මී තොටමුල්ල කුණු කන්දට යටව අවසන් ගමන් ගිය හය දෙනෙකුගේ අවසන් කටුයුතු අද(16)

මීතොටමුල්ල කුණුකන්ද නායයෑම හේතුවෙන් මියගිය  අට දෙදෙනකුගේ අවසන් කටයුතු අද සිදු කෙරුණි.එහිදී මිය ගිය අයගේ ඥාතීන් චෝදනා කර සිටියේ දේහයන් බාර දෙන විට දැඩි ප්‍රමාදයක් සිදු වූ බවටයි.

මෘත දේහයන්  කිහිපයක් සදහා අවසන් ගෞරව දැක්වීම පිණිස (අද16) මීතොට මුල්ල ප්‍රෙද්ශයේ තාවකාලික ස්ථානයක තැන්පත් කර තිබුණු අතර ඔවුන් වෙනුවෙන් ආගමික වතාවත් සිදු කිරීමෙන් අනතුරුව කොටිකාවත්ත පොදු සුසාන භූමියේදී මිහිදන් කෙරුණි.

 මේ වන විට කුණු කන්ද කඩා වැටීමෙන් මිය ගිය   සංඛ්‍යාව 25 දක්වා ඉහළ ගොස් තිබෙන බවත් ඒ අතර ළමුන් හය දෙනෙකු සහ කාන්තාවන් නව දෙනෙකු ද ඒ අතර වෙන බවද වාර්තා වේ.

තුවාල ලැබූ කාන්තාවන් දෙදෙනෙකු ඇතුළු පුද්ගලයින් තිදෙනෙකු තවදුරටත් කොළඹ ජාතික රෝහලේ ප්‍රතිකාර ලබන අතර ඉන් එක් පුද්ගලයෙකු දැඩි සත්කාර ඒකකයේ ප්‍රතිකාර ලබන බව රෝහල් ප්‍රකාශිකාවක සඳහන් කළාය.

නායයෑමෙන් අතුරුදන්වූවන් සොයා තවදුරටත් සෝදිසි මෙහෙයුම් සිදුකරන බව යුද හමුදා මාධ්‍ය ප්‍රකාශකවරයා පැවසුවේය.

සුන්බුන්වලට යටවී තවත් පිරිස් සිටී ද යන්න සොයා බැලීම සඳහා ත්‍රිවිද හමුදාව, පොලීසිය සහ ස්වේච්ඡා සංවිධාන ආරම්භ කළ මෙහෙයුම් තවදුරටත් ක්‍රියාත්මක වෙයි.

එම මෙහෙයුම්වලට බාධා වන අයුරින් ප්‍රදේශයේ නිරීක්ෂණය කිරීම සඳහා නොපැමිණෙන ලෙස පොලීසිය මහජනතාවගෙන් ඉල්ලීමක් ද කර තිබේ.

ඊයේ (15) දිනයේදී විපතට පත් නිවෙස්වල භාණ්ඩ සොරකම් කිරීමේ නිරත වූ පුද්ගලයන්18 දෙනෙකු පොලිස් අත්අඩංගුවට ගෙන තිබුණි.

මේ අතර කුණු කන්ද කඩා වැටීම හේතුවෙන් විපතට පත් වූ පවුල් 180කට පමණ අයත් පුද්ගලයන් 625 දෙනෙකු පමණ සුබ සාධන මධ්‍යස්ථානවලට යොමුකර තිබේ.

කොළොන්නාව ටෙරන්ස් එන්.ද සිල්වා විද්‍යාලයේ සුබ සාධන මධ්‍යස්ථානයක් පිහිටුවා ඇති අතර ආපදා කළමනාකරණ කණ්ඩායම් මඟින් ඔවුන්ට අවශ්‍ය සහන සැලසීමට පියවර ගෙන ඇති බව අමාත්‍ය  අනුර ප්‍රියදර්ශන යාපා මහතා ප්‍රකාශ කළේය.

රජයේ චක්‍රලේඛ නොසලකා අවශ්‍ය අරමුදල් කඩිනමින් ලබාදීම සඳහා ජනාධිපතිවරයාගේ සහ අග්‍රමාත්‍යවරයාගේ උපදෙස් පරිදි විෂය භාර අමාත්‍යංශ ලේකම්වරුන්ට උපදෙස් ලබා දී ඇති බව අමාත්‍යවරයා ප්‍රකාශ කළේය.

එමෙන්ම මියගිය පුද්ගලයන්ගේ දේහයන් පිළිබඳ අවසන් කටයුතු රජයේ වියදමින් සිදුකිරීමට තීරණය කර තිබේ.