අපරාධ විමර්ශන දෙපාර්තමේන්තුව (සීඅයිඩී) අවධානය යොමු කරන්නේ හිටපු ආරක්ෂක ලේකම් ගෝඨාභය රාජපක්ෂ මහතා වෙත මිස පාස්කු ප්‍රහාරවලට නොවන බව හිටපු ජනාධිපති හා විපක්ෂ නායක මහින්ද රාජපක්ෂ මහතා පවසනවා.
අද පැවති උත්සවයක් අමතමින් රාජපක්ෂ මහතා කියා සිටියේ ගෝඨාභය රාජපක්ෂගේ විදේශ ගමන් බලපත්‍රය පිළිබඳ බොරු චෝදනා පිළිබඳව රහස් පොලිසිය විමර්ශනය කරන බවයි.
කෙසේ වෙතත් පාස්කු ඉරිදාට එල්ල වූ මාරාන්තික ප්‍රහාර පිළිබඳ පරීක්ෂණ කෙරෙහි රහස් පොලිසිය අවධානය යොමු නොකරන බවත් හිටපු රජයේ සාමාජිකයන්ගෙන් පළිගැනීමට අරමුණු කරගෙන වත්මන් රජය මෙවන් කටයුතු කරන බවත් ඔහු වැඩි දුරටත් පවසනවා.
“එල්ටීටීඊයේ පරාජයෙන් පසු රට සාමය හා නිදහස භුක්ති වින්දා. නමුත් මේ වසරේ පාස්කු ඉරිදා සාමය බිඳ වැටිලා. ප්‍රහාරයේ වගකීම රජයේ කිසිවෙකු විසින් භාර නොගන්නා අතර ඒ වෙනුවට එකිනෙකාට ඇඟිල්ල දිගු කරනවා” යනුවෙන්ද ඔහු මෙහිදී අදහස් දැක්වුවා.
