අක්‍ෂි ශල්‍යකර්මයක් සඳහා මහනුවර මහ රෝහලේ දී Prednisolone නමැති දියර ඖෂධය භාවිත කිරීමෙන් අනතුරුව දෑස් සම්පූර්ණයෙන්ම අන්ධ වූ රෝගියෙක් හිටපු සෞඛ්‍ය අමාත්‍ය කෙහෙළිය රඹුක්වැල්ල, ඖෂධ නියාමන අධිකාරිය, එකී දියර ඖෂධය සැපයූ සමාගම, සෞඛ්‍ය සේවා අධ්‍යක්‍ෂ ජනරාල්වරයා ඇතුළු නව දෙනකුගෙන් රුපියල් මිලියන 100ක වන්දියක් ඉල්ලා එන්තරවාසි යවා තිබෙනවා.
කන්දපොල, කොන්දකොඩියවත්ත ප්‍රදේශයේ පදිංචි මැකරි රාජරත්නම් නමැති අය එම එන්තරවාසි යවා ඇති බවයි වාර්තා වන්නේ.
ඉදිරි දින 14 ඇතුළත සිය සේවාදායකයා ඉල්ලා සිටින වන්දිය ගෙවීමට අපොහොසත් වුවහොත් අපරාධ පරීක්‍ෂණ දෙපාර්තමේන්තුවට පැමිණිලි කිරීමට හා ඊට එරෙහිව සියලුම නීතිමය පියවර ගැනීමට කටයුතු කරන බව එම එන්තරවාසි මගින් අදාළ නීතීඥ සමාගම දන්වා යවා තිබෙනවා.
විශේෂඥ ශල්‍ය වෛද්‍ය රෝහණ එදිරිසිංහගේ උපදෙස් පරිදි 2023 අප්‍රේල් මස 5 වැනිදා නුවරඑළිය මහ රෝහලට තමන් ඇතුළත් වූ බවත් එහිදී Prednisolone දියර ඖෂධය දෑස්වලට දැමීමෙන් පසුව විවිධ අතුරු ආබාධ ඇතිවූ බවත්, මාසයක කාලයක් ගතවීමටත් පෙර සිය දෑස් සම්පූර්ණයෙන්ම අන්ධභාවයට පත්වූ බවත් එම එන්තරවාසි මගින් අදාළ පුද්ගලයා පවසා තිබෙනවා.
