි මගින් සිදු කළ ඝාතන බව ඇමැතිවරයා පැවසූ බවත් එහිදී ඩලස් අලහප්පෙරුම මහතා සදහන් ක‍ලේය.
මේ දිනවල පොලීසිය රාජපක්ෂ පවුලෙග් රත්තරන් අශ්වයෝ, අයථා වාහන භාවිතය ආදී ආණ්ඩුවේ දේශපාලන ඉලක්ක දඩයම් කිරීමේ යෙදී ඇති හෙයින් පොලීසියේ රාජකාරි ඉටුනොකරන බවත් මෙම සිද්ධියට හේතු වූයේ පොලිස් ආරක්ෂාව නොදීම යැයි බන්ධනාගාර විෂය භාර අමාත්‍යවරයාම චෝදනා කරන බවත් ඒ මහතා සදහන් ක‍ලේය.
පොලිස් නිලඇදුමින් සැරසී, ස්වයංක්‍රීය ගිනි අවි ගෙන පාතාල සාමාජිකයින් පැමිණ මේ ආකාරයෙන් ඝාතනය කිරීම් නිසා හිටපු ජනාධාපති මහිනද රාජපක්ෂ මහතා, හිටපු ආරක්ෂක ලේකම් ගෝඨාභය රාජපක්ෂ මහතා, මෙන්ම රක්ෂිත බන්ධනාගාරගත කර සිටින පාර්ලිමේන්තු මන්ත්‍රී විමල් විරවංශ මහතාත් අනාරක්ෂිත තතත්වයකට පත්ව ඇතැයිද ඒ මහතා පැවසීය.
සමයන්ගේ සහ අංගොඩ ලොක්කාගේ ගැටුමකට පමණක් මේ සිද්ධිය ලඝු නොකොට පාතාලයේ හිස එසවීම හේතුවෙන් සමස්ත පුරවැසියාම පාතාල ක්‍රියාකාරකම් වැඩිවිම හේතුවෙන් අනාරක්ෂිත තත්ත්වයකට පත්වීම සම්බන්ධයෙන් රජයේ අවධානය යොමුවිය යුතුව ඇතැයි ද ඒ මහතා වැඩිදුරටත් පැවසීය.
ඒ මහතා මෙසේ පැවසුවේ ඊයේ (28) බොරැල්ල ඇන්. ඇම්. පෙරේරා කේන්ද්‍රයේ පැවැති ජනමාධ්‍ය හමුවේදීය.
