පසුගිය වසරේදී පාර්ලිමේන්තුව අසල පැවැත්වූ සාමකාමී කාන්තා විරෝධතාවකට පහර දීමෙන් තම මූලික අයිතිවාසිකම් උල්ලංඝනය කළේ යැයි කියමින් අග්‍රාමාත්‍ය, ආචාර්ය හරිනි අමරසූරිය ඇතුළු පිරිසක් ගොනු කළ මූලික අයිතිවාසිකම් පෙත්සම ජනවාරි 30 වැනි දා කැඳවීමට ශ්‍රේෂ්ඨාධිකරණය ඊයේ (22) දින නියම කර තිබෙනවා.
ත්‍රි පුද්ගල ශ්‍රේෂ්ඨාධිකරණ විනිසුරු මඩුල්ල හමුවේ පෙත්සම සලකා බැලුණු අවස්ථාවේ පෙත්සම්කාරියන් වෙනුවෙන් පෙනී සිටි ජනාධිපති නීතීඥ සාලිය පීරිස් කියා සිටියේ සිද්ධියේදී අත්අඩංගුවට ගත් පිරිසකට එරෙහිව මහේස්ත්‍රාත් අධිකරණයේ නඩුවක් පැවැත්වෙන බවත්, එම නඩුව ඉල්ලා අස්කර ගන්නේ නම් මෙම පෙත්සම තවදුරටත් පවත්වාගෙන යන්නේද, නැද්ද යන්න සම්බන්ධයෙන් තීරණයක් ගැනීමට හැකියාව ඇති බවයි.
අග්‍රාමාත්‍ය ආචාර්ය හරිනි අමරසූරිය, පාර්ලිමේන්තු මන්ත්‍රීනි නීතීඥ නිලන්ති කොට්ටහච්චි ඇතුළු ජාතික ජන බලවේගයේ කාන්තා ක්‍රියාකාරිනියන් පිරිසක් විසින් මෙම පෙත්සම ගොනු කර ඇති අතර, එවක වැඩබලන පොලිස්පතිවරයා වූ දේශබන්දු තෙන්නකෝන්, වැලිකඩ, තලංගම, මිරිහාන පොලිස්ථානාධිපතිවරු හා නුගේගොඩ ජ්‍යේෂ්ඨ පොලිස් අධිකාරිවරයා ඇතුළු පිරිසක් එම පෙත්සමේ වගඋත්තරකරුවන් ලෙස නම්කර තිබෙනවා.
