කොටස් වෙළෙඳපොළේ අද විශාල වැටීමක්….

පසුගිය ගනුදෙනු දින 4ක කාලපරිච්ඡේදය තුළ දී තෙවැනි වතාවටත් කොටස් වෙළෙඳපොළ මිල දර්ශකවල පහළ යාමක් අද (09) දිනයේ දී වාර්තා විය.

කෙසේවෙතත් අද දින කොටස් වෙළෙඳපොළ කඩා වැටීම පසුගිය දින කිහිපයට සාපේක්ෂව ඉහළ මට්ටමේ එකක් වූ අතර පසුගිය 2025 ජූනි 23 න් පසු තනි දිනක් තුළ සියලු කොටස් මිල දර්ශකය පහළ ගිය වැඩිම ඒකක ප්‍රමාණය එහිදී වාර්තා වුණි.

ඒ අනුව දිනයේ ගනුදෙනු අවසානයේ දී සියලු කොටස් මිල දර්ශක අගය ඒකක 231.7කින් පහළ ගොස් ඒකක 20,674.1ක් ලෙසින් සටහන් වූ අතර එය පෙර දිනයට සාපේක්ෂව 1.11%ක පහළ යාමක් වේ.

මේ අතර S&P SL20 දර්ශකය ඒකක 55.04කින් පහළ ගොස් ඒකක 5,900.32ක් ලෙසින් දිනයේ ගනුදෙනු අවසානයේ දී සටහන්ව තිබුණි.

රු. බිලියන 9.04ක ගනුදෙනු පිරිවැටුමක් අද දිනයේ දී වාර්තා විය.

මෙහිදී කැපීපෙනෙන කරුණක් වූයේ රු. බිලියන 1.5ක විදේශීය මිල දී ගැනීම් ප්‍රමාණයක් වාර්තා වී තිබීමයි. දේශීය මිල දී ගැනීම් රු. බිලියන 7.54ක් ලෙසින් සටහන් වන අතර දේශීය විකිණුම් රු. බිලියන 8.92 ක් ලෙසින දිනය තුළ වාර්තා වී තිබේ. විදේශීය විකිණුම් අද දිනය තුළ රු. මිලියන 120ක් තරම් සාපේක්ෂව ඉතා අඩු ප්‍රමාණයකි.