ගල්කිරියාගම ජාතික නාමල් උයනේ 33 වන සංවත්සරය නිමිත්තෙන් ජපන් ජාතිකයින් විසින් සංවිධානය කරනු ලබන කිලෝ මීටර් 100ක පරිසර පා ගමන හෙට(08) උදෑසන ජාතික නාමල් උයනේදී ආරම්භ කිරීමට නියමිතව තිබේ.

ජාතික නාමල් උයන නිර්මාතෘ පූජ්‍ය වනවාසී රාහුල හිමියන්ගේ අනුශාසකත්වයෙන්, ජපානයේ NPO Happy New Earth සංවිධානයේ මූලිකත්වයෙන් සංවිධානය කරනු ලබන මෙම පරිසර පා ගමන සංවිධානය කර තිබේ. හෙට (08) උදෑසන 08.00 ට ගල්කිරියාගම ජාතික නාමල් උයන පරිශ්‍රයෙන් ආරම්භ කෙරෙන එම පා ගමන, ලබන 12 වැනිදා සීගිරිය පර්වතය අසළීන් නිමා කිරීමට කටයුතු සංවිධානය කර ඇති බව ජාතික නාමල් උයන නිර්මාතෘ පූජ්‍ය වනවාසී රාහුල හිමියෝ පවසති.
ජාතික නාමල් උයනෙන් ආරම්භ කර දුශ්කර වූ මාර්ග ඔස්සේ කිලෝ මීටර් 100 ක දුරක් ගෙවා ඓතිහාසික සීගිරිය පර්වතය අසළින් එම පා ගමන නිමා කිරීමට නියමිතය. මෙම පා ගමන පුරා දින 05ක් මුළුල්ලේ පැවැත්වේ. ඒ අනුව දිනකට කිලෝ මීටර් 20ක දුරක් එම පාගමන ගමන් කිරීමට නියමිතව තිබේ.
පරිසරය සුරැකීම ලෝක වාසී ලොකු කුඩා සැමගේ වගකීම බවට සියළු ලෝක වාසීන්ට පණිවිඩයක් දීමේ අරමුණින් ජපන් ජාතිකයින් විසින් මෙම පරිසර පා ගමන සංවිධනය කර ඇති බව පූජ්‍ය වනවාසී රාහුල හිමියෝ පැවැසූහ.
ශ්‍රී ලංකාවේ විශාලතම නා වනය සහිත වසර මිලියන දස ලක්ෂ පන්සිය පනහකට වඩා පැරණි ප්‍රාග් ඓතිහාසික යුගයට අයත් ලෝකප්‍රකට දකුණු ආසියාවේ විශාලතම රෝස තිරුවානා කඳුවැටිය පිහිටා ඇත්තේ ද ගල්කිරියාගම පිහිටි ජාතික නාමල් උයනේ ය.
කාලයේ ඇවෑමෙන් අභාවයට යමින් තිබූ දකුණු ආසියාවේ විශාලතම රෝස තිරුවාණා නිධිය සහිත මෙම ජාතික නාමල් උයන දහසකුත් එකක් වූ බාධා හිරිහැර කම්කටොලු වනසතුන්ගේ පීඩා මෙන්ම විවිධ දුශ්කරතා මැද මතුපරපුර වෙනුවෙන් සුරක්ෂිත කිරීම සදහා පූජ්‍ය වනවාසී රාහුල හිමියන් විසින් කටයුතු ආරම්භ කර ලබන මාර්තු 28 වැනි දිනට වසර 33ක් සම්පූර්ණ වේ.

කැකිරාව කුෂාන් ජයවර්ධන