නිදහසට කරුණු නොකියා, ගෙවීම පැහැරහැර තිබෙන බව කියන රුපියල් මිලියන 5800ක වැට් බදු මුදල වහාම ගෙවා අවසන් කරන ලෙස කොළඹ මහේස්ත්රාත් අධිකරණය අද (26) ඩබ්ලිව්. එම්. මෙන්ඩිස් සහ සමාගමේ අධ්යක්ෂවරුන්ට නියම කර තිබේ.
මෙම නඩුව කොළඹ අතිරේක මහේස්ත්රාත් ඕෂධ මිගාර මහාරච්චි මහතා ඉදිරියේ කැඳවනු ලැබූ අවස්ථාවේදී එහි විත්තිකරු වශයෙන් නම් කර සිටින අදාළ සමාගමේ අධ්යක්ෂ අර්ජුන් ඇලෝසියස් අධිකරණය හමුවේ පෙනී සිටියේය.
එහිදී විත්තිකාර සමාගමේ අධ්යක්ෂකවරුන් වෙනුවෙන් පෙනී සිටි නීතිඥවරයා අධිකරණයට කරුණු දක්වමින් කියා සිටියේ හිඟවී ඇති බදු මුදල්වලින් කොටසක් මේ වනවිට ගෙවා ඇති බවය.
මේ වනවිට විත්තිකාර සමාගමේ දේපළ තහනමට ගෙන අදාළ දේපොළ බැංකුවලට සින්නවී ඇති බව පෙන්වා දුන් එම නීතිඥවරයා මුදල් ගෙවූ ලේඛන සොයාගැනීමට නොහැකි වී ඇති බව කියා සිටියේය.
එහිදී දේශීය ආදායම් කොමසාරිස්වරයා වෙනුවෙන් පෙනී සිටි නීතිඥ දිනේෂ් පෙරේරා කියා සිටියේ අදාළ බදු මුදල් ගෙවා තිබේ නම් ඊට අදාළ ලේඛන ඉදිරිපත් කළ යුතු බවය.
අදාළ ලේඛන සොයාගැනීමට නොහැකි බවට ප්රකාශ කිරීම නිදහසට කරුණක් නොවන බවත් ඔහු කියා සිටියේය.
බදු ගෙවිය යුතු කාලය ඉක්මවා ගොස් ඇති නිසාත් විශාල බදු මුදල් ප්රමාණයක් නොගෙවා පැහැරහැර හිඟ තබා ඇති නිසාත් විත්තිකරුට තවදුරටත් සහන සලසා දීමට හැකියාවක් නොමැති බවත් නීතිඥවරයා පැවසීය.
ඉදිරිපත්වූ කරුණු සලකා බැලූ අතිරේක මහේස්ත්රාත්වරයා විත්තිකාර සමාගම විසින් බදු මුදල් ගෙවිය යුතු කාලය ඉක්මවා ගොස් ඇති බව පෙන්වා දුනි.
ඒ අනුව අදාළ බදු මුදල් වහාම ගෙවා අවසන් කරන ලෙස විත්තිකරුවන්ට නියෝග කල අතිරේක මහේස්ත්රාත්වරයා බදු මුදල් නැවතත් ප්රමාදයකින් තොරව ගෙවන්නේද? නැද්ද? යන්න පිළිබඳව ඉදිරි නඩු දිනයේ ස්ථිර ලෙස කරුණු දක්වන ලෙසත් නියම කළේය.
ඉන් අනතුරුව මෙම නඩුකරය සැප්තැම්බර් 30 වනදා යළි කැඳවන ලෙසත් මහේස්ත්රාත්වරයා නියෝග කළේය.
