මේ අපේ සිනමාවෙ God Father ගැන කතාවක්. අදහා ගන්න බැරි දුක හිතෙන කතාවක්. රේඛාවෙන් සිංහල සිනමාව අලුත් රේඛාවකට යොමු කරමින් දේශීය සිනමාව ජාත්‍යන්තරයට ගෙනියන්න දර දිය ඇදපු ලෙස්ටර් ජේම්ස් පීරිස් ප්‍රවීණයාණන් ඉකුත් දිනවල මුහුණ දුන්නෙ නොසිතූ විරූ ඇබැද්දියකට.
ඔහු තමන්ගෙ ආදරණීය බිරිද සුමිත්‍රා පීරිස් සමග දිවි ගෙවූ නිවස එහි හිමිකරුවන් විසින් මේ අයට නොදන්වාම වෙනත් සමාගමකට විකුණලා.නීතිඥ මහත්වරු පිරිසක් ඇවිත් මේ බව කියනතුරුම මේ ප්‍රවීණ කලාකරු යුවල ඒ ගැන හාංකවිස්සියක්වත් දැනගෙන ඉදලා නැහැ.මේ කියන නිවස පිහිටලා තිබෙන්නෙ ඉස්සර ඩික්මන්ස් පාර නමින් ප්‍රසිද්ධ දැන් ලෙස්ටර් ජේම්ස් පීරිස් මාවත නමින් හදුන්වන සුප්‍රකට පෙදෙසේ.
ලෙස්ටර් ජේම්ස් පීරිස් මහතාගේ ආදරණීය බිරිද මෙන්ම සම්මානනීය සිනමා අධ්‍යක්ෂවරියක් වන සුමිත්‍රා පීරිස් මහත්මිය මේ අලකලංචිය ගැන බොස්ටන් ලංකා වෙත අදහස් පළ කළේ මේ විදියට.
“පසුගිය ඔක්තෝබර් මාසෙ ප්‍රමුඛ පෙළේ නීතිඥ සමාමකින් අපිට ලිපියක් ලැබුණා. ඒ ලිපිය මගින් දැනුම් දී තිබුණේ අප ජීවත් වෙන නිවස දේපළ සංවර්ධන සමාගමකට විකුණා ඇති බවත් මින් පසු අප නිවාස කුලී ගෙවිය යුත්තේ එම සමාගමට බවත්.
අපි මේ නිවසේ වසර 48ක් පුරා ජීවත් වෙනවා.එදා ඉදන්ම නියමිත පරිදි නිවාස කුලී ගෙවමින් අපි නිවසේ හිමිකරුවන් සමග සුහදව කටයුතු කළා.මං හිතන්නෙ එයාලට මොකක්හරි සල්ලි හදිස්සියක් ඇවිත් මේ වගේ තීරණයක් ගත්තා වෙන්න ඇති. නමුත් මේ සිද්ධිය අපිට ලොකු කම්පනයක් ඇති කළා.දැන් තවදුරටත් අපිට මෙහි පදිංචිව සිටීම ගැන අවිනිශ්චිත හැගීමක් ඇති දැනෙනවා.”
මේ කම්පනය දරාගන්න බැරිවෙන බව දන්න නිසාම ඇය තම ආදරණීය සැමියා ලෙස්ටර් ජේම්ස් පීරීස් මහත්මයට මේ ගැන කිසිවක් කියලා නැහැ.
“එයාට අපි මේවා කියන්න ගියෙ නැහැ. අපිට ඉස්සර කෝට්ටෙ අපේම නිවසක් තිබුණා. ඒක විශාල මුදලකට විකුණලා සිනමා නිර්මාණ වෙනුවෙන් ඒ මුදල් යෙදෙව්වා.ඒ ඇර අපිට වෙනත් නිවසක් හෝ දේපලක් නැහැ.මේ වන විට විජයදාස රාජපක්ෂ මහතා මේ ගැටළුවට නීතිමය විසදුමක් ලබා ගන්න සහය වීම සදහා මැදිහත් වෙලා ඉන්නවා.එය අපිට ලොකු ශක්තියක්.
මෙය ගොඩක් වටින නිවසක්.එනිසා අපිට මෙහි අයිතිය ලබා දෙන්න කියලා අපි ඉලල්න්නෙ නැහැ. අපි දැන් ඉන්නෙ ගෙවල් මාරු කරන්න පුළුවන් වයසක නෙවෙයි. මෙතෙක් කලක් හිටපු විදියටම නියමිත ගෙවීම් කරමින් මේ නිවසේ අපිට ජීවත් වෙන්න ඉඩ ලබා දෙන්න කියලා තමයි ඉල්ලන්නෙ.”
සටහන – නිරාශා පියවදනි පින්නවල
