ඡන්දය නොපැවැත්වීමේ අදහසක් රජයට කිසිසේත් නොමැති බව කැබිනට් මාධ්‍ය ප්‍රකාශක අමාත්‍ය බන්දුල ගුණවර්ධන පවසනවා.
ඒ අනුව මාධ්‍යවේදියෙක් යොමුකළ ප්‍රශ්නයකට පිළිතුරු ලබාදෙමින් අමාත්‍යවරයා සඳහන් කළේ, මහා භාණ්ඩාගාරය එදිනෙදා මූල්‍ය තත්ත්වය සම්බන්ධයෙන් ගැටලුවකට මුහුණදී ඇති බවයි.
ණය ප්‍රතිව්‍යුහගතකරණය සිදු නොකළහොත් ණය ලබාගැනීමට හැකියාවක් නොමැති බවත්, අප්‍රේල් වන විට ජාත්‍යන්තර මූල්‍ය අරමුදලේ ණය සහනය ලබා ගැනීමට නොහැකිවුවහොත් රට ඉදිරියට ගෙනයාමට නොහැකි බවයි අමාත්‍යවරයා සඳහන් කළේ.
රටේ වත්මන් මුදල් තත්ත්වය සම්බන්ධයෙන් මහා භාණ්ඩාගාරය භාර ලේකම්වරයා විසින් අධිකරණයටද කරුණු ඉදිරිපත් කර ඇති බවයි කැබිනට් මාධ්‍ය ප්‍රකාශක අමාත්‍ය බන්දුල ගුණවර්ධන වැඩිදුරටත් සඳහන් කළේ.
