නාවින්න වෙඩිතැබීමේ සැකකාර වෙඩික්කරු අත්අඩංගුවට….

මහරගම නාවින්න හංදිය ආසන්නයේ හයිලෙවල් මාර්ගයේ රැඳී සිටි පුද්ගලයෙකුට යතුරුපැදියකින් පැමිණ වෙඩිතැබීමේ සිද්ධියට සම්බන්ධ සැකකරුවෙකු අත්අඩංගුවට ගෙන තිබේ.

පොලීසිය පැවසුවේ ලද තොරතුරකට අනුව බස්නාහිර පළාත දකුණ අපරාධ කොට්ඨාසයේ නිලධාරීන් විසින් කොට්ටාව ප්‍රදේශයේ සිදුකළ වැටලීමකදී සැකකරු අත්අඩංගුවට ගැනීමට හැකිවූ බවය.

පොලීසිය තවදුරටත් සඳහන් කළේ, 2025.08.06 වනදා සිදුකර තිබූ එම වෙඩිතැබීමේ සිද්ධියේ වෙඩික්කරු ලෙස කටයුතු කළ සැකකරු මෙලෙස අත්අඩංගුවට ගෙන ඇති බවත් ය.

සැකකරුගෙන් සිදුකරන ලද ප්‍රශ්න කිරීම්වලට අනුව ඔහුගේ නිවසේ තිබි විදේශීය රටක නිෂ්පාදිත ගිනිඅවියක් සහ බෝර 12 වර්ගයේ උණ්ඩ 03ක් සොයාගත් බවද පොලීසිය පැවසීය.

අත්අඩංගුවට ගෙන ඇත්තේ 39 හැවිරිදි කිරිවත්තුඩුව ප්‍රදේශයේ පදිංචිකරුවෙකි.